ʻO KA ʻEPISETOLE MUA A PAULO KA LUNAʻŌLELO I KO KORINETO 5 - Ka Baibala Hemolele

1 No ka hoʻokaʻawale ʻana i ka hoahānau moekolohe.

MOKUNA V.

¹ ¶ Ua lohe ʻia ma nā wahi a pau he moekolohe i waena o ʻoukou, he moekolohe ʻike ʻole ʻia i waena o ko nā ʻāina ʻē, i lawe kekahi i ka wahine a kona makua kāne.

² Ua haʻanoʻu ʻoukou, ʻaʻole hoʻi i kanikau, i lawe ʻia aku ai ka mea i hana i kēia, mai o ʻoukou aku.

³ ʻOiaʻiʻo, ua mamao au ma ke kino; akā, aia nō naʻe ka ʻuhane me ʻoukou, a e like me ka mea e noho pū ana, ua hoʻohewa ʻē aku au i ka mea nāna i hana pēlā kēia hana.

⁴ Ma ka inoa o ko kākou Haku ʻo Iesū Kristo, i ka wā a ʻoukou e ʻākoakoa ai, ʻo koʻu ʻuhane pū kekahi, me ka mana o ko kākou Haku ʻo Iesū Kristo,

⁵ e hāʻawi i kēlā mea iā Sātana, i mea e hoʻopau ai i ke kino, i hoʻōla ʻia ai hoʻi ka ʻuhane, i ka lā o ka Haku ʻo Iesū.

⁶ ʻAʻole i maikaʻi ko ʻoukou kaena ʻana. ʻAʻole anei ʻoukou i ʻike, ʻo kahi mea hū ʻuʻuku, ke hoʻohū aʻela ia i ka pōpō palaoa a pau?

⁷ No ia mea, e kiola ʻoukou i waho i ua mea hū kahiko lā, i lilo ʻoukou i pōpō hou i hū ʻole ai ʻoukou. No ka mea, ua mōhai ʻia ʻo Kristo, ko kākou Mōliaola no kākou.

⁸ No ia mea, e mālama kākou i ka ʻahaʻaina, ʻaʻole naʻe me ka hū kahiko, ʻaʻole hoʻi me ka mea hū o ka hoʻomauhala, a me ka hewa; akā, me ka mea hū ʻole o ka manaʻo maikaʻi a me ka ʻoiaʻiʻo.

⁹ ¶ Ua palapala aku nō wau iā ʻoukou, ma kekahi palapala, mai hoʻolauna aku me ka poʻe moekolohe;

¹⁰ ʻaʻole naʻe me ka poʻe moekolohe o kēia ao, a me ka poʻe makeʻe a me ka poʻe ʻālunu, a me ka poʻe hoʻomana kiʻi; no ka mea, inā pēlā, inā ua pono iā ʻoukou ke hele ma waho o ke ao nei.

¹¹ Ke palapala aku nei au iā ʻoukou, inā i kapa ʻia aku kekahi, he hoahānau, a ua moekolohe ia, a ua makeʻe, a ua hoʻomana kiʻi, a ua ʻahiʻahi, a ua ʻona, ua ʻālunu; mai hoʻolauna aku ʻoukou, ʻaʻole hoʻi e ʻai pū me ka mea i hana pēlā.

¹² He aha hoʻi kaʻu e hoʻohewa ai i ka poʻe ma waho? ʻAʻole anei ʻoukou e hoʻohewa i ka poʻe ma loko?

¹³ Akā, ʻo ka poʻe ma waho, na ke Akua nō lākou e hoʻohewa mai. No ia mea, «e hoʻolei ʻoukou i kēlā mea hewa, mai o ʻoukou aku».