ʻO KA ʻEPISETOLE HOʻOLAHA MUA A IOANE 2 - Ka Baibala Hemolele

1 No ke aloha i kekahi i kekahi.

MOKUNA II.

¹ ¶ E aʻu poʻe keiki aloha, ke palapala aku nei au i kēia mau mea iā ʻoukou, i ʻole ai ʻoukou e hana hewa; akā, inā e lawehala kekahi, aia nō ko kākou Mea nāna e ʻuao me ka Makua, ʻo Iesū Kristo ka Mea pono.

² ʻO ia nō ke kalahala no ko kākou hewa; ʻaʻole naʻe no ko kākou wale nō; akā, no ko ke ao nei a pau.

³ Eia ka mea e maopopo ai iā kākou ko kākou ʻike ʻana iā ia, inā e mālama aku ana kākou i kāna mau kauoha.

⁴ ʻO ka mea e ʻōlelo ana, “Ua ʻike nō au iā ia,” a mālama ʻole ʻo ia i kāna mau kauoha, he mea wahaheʻe ia, ʻaʻole he ʻoiaʻiʻo i loko ona.

⁵ Akā, ʻo ka mea e mālama ana i kāna ʻōlelo, ua hemolele ke aloha o ke Akua i loko ona. Ma ia mea e ʻike ai kākou, eia nō kākou i loko ona.

⁶ ʻO ka mea e ʻōlelo ana, ke noho nei ʻo ia i loko ona, he mea pono nona ke hele e like me ko ia ala hele ʻana.

⁷ ¶ E nā hoahānau, ʻaʻole he kānāwai hou kaʻu e palapala aku nei iā ʻoukou; akā, ʻo ke kānāwai kahiko ka mea i loaʻa iā ʻoukou mai kinohi mai; ʻo ke kānāwai kahiko, ʻo ia ka ʻōlelo a ʻoukou i lohe ai mai kinohi mai.

⁸ He kānāwai hou kekahi aʻu e palapala aku nei iā ʻoukou, he ʻoiaʻiʻo nō ia i loko ona, a i loko o ʻoukou nō hoʻi; no ka mea, ua hala akula ka pouli, ʻānō lā ua hiki mai nei ka mālamalama ʻoiaʻiʻo.

⁹ ʻO ka mea e ʻōlelo ana, ma ka mālamalama ia, a ua inaina aku ia, i kona hoahānau, aia nō ia i loko o ka pouli a hiki i kēia manawa.

¹⁰ ʻO ka mea e aloha aku ana i kona hoahānau, ke noho ʻiʻo nei nō ia i ka mālamalama, ʻaʻohe mea hoʻohihia i loko ona;

¹¹ akā, ʻo ka mea e inaina aku ana i kona hoahānau, aia nō ia ma loko o ka pouli, a ke hele nei nō ia ma ka pouli, ʻaʻole ia i ʻike i kona wahi e hele ai; no ka mea, ua paʻa kona mau maka i ka pouli.

¹² ¶ E nā pōkiʻi, ke palapala aku nei au iā ʻoukou; no ka mea, ua pau ko ʻoukou hewa i ke kala ʻia no kona inoa.

¹³ E nā mākua kāne, ke palapala aku nei au iā ʻoukou; no ka mea, ua ʻike aku ʻoukou iā ia mai kinohi mai. Ke palapala aku nei au iā ʻoukou, e nā kānaka uʻi; no ka mea, ua lanakila ʻoukou ma luna o ka hewa. E nā keiki, ke palapala aku nei au iā ʻoukou; no ka mea, ua ʻike ʻoukou i ka Makua.

¹⁴ Ua palapala aku au iā ʻoukou, e nā mākua kāne; no ka mea, ua ʻike ʻoukou iā ia mai kinohi mai. E nā kānaka uʻi, ua palapala aku au iā ʻoukou; no ka mea, ua ikaika nō ʻoukou, ke noho lā nō ka ʻōlelo a ke Akua i loko o ʻoukou, a ua lanakila nō hoʻi ʻoukou ma luna o ka hewa.

¹⁵ Mai makemake aku i ko ke ao nei, ʻaʻole hoʻi i nā mea o kēia ao. Inā e makemake aku ana kekahi i ko ke ao nei, ʻaʻole i loko ona ka makemake i ka Makua.

¹⁶ No ka mea, ʻo nā mea a pau ma ko kēia ao, ʻo ke kuko o ke kino, a me ke kuko o ka maka, a me ka hoʻohanohano o kēia ola ʻana, ʻaʻole ia no ka Makua mai; akā, no ke ao nei nō ia.

¹⁷ A ʻo ke ao nei, ke paneʻe aku nei a me nā kuko ona; akā, ʻo ka mea e hana ana i ko ke Akua makemake, e mau loa ana nō ia.

¹⁸ ¶ E nā kamaliʻi ʻuʻuku, eia ka hope o ka manawa. Me ko ʻoukou lohe ʻana i ka hiki ʻana mai o ʻAnikristo, pēlā nō e noho nei nā ʻanikristo he nui; no ia mea, ua ʻike nō kākou ʻo ka hope kēia o ka manawa.

¹⁹ Hele aku lākou mai o kākou aku; akā, ʻaʻole loa lākou no kākou; no ka mea, inā lākou no kākou, inā ua noho lākou me kākou; akā, hele lākou i maopopo ai, ʻaʻole lākou a pau no kākou.

²⁰ Ua poni ʻia ʻoukou e ka Mea Hemolele, a ua ʻike ʻoukou i nā mea a pau.

²¹ ʻAʻole au i palapala aku iā ʻoukou no ko ʻoukou ʻike ʻole ʻana i ka ʻoiaʻiʻo; akā, no ko ʻoukou ʻike ʻana, a no ia hoʻi, ʻaʻohe mea wahaheʻe no ka ʻoiaʻiʻo mai.

²² ʻO wai lā ka mea wahaheʻe ke ʻole ka mea e hōʻole ana, ʻaʻole ʻo Iesū ka Mesia? ʻO ka mea e hōʻole ana i ka Makua a me ke Keiki, ʻo ia nō ke ʻanikristo.

²³ ʻO nā mea a pau e hōʻole aku ana i ke Keiki, ʻaʻole no lākou ka Makua; akā, ʻo ka mea e hōʻoiaʻiʻo ana i ke Keiki, nona nō ka Makua.

²⁴ Ka mea a ʻoukou i lohe ai mai kinohi mai, e hoʻomau ia mea i loko o ʻoukou; inā e noho mau i loko o ʻoukou ka mea a ʻoukou i lohe ai, mai kinohi mai, a laila e noho ʻoukou i loko o ke Keiki a i loko o ka Makua.

²⁵ Eia ka ʻōlelo āna i ʻōlelo mua mai ai iā kākou: ʻo ke ola mau loa.

²⁶ Ua palapala aku au iā ʻoukou i kēia mau mea no ka poʻe e hoʻowalewale ana iā ʻoukou.

²⁷ Ke noho nei nō i loko o ʻoukou ka poni ʻia mai o ʻoukou e ia, ʻaʻole hoʻi a ʻoukou mea hemahema e aʻo aku ai kekahi iā ʻoukou; akā, me ia poni ʻana i aʻo mai ai iā ʻoukou i nā mea a pau, a ʻo ia ka mea ʻoiaʻiʻo, ʻaʻole wahaheʻe ia; e like me kāna aʻo ʻana mai iā ʻoukou, pēlā e noho aku ai ʻoukou i loko ona.

²⁸ ʻĀnō lā, e nā keiki aloha, e noho ʻoukou i loko ona; i wiwo ʻole ai kākou i kona wā e ʻikea mai ai, i ʻole ai kākou e hilahila i mua ona, i kona hele ʻana mai.

²⁹ Inā i ʻike ʻoukou, he pono ʻo ia, ke ʻike nei nō hoʻi ʻoukou, ua hoʻohānau ʻia mai e ia nā mea a pau e hana ana i ka pono.