ʻO KA ʻEPISETOLE MUA A PAULO KA LUNAʻŌLELO I KO TESALONIKE 5 - Ka Baibala Hemolele

1 ʻO ka hiki ʻana mai o ka Haku i ka ʻahaʻōlelo, a me ka hoʻoikaika pū ʻana o kona mau ʻōhua.

MOKUNA V.

¹ ¶ A no nā wā, a me nā manawa, e nā hoahānau, ʻaʻole o ʻoukou hemahema e pono ai au ke palapala aku iā ʻoukou.

² No ka mea, ua ʻike paka nō ʻoukou ē, ʻo ka lā o ka Haku, me he ʻaihue lā i ka pō, pēlā nō ia e hiki mai ai.

³ A i ka wā e ʻōlelo ai lākou, “He pōmaikaʻi, he malu;” a laila, loʻohia koke ʻē mai lākou e ka make, me he haʻakokōhi lā o ka wahine hāpai; ʻaʻole hoʻi lākou e pakele.

⁴ Akā, ʻo ʻoukou, e nā hoahānau, ʻaʻole ʻoukou i loko o ka pouli, e loʻohia ai ʻoukou e ua lā lā, me he ʻaihue lā.

⁵ He poʻe keiki ʻoukou a pau no ka mālamalama, a he mau kamaliʻi nō hoʻi no ke ao; ʻaʻole no ka pō kākou, ʻaʻole hoʻi no ka pouli.

⁶ Mai hiamoe hoʻi kākou e like me kekahi poʻe; akā, e kiaʻi kākou me ke kūoʻo.

⁷ No ka mea, ʻo ka poʻe hiamoe, ua hiamoe lākou i ka pō; a ʻo ka poʻe ʻona, ua ʻona lākou i ka pō.

⁸ Akā, ʻo kākou ka poʻe o ke ao, e kūoʻo kākou, e komo ana i ka pale umauma o ka manaʻoʻiʻo a me ke aloha; a i ka pāpale koa hoʻi o ka manaʻolana i ke ola.

⁹ ʻAʻole ke Akua i hoʻokaʻawale mai iā kākou no ka inaina; akā, no ka loaʻa ʻana mai o ke ola i ko kākou Haku iā Iesū Kristo,

¹⁰ I ka Mea i make aku no kākou, i ola pū ai kākou me ia, i ke ala ʻana, a i ka hiamoe ʻana paha o kākou.

¹¹ No laila e hōʻoluʻolu pū ai ʻoukou iā ʻoukou iho, a e hoʻokūkulu kekahi i kekahi, e like me kā ʻoukou hana ʻana nō.

¹² ¶ Ke nonoi aku nei mākou iā ʻoukou, e nā hoahānau, e ʻike aku i ka poʻe e hoʻoikaika ana i waena o ʻoukou, ka poʻe ma luna iho o ʻoukou i loko o ka Haku, a e aʻo mai ana iā ʻoukou;

¹³ a e mahalo nui aku iā lākou me ke aloha, no kā lākou hana. E kuʻikahi hoʻi ʻoukou iho.

¹⁴ Ke noi aku nei mākou iā ʻoukou, e nā hoahānau, e aʻo aku i ka poʻe hoʻokekeʻe, e hōʻoluʻolu i ka poʻe naʻau hopohopo, e kōkua i ka poʻe nāwaliwali, e ahonui aku hoʻi i nā kānaka a pau.

¹⁵ E mālama hoʻi, i hoʻihoʻi ʻole aku kekahi i ka hewa no ka hewa i kekahi; e hahai mau ʻoukou i ka pono i waena o ʻoukou a me nā kānaka a pau.

¹⁶ E hauʻoli mau loa.

¹⁷ E pule hoʻōki ʻole.

¹⁸ Ma nā mea a pau e hoʻomaikaʻi aku ai; no ka mea, ʻo ia ko ke Akua manaʻo i loko o Kristo Iesū iā ʻoukou.

¹⁹ Mai kinai i ka ʻUhane.

²⁰ Mai hoʻowahāwahā i ka wānana ʻana.

²¹ E hōʻoiaʻiʻo i nā mea a pau; a e hoʻopaʻa i ka mea pono.

²² E haʻalele i nā mea ʻano ʻino a pau.

²³ ¶ A na ke Akua e malu ai e hoʻomaʻemaʻe loa mai iā ʻoukou; a e mālama pono ʻia mai ko ʻoukou naʻau, a me ko ʻoukou ʻuhane, a me ko ʻoukou kino, me ka hala ʻole, a hiki mai ko kākou Haku, ʻo Iesū Kristo.

²⁴ He ʻoiaʻiʻo mau ko ka Mea nāna ʻoukou i hea mai, nāna nō hoʻi ia e hana.

²⁵ ¶ E nā hoahānau, e pule ʻoukou no mākou.

²⁶ ¶ E aloha aku i nā hoahānau a pau me ka honi hoʻāno.

²⁷ Ke kauoha aku nei au iā ʻoukou ma ka Haku, e heluhelu ʻia aku kēia ʻepisetole i ka poʻe hoahānau laʻa a pau loa.

²⁸ ¶ Iā ʻoukou ke aloha mai ko kākou Haku ʻo Iesū Kristo. ʻĀmene.