ʻO KA ʻEPISETOLE HOʻOLAHA MUA A IOANE 5 - Ka Baibala Hemolele

1 No ka poʻe hōʻike.

MOKUNA V.

¹ ¶ ʻO ka mea i manaʻoʻiʻo ʻo Iesū ka Mesia, na ke Akua ia i hoʻohānau mai; a ʻo ka mea i aloha aku i ka Mea nāna i hoʻohānau mai, ʻo ia ke aloha aku i ka mea i hoʻohānau ʻia mai e ia.

² No ia mea, ke ʻike nei nō kākou i ko kākou aloha ʻana i nā keiki a ke Akua, ke aloha aku kākou i ke Akua me ka mālama aku i kāna mau kauoha.

³ No ka mea, eia nō ke aloha o ke Akua, ʻo ka mālama aku i kāna mau kauoha; ʻaʻole hoʻi he mea luhi kāna mau kauoha.

⁴ No ka mea, ʻo ka mea a ke Akua i hoʻohānau mai, ʻo ia ke lanakila ma luna o ke ao nei; eia ka mea e lanakila ai ma luna o ke ao nei, ʻo ko kākou manaʻoʻiʻo ʻana.

⁵ ʻO wai lā ka mea e lanakila ana ma luna o ko ke ao nei, ke ʻole ka mea i manaʻoʻiʻo iā Iesū ʻo ia ke Keiki a ke Akua?

⁶ ʻO ka Mea i hiki mai ma ka wai a me ke koko, ʻo Iesū Kristo nō ia; ʻaʻole ma ka wai wale nō; akā, ma ka wai a me ke koko; ʻo ka ʻUhane ka Mea e hōʻike mai, a he ʻoiaʻiʻo ka ʻUhane.

⁷ ʻEkolu Mea nāna e hōʻike mai i loko o ka lani: ʻo ka Makua, ʻo ka Logou, a me ka ʻUhane Hemolele; ʻo kēia mau Mea ʻekolu, hoʻokahi nō ia.

⁸ A ʻekolu nā mea nāna e hōʻike mai ma ka honua: ʻo ka ʻUhane, ʻo ka wai, a me ke koko; ʻo kēia mau mea ʻekolu, ua lilo i hoʻokahi nō.

⁹ Inā e manaʻo kākou ua ʻoiaʻiʻo ka ʻōlelo hōʻike a kānaka, he ʻoi loa aku nō ka ʻōlelo hōʻike a ke Akua; eia nō ka ʻōlelo hōʻike a ke Akua āna i ʻōlelo mai ai no kāna Keiki.

¹⁰ ʻO ka mea e manaʻoʻiʻo ana i ke Keiki a ke Akua, aia nō i loko ona ka hōʻike; ʻo ka mea e manaʻoʻiʻo ʻole i ke Akua, ʻo ia ke hoʻolilo iā ia i mea wahaheʻe; no ka mea, ʻaʻole i manaʻoʻiʻo ʻo ia i ka ʻōlelo a ke Akua āna i ʻōlelo mai ai no kāna Keiki.

¹¹ Eia nō ka ʻōlelo; ua hāʻawi mai ke Akua i ke ola mau loa no kākou, a ʻo ua ola lā, aia nō ia i loko o kāna Keiki.

¹² ʻO ka mea i loaʻa iā ia ke Keiki he ola nō kona; ʻo ka mea i loaʻa ʻole iā ia ke Keiki a ke Akua, ʻaʻole ona ola.

¹³ ¶ Ua palapala aku au i kēia mau mea iā ʻoukou, i ka poʻe i manaʻoʻiʻo i ka inoa o ke Keiki a ke Akua; i ʻike ai ʻoukou, ua loaʻa iā ʻoukou ke ola mau loa; a i manaʻoʻiʻo ai ʻoukou i ka inoa o ke Keiki a ke Akua.

¹⁴ Eia ka manaʻoʻiʻo o kākou iā ia, inā e nonoi aku kākou i kahi mea e like me kona makemake, e hoʻolohe mai nō ʻo ia iā kākou.

¹⁵ Inā i ʻike pono kākou, ua hoʻolohe mai ʻo ia iā kākou, i ka mea a kākou e nonoi aku ai, ke ʻike nei kākou, e loaʻa mai ka mea a kākou i nonoi aku ai iā ia.

¹⁶ Inā e ʻike kekahi i kona hoahānau, e hana ana i ka hewa kū ʻole i ka make, e pule aku ia, a e hāʻawi mai ʻo ia iā ia i ke ola no nā mea e hana ana i ka hewa ʻaʻole i kū i ka make. He hewa nō kekahi i kū i ka make; ʻaʻole au e ʻōlelo aku e pule ʻo ia no ia mea.

¹⁷ ʻO nā mea pono ʻole a pau, he hewa wale nō ia; akā, ʻo kekahi hewa ʻaʻole he mea ia e make ai.

¹⁸ ¶ Ua ʻike nō kākou, ʻo ka mea i hoʻohānau ʻia mai e ke Akua, ʻaʻole e hana hewa ia; akā, ʻo ka mea i hoʻohānau ʻia mai e ke Akua, e mālama ana ʻo ia iā ia iho, ʻaʻole e hoʻopā ka mea hewa iā ia.

¹⁹ Ke ʻike nei kākou, no ke Akua kākou, a ʻo ke ao nei a pau, ke moe nei ia i loko o ka hewa.

²⁰ Ke ʻike nei kākou ua hiki mai nei ke Keiki a ke Akua, a ua hāʻawi mai ia i ka noʻonoʻo iā kākou, i ʻike aku ai kākou i ka mea ʻoiaʻiʻo; a i loko o ka mea ʻoiaʻiʻo kākou, a i loko hoʻi o kāna Keiki ʻo Iesū Kristo. ʻO ia nō ke Akua ʻoiaʻiʻo, a me ke ola mau loa.

²¹ E nā keiki aloha, e mālama pono ʻoukou iā ʻoukou iho i nā akua kiʻi. ʻĀmene.