ʻO KA ʻEPISETOLE HOʻOLAHA MUA A IOANE 3 - Ka Baibala Hemolele

1 No ke aloha nui o Iesū.

MOKUNA III.

¹ ¶ Eia hoʻi, manomano ke aloha a ka Makua i hāʻawi mai ai iā kākou, i kapa ʻia mai ai kākou he poʻe keiki na ke Akua; no ia mea, ʻaʻole i ʻike mai ko ke ao nei iā kākou; no ka mea, ʻaʻole lākou i ʻike iā ia.

² E nā punahele, ʻānō lā, he poʻe keiki kākou na ke Akua; akā, ʻo ko kākou ʻano ma hope aku, ʻaʻole ʻikea ia; akā, ke ʻike nei kākou, a i kona wā e ʻikea mai ai, e like auaneʻi kākou me ia; no ka mea, e ʻike kākou iā ia ma kona ʻano maoli.

³ ʻO ka mea i loaʻa iā ia kēia manaʻolana ma ona lā, ʻo ia ke hoʻomaʻemaʻe iā ia iho e like me ko ia ala maʻemaʻe ʻana.

⁴ ʻO ka mea e hana aku ana i ka hewa, ʻo ia ka mea e haʻihaʻi ana i ke kānāwai; a ʻo ka hewa, ʻo ia nō ke kūʻē ʻana i ke kānāwai.

⁵ Ua ʻike nō ʻoukou, ua hōʻikea mai ʻo ia, i lawe aʻe ia i ko kākou hewa; ʻaʻole hewa i loko ona.

⁶ ʻO ka mea e noho ana i loko ona, ʻaʻole ia e hana hewa. ʻO ka mea e hana i ka hewa, ʻaʻole ia i nānā aʻe iā ia, ʻaʻole nō hoʻi i ʻike iā ia.

⁷ E nā pōkiʻi, e mālama i hoʻopunipuni ʻole kekahi iā ʻoukou; ʻo ka mea i hana i ka pono, ʻo ia kai pono, e like me ko ia ala pono ʻana.

⁸ ʻO ka mea e hana ana i ka hewa, no ka diabolō nō ia; no ka mea, ua hana hewa mau ka diabolō, mai kinohi mai. No ia mea, ua hōʻikea mai ke Keiki a ke Akua, i hōkaʻe aku ai ʻo ia i kā ka diabolō hana ʻana.

⁹ ʻO ka mea i hoʻohānau ʻia mai e ke Akua, ʻaʻole ia e hana hewa; no ka mea, ke noho mau nei kona hua i loko ona; ʻaʻole e hiki iā ia ke hana hewa aku; no ka mea, ua hoʻohānau ʻia mai nō ia e ke Akua.

¹⁰ Ma laila nō i maopopo ai nā keiki a ke Akua, a me ka poʻe keiki na ka diabolō. ʻO ka mea hana ʻole ma ka pono, ʻaʻole ia na ke Akua, ʻaʻole hoʻi ka mea aloha ʻole i kona hoahānau.

¹¹ No ka mea, eia nō ka ʻōlelo a ʻoukou i lohe ai mai kinohi mai, e aloha aku kākou i kekahi i kekahi.

¹² ʻAʻole like me Kaina, na ka mea ʻino nō ʻo ia, a pepehi ihola ia i kona kaikaina a make. No ke aha lā kēlā i pepehi ai iā ia? No ka mea, ua hewa kāna hana iho, a ua pono hoʻi kā kona kaikaina.

¹³ ¶ Mai kāhāhā ʻoukou, e nā hoahānau oʻu, ke hoʻomaʻau mai ko ke ao nei iā ʻoukou.

¹⁴ Ke ʻike nei kākou, ua lilo aʻe kākou mai ka make aʻe i ke ola; no ka mea, ke aloha aku nei kākou i nā hoahānau. ʻO ka mea e aloha ʻole ana i kona hoahānau, ke noho nei ʻo ia ma ka make.

¹⁵ ʻO ka mea e hoʻomaʻau ana i kona hoahānau, he mea pepehi kanaka ia; ua ʻike nō ʻoukou, ʻo ka mea pepehi kanaka, ʻaʻole ke ola mau loa e noho ana i loko ona.

¹⁶ No ia mea, ua ʻike kākou i ke aloha; no ka mea, ua waiho ihola ʻo ia i kona ola no kākou; a he mea pono nō hoʻi iā kākou, ke waiho aʻe i ko kākou ola no ka poʻe hoahānau.

¹⁷ ʻO ka mea i loaʻa iā ia ka waiwai o kēia ao, a ʻike aʻela i ka nele o kona hoahānau, a papani aʻe i kona naʻau iā ia, pehea lā ke aloha o ke Akua e noho ai i loko ona?

¹⁸ E nā pōkiʻi oʻu, mai aloha kākou ma ka waha, ʻaʻole hoʻi ma ke alelo wale nō; akā, ma ka hana ʻana a me ka ʻoiaʻiʻo.

¹⁹ Ma kēia mea e ʻike ai kākou, no ka ʻoiaʻiʻo kākou, a e hōʻoiaʻiʻo aku kākou i ko kākou mau naʻau i mua ona.

²⁰ No ka mea, inā e hoʻohewa mai ko kākou naʻau iā kākou iho, ua ʻoi aku ke Akua i ko kākou naʻau, a ua ʻike ʻo ia i nā mea a pau.

²¹ E nā punahele, inā e hoʻohewa ʻole mai ko kākou naʻau iā kākou iho, a laila ua loaʻa iā kākou ka wiwo ʻole i mua o ke Akua.

²² ʻO ka mea a kākou e noi aku ai, e loaʻa nō iā kākou nona mai; no ka mea, ke mālama nei kākou i kāna mau kauoha, a ke hana nei nō hoʻi kākou i mua ona i kona mea e makemake ai.

²³ Eia nō kāna kauoha mai, e manaʻoʻiʻo aku kākou i ka inoa o kāna Keiki ʻo Iesū Kristo, a e aloha kekahi i kekahi, e like me ke kauoha āna i hāʻawi mai ai iā kākou.

²⁴ ʻO ka mea e mālama aku ana i kāna mau kauoha, ua noho nō ia i loko ona; a ua noho mai nō hoʻi kēlā i loko ona. No laila hoʻi ke ʻike nei kākou, ke noho mai nei ʻo ia i loko o kākou, ma ka ʻUhane āna i hāʻawi mai ai no kākou.