ʻO KA ʻEPISETOLE HOʻOLAHA MUA A PETERO 5 - Ka Baibala Hemolele

1 He ʻōlelo hoʻoikaika i ke kūpaʻa.

MOKUNA V.

¹ ¶ ʻO wau ʻo kekahi lunakahiko, a he mea hōʻike i ko Iesū ʻeha ʻana, a he hoaaloha pū no ka nani e hiki mai ana, ke nonoi aku nei au i nā lunakahiko o ʻoukou.

² E hānai ʻoukou i ka poʻe o ke Akua i waena o ʻoukou, e kiaʻi ana, ʻaʻole no ka hoʻokoi ʻia mai, no ka makemake nō; ʻaʻole hoʻi no ka puni waiwai; akā, no ka manaʻo pono.

³ Mai hana hoʻi, me he poʻe aliʻi lā ma luna o ka ʻekalesia; akā, me he poʻe kumu lā, i hoʻomāhuʻi ʻia ai e kēlā poʻe.

⁴ A hiki i ka wā e hōʻike ʻia mai ai ke Kahu Hipa Nui, a laila e loaʻa iā ʻoukou ka lei nani loa, ʻaʻole loa e mae.

⁵ ʻO ʻoukou, e ka poʻe ʻōpiopio, e noho pono ʻoukou ma lalo o nā lunakahiko. ʻO ʻoukou hoʻi a pau, e noho pono ʻoukou, kekahi ma lalo iho o kekahi, a e hoʻouhi ʻia ʻoukou i ka manaʻo hoʻohaʻahaʻa; no ka mea, «ua kūʻē ke Akua i ka poʻe hoʻokiʻekiʻe; akā, ke lokomaikaʻi nei ʻo ia» i ka poʻe hoʻohaʻahaʻa.

⁶ ¶ No laila, e hoʻohaʻahaʻa ʻoukou iā ʻoukou iho ma lalo iho o ka lima mana o ke Akua, i hoʻokiʻekiʻe aʻe ʻo ia iā ʻoukou i ka wā pono.

⁷ E waiho aku i ko ʻoukou kaumaha a pau ma luna ona; no ka mea, ke manaʻo nei ʻo ia iā ʻoukou.

⁸ E kūoʻo, a e makaʻala; no ka mea, e like me ka liona uō, pēlā nō e holoholo nei ko ʻoukou ʻenemi, ʻo ka diabolō, e ʻimi ana i kāna mea e ale ai.

⁹ E pale aku ʻoukou iā ia, me ke kūpaʻa ma ka manaʻoʻiʻo, me ka ʻike pono hoʻi, ua hoʻoluhi pū ʻia ko ʻoukou poʻe hoahānau, e noho ana i ke ao nei, ia luhi hoʻokahi nō.

¹⁰ Akā, ʻo ke Akua, nāna mai ka lokomaikaʻi a pau, ʻo ka Mea i hea mai ai iā kākou nei i ka nani mau loa, ma o Kristo Iesū lā, ma hope o ko ʻoukou ʻeha pākole ʻana, nāna nō e hoʻolilo iā ʻoukou i hemolele loa, a e hoʻokumu hoʻi, a e hoʻoikaika, a e hoʻokūpaʻa iā ʻoukou.

¹¹ Iā ia nō ka hoʻonani ʻia, a me ke aupuni mau loa i ke ao pau ʻole. ʻĀmene.

¹² ¶ Ma o Silevano, he hoahānau pono o ʻoukou i koʻu manaʻo, ua palapala pōkole aku au iā ʻoukou, me ka hoʻoikaika aku, a me ka hōʻike aku i ka lokomaikaʻi ʻoiaʻiʻo o ke Akua, kahi a ʻoukou e kū nei.

¹³ Ke aloha aku nei ka poʻe i wae pū ʻia me ʻoukou ma Babulona nei; a ʻo kaʻu keiki hoʻi ʻo Mareko.

¹⁴ E aloha ʻoukou i kekahi i kekahi, me ka honi aloha. E maluhia ʻoukou a pau loa, ka poʻe i loko o Kristo Iesū. ʻĀmene.