ʻO KA ʻEPISETOLE HOʻOLAHA MUA A IOANE 4 - Ka Baibala Hemolele

1 No nā kumu wahaheʻe.

MOKUNA IV.

¹ ¶ E nā punahele, mai manaʻoʻiʻo aku ʻoukou i nā ʻuhane a pau; akā, e hoʻāʻo aku i nā ʻuhane, no ke Akua mai paha, ʻaʻole paha; no ka mea, ua nui nō nā kāula wahaheʻe i hele aku i waena o ke ao nei.

² Penei ʻoukou e ʻike ai i ka ʻUhane o ke Akua: ʻo kēlā ʻuhane ʻo kēia ʻuhane e hōʻoiaʻiʻo aku ana, ua hiki mai nei ʻo Iesū Kristo ma ke kino, no ke Akua ia.

³ ʻO kēlā ʻuhane ʻo kēia ʻuhane e hōʻoiaʻiʻo ʻole ana, ua hiki mai ʻo Iesū Kristo ma ke kino, ʻaʻole no ke Akua kēlā; a ʻo ko ʻAnikristo kēia a ʻoukou i lohe ai e hele mai ana; a eia mai nei i loko o ke ao nei i kēia manawa.

⁴ No ke Akua ʻoukou, e nā pōkiʻi, a ua lanakila ʻoukou ma luna o lākou; no ka mea, ua ʻoi aku ka Mea i loko o ʻoukou i ka mea i loko o ke ao nei.

⁵ No ke ao nei lākou; no laila i ʻōlelo ai lākou i nā mea o ke ao nei, ke lohe nei hoʻi ko ke ao nei iā lākou.

⁶ No ke Akua kākou; ʻo ka mea i ʻike i ke Akua, ʻo ia ke lohe mai iā mākou; ʻo ka mea, ʻaʻole no ke Akua, ʻaʻole ia i lohe mai iā mākou. Ma ia mea, ua ʻike nō kākou i ka ʻuhane o ka ʻoiaʻiʻo, a me ka ʻuhane o ka wahaheʻe.

⁷ ¶ E nā punahele, e aloha kākou i kekahi i kekahi; no ka mea, no ke Akua mai ke aloha; ʻo ka mea e aloha aku ana ua hoʻohānau ʻia mai ia e ke Akua, a ua ʻike nō ʻo ia i ke Akua.

⁸ ʻO ka mea e aloha ʻole ana, ʻaʻole ia i ʻike aku i ke Akua; no ka mea, he aloha ke Akua.

⁹ Ma ia mea, ua hōʻike ʻia mai ke aloha o ke Akua iā kākou; no ka mea, hoʻouna maila ke Akua i kāna Keiki hānau kahi i ke ao nei, i ola ai kākou iā ia.

¹⁰ Eia nō ke aloha, ʻaʻole naʻe kākou i aloha aku i ke Akua; akā, ua aloha mai kēlā iā kākou nei, a ua hoʻouna mai hoʻi ʻo ia i kāna Keiki i kalahala no ko kākou hewa.

¹¹ E nā punahele, inā pēlā ko ke Akua aloha ʻana mai iā kākou, he pono ke aloha kākou i kekahi i kekahi.

¹² ʻAʻole i ʻike aku kekahi i ke Akua; akā, inā e aloha aku kākou i kekahi i kekahi, ke noho mai nei nō ke Akua i loko o kākou, a ua paʻa nō hoʻi kona aloha i loko o kākou.

¹³ No ia mea, ke ʻike nei kākou, ua noho kākou i loko ona, a ʻo ia hoʻi i loko o kākou; no ka mea, ua hāʻawi mai ʻo ia i kona ʻUhane no kākou.

¹⁴ A ua ʻike kākou a ke hōʻike aku nei nō hoʻi, ua hoʻouna mai ka Makua i ke Keiki i Mea e ola ai ko ke ao nei.

¹⁵ ʻO ka mea e hōʻoiaʻiʻo ana iā Iesū ʻo ke Keiki ia a ke Akua, ke noho nei ke Akua i loko ona, a ʻo ia nō hoʻi i loko o ke Akua.

¹⁶ A ua ʻike kākou, a ua manaʻoʻiʻo nō hoʻi i ke aloha ʻana mai o ke Akua iā kākou. He aloha ke Akua; a ʻo ka mea e noho ana i loko o ke aloha, ke noho nei ʻo ia i loko o ke Akua, a ʻo ke Akua nō hoʻi i loko ona.

¹⁷ No ia mea, ua paʻa ke aloha iā kākou, i wiwo ʻole kākou i ka lā e hoʻokolokolo ai; no ka mea, e like me ia ma kēia ao, pēlā nō kākou.

¹⁸ ʻAʻohe makaʻu i loko o ke aloha; akā, e kipaku ana ke aloha ʻoiaʻiʻo i ka makaʻu; no ka mea, he ʻehaʻeha ko ka makaʻu; ʻo ka mea makaʻu, ʻaʻole i hemolele ke aloha i loko ona.

¹⁹ Ke aloha aku nei kākou iā ia; no ka mea, ua aloha mua mai kēlā iā kākou.

²⁰ Inā e ʻōlelo aku kekahi, “Ke aloha aku nei au i ke Akua,” a e hoʻomaʻau aku naʻe ia i kona hoahānau, he mea wahaheʻe ia; no ka mea, ʻo ka mea aloha ʻole i kona hoahānau āna i ʻike maka ai, pehea lā e hiki ai iā ia ke aloha aku i ke Akua āna i ʻike maka ʻole ai?

²¹ Eia mai kāna kauoha iā kākou, inā e aloha aku kekahi i ke Akua, e aloha aku nō hoʻi ʻo ia i kona hoahānau.