ʻO KA ʻEPISETOLE HOʻOLAHA MUA A PETERO 2 - Ka Baibala Hemolele

1 No ka pōhaku kumu no ke kihi.

MOKUNA II.

¹ ¶ No ia mea, e haʻalele ʻoukou i ka ʻōpū ʻinoʻino a pau, a me ka wahaheʻe a pau, a me ka hoʻokamani, a me ka pāonioni, a me ka ʻōlelo ʻino a pau;

² e like me nā keiki hānau hou, pēlā ʻoukou e ʻiʻini ai i ka waiū aʻiaʻi o ka ʻōlelo, i mea e ulu nui ai ʻoukou;

³ inā paha, ua hoʻāʻo ʻoukou he maikaʻi ka Haku.

⁴ Ua hele mai ʻoukou i ona lā, ka pōhaku ola, ua haʻalele ʻia nō naʻe ia e kānaka; akā, ua wae ʻia mai e ke Akua, he maikaʻi ʻiʻo.

⁵ ʻO ʻoukou nō hoʻi, e like me nā pōhaku ola, ua hoʻonohonoho ʻia ʻoukou i hale ʻuhane, a i poʻe kāhuna hemolele hoʻi, i kaumaha aku ai ʻoukou i nā mōhai ʻuhane, i ka mea ʻoluʻolu i ke Akua ma o Iesū Kristo lā.

⁶ No laila i ʻī mai ai ka Palapala Hemolele, “«Aia hoʻi, ua hoʻonoho wau ma Ziona, i pōhaku kumu no ke kihi, i wae ʻia, A he mea waiwai ʻiʻo: a ʻo ka mea manaʻoʻiʻo aku iā ia, ʻaʻole ia e hoʻohilahila ʻia».”

⁷ He maikaʻi ʻiʻo ia iā ʻoukou i ka poʻe manaʻoʻiʻo; akā, i ka poʻe hoʻolohe ʻole, “«ʻO ka pōhaku i haʻalele ʻia e ka poʻe hana hale, ʻO ia kai hoʻolilo ʻia i pōhaku kumu no ke kihi,

⁸ He pōhaku e ʻōkupe ai, a he pōhaku hoʻohihia hoʻi»,” i ka poʻe i ʻōkupe i ka ʻōlelo, ka poʻe hoʻolohe ʻole; e like me ke koho mua ʻana.

⁹ Akā, ʻo ʻoukou, «he hanauna i wae ʻia, he poʻe kāhuna aliʻi, he aupuni kanaka hemolele, he poʻe kānaka nona ponoʻī»; i hōʻike aku ai ʻoukou i ka maikaʻi o ka Mea nāna ʻoukou i hea mai, mai loko mai o ka pouli a i ka mālamalama kupanaha ona.

¹⁰ «ʻAʻole ʻoukou he aupuni ma mua»; akā, i kēia manawa, «he aupuni ʻoukou no ke Akua»; ia manawa, «ʻaʻole ʻoukou i aloha ʻia», i kēia manawa «ua aloha ʻia mai nō».

¹¹ ¶ E nā pōkiʻi ē, ke nonoi aku nei au iā ʻoukou, me he poʻe malihini lā, a me he poʻe lewa lā, e hoʻomamao aku ʻoukou i nā kuko o ke kino, i nā mea kūʻē i ko ka ʻuhane.

¹² A e noho pono hoʻi ʻoukou, i waena o ko nā ʻāina ʻē; i hoʻonani aku ai lākou i ke Akua, ke hiki mai ka lā o ka ʻike ʻana mai, no ko lākou ʻike ʻana i kā ʻoukou hana maikaʻi, ma ka mea a lākou e ʻōhumu nei iā ʻoukou, me he poʻe hana hewa lā.

¹³ ¶ No laila, e hoʻolohe pono ʻoukou i kā nā luna kanaka a pau no ka Haku; inā ma kā ke aliʻi nui e like ia me he mōʻī lā;

¹⁴ inā ma kā nā kiaʻāina, e like ia me nā mea i hoʻouna ʻia e ia no ka hoʻopaʻi ʻana i ka poʻe hana hewa, a no ka hoʻomaikaʻi ʻana aku i ka poʻe hana maikaʻi.

¹⁵ No ka mea, pēlā ko ke Akua makemake, ma ka hana maikaʻi ʻana, e pili pū ai iā ʻoukou ka naʻaupō o ka poʻe ʻike ʻole.

¹⁶ Me he poʻe kauā ʻole lā, ʻaʻole naʻe e hoʻolilo ana i ko ʻoukou hoʻokauā ʻole ʻia i mea e uhi ai i ka hewa; akā, e like me nā kauā a ke Akua.

¹⁷ E hoʻomaikaʻi aku i nā mea a pau: e aloha i nā hoahānau; e makaʻu i ke Akua; e hoʻomaikaʻi i ke aliʻi.

¹⁸ ¶ E nā kauā, e noho pono ʻoukou ma lalo o ko ʻoukou mau haku, me ka makaʻu nui aku; ʻaʻole i nā haku maikaʻi wale nō, a me ka ʻoluʻolu; akā, i ka poʻe ʻoʻoleʻa nō hoʻi kekahi.

¹⁹ No ka mea, eia kai kū i ka pono, inā nō i ka manaʻo i ke Akua, e hoʻomanawanui ai kekahi i ke kaumaha no ka hoʻoluhi hewa ʻia.

²⁰ ʻAuhea hoʻi ka mahalo ʻia mai, ke hoʻomanawanui ʻoukou i ke kuʻi ʻia mai no ko ʻoukou mau hewa iho? Akā, inā e hōʻino ʻia mai ʻoukou, no kā ʻoukou hana maikaʻi ʻana, a hoʻomanawanui ʻoukou, ʻo ia ka pono i ke Akua.

²¹ No kēia mea, i hea ʻia mai ʻoukou; no ka mea, ua hōʻino ʻia ʻo Kristo no kākou, a ua waiho ʻo ia no ʻoukou i kumuhana, i hahai aku ai ʻoukou ma kona mau kapuaʻi;

²² «Ka Mea i hana hewa ʻole, ʻaʻole hoʻi i ʻike ʻia ka ʻapaʻapa ma kona waha».

²³ Aia kūamuamu ʻia mai ʻo ia, ʻaʻole ia i kūamuamu hou aku; a i kona hōʻeha ʻia, ʻaʻole ia i ʻōlelo hoʻoweliweli aku; akā, hāʻawi aku ʻo ia iā ia iho i ka Mea nāna e hoʻopaʻi mai ma ka pololei.

²⁴ Nāna iho nō i hali i ko kākou hewa ma kona kino iho ma luna o ka lāʻau, i make ai kākou i ka hewa, e ola ai i ka pono; ua hoʻōla ʻia hoʻi ʻoukou e kona mau palapū.

²⁵ No ka mea, ua like ʻoukou me nā hipa e hele hewa ana; akā, ua hoʻihoʻi ʻia mai nei ʻoukou i ke Kahu Hipa, a me ka Luna Kiaʻi o ko ʻoukou mau ʻuhane.