ʻO KA ʻEPISETOLE MUA A PAULO KA LUNAʻŌLELO I KO KORINETO 4 - Ka Baibala Hemolele

1 Ke ʻano o ka ʻoihana lunaʻōlelo.

MOKUNA IV.

¹ ¶ E pono i kānaka ke manaʻo mai iā mākou, he poʻe lawehana no Kristo, he poʻe puʻukū hoʻi no nā mea pohihihi o ke Akua.

² Eia hoʻi, ua kauoha ʻia mai nā puʻukū, i pololei lākou.

³ He mea liʻiliʻi loa iaʻu, ke ʻāhewa ʻia mai a ke ʻāpono ʻia mai au e ʻoukou, a me kānaka. He ʻoiaʻiʻo, ʻaʻole au i ʻāhewa, ʻaʻole hoʻi i ʻāpono iaʻu iho.

⁴ ʻAʻole au i ʻike pono i koʻu hewa, ʻaʻole naʻe au i ʻāpono ʻia mai i laila. Na ka Haku nō wau e hoʻokolokolo mai.

⁵ No ia mea, mai hoʻohewa ʻē i kekahi mea, a hiki mai ka Haku, nāna nō e hoʻomaopopo mai nā mea i hūnā ʻia o ka pouli, a e hōʻike mai hoʻi nā manaʻo o nā naʻau; a laila e loaʻa mai i kēlā kanaka a i kēia kanaka ka hoʻomaikaʻi ʻia, mai ke Akua mai.

⁶ ¶ E nā hoahānau, no ʻoukou nō ke hoʻopili nei au ia mau mea i oʻu nei, a me ʻApolo; i aʻo ʻia ʻoukou ma o māua nei ʻaʻole e hoʻokiʻekiʻe ka manaʻo ma luna o ka mea i palapala ʻia, i ʻole ʻoukou e kaena aku i kekahi ma luna o kekahi.

⁷ ʻO wai ka mea i hoʻopākela iā ʻoe? He aha hoʻi kāu mea i hāʻawi ʻole ʻia mai nāu? A inā i hāʻawi wale ʻia mai ia, no ke aha lā ʻoe e kaena ai ia, me he mea lā i hāʻawi ʻole ʻia mai?

⁸ ʻĀnō lā, ua māʻona ʻoukou, ʻānō lā, ua waiwai ʻoukou; ua noho aliʻi nō hoʻi ʻoukou a kaʻawale mākou; ua makemake nō naʻe au i noho aliʻi ʻiʻo ʻoukou, i noho aliʻi pū ai mākou me ʻoukou.

⁹ No ka mea, ke manaʻo nei au, ua hoʻolilo mai ke Akua iā mākou i nā lunaʻōlelo, i poʻe lalo loa, e like me nā mea i ʻāhewa ʻia e make. No ka mea, he poʻe mākou i hōʻike ʻia i ko ke ao nei, a i nā ʻānela, a i nā kānaka.

¹⁰ He poʻe naʻaupō mākou no Kristo, he poʻe naʻauao ʻoukou i loko o Kristo; ua nāwaliwali mākou, ua ikaika ʻoukou; ua mahalo ʻia mai ʻoukou, ua hoʻowahāwahā ʻia mai mākou.

¹¹ A hiki i kēia hora, ua pōloli mākou, ua make wai, ua ʻōlohelohe, ua hana ʻino ʻia mai, ua kuewa wale nō.

¹² Ke hoʻoikaika nei mākou i ka hana, me ko mākou lima; a ʻahiʻahi ʻia mai, hoʻomaikaʻi aku nō mākou; a hoʻomaʻau ʻia mai, ua hoʻomanawanui nō mākou;

¹³ a i ʻōlelo hōʻino ʻia mai, nonoi aku nō mākou; ua hoʻolilo ʻia mai mākou e like me ka ʻōpala o ke ao nei, a me ka pelapela o nā mea a pau, a hiki i kēia wā.

¹⁴ ¶ ʻAʻole au e palapala aku i kēia mau mea e hoʻohilahila iā ʻoukou; akā, ke aʻo aku nei au iā ʻoukou, e like me aʻu poʻe keiki aloha.

¹⁵ Inā paha he ʻumi tausani kumu a ʻoukou ma loko o Kristo, ʻaʻole hoʻi he nui nā mākua o ʻoukou; no ka mea, ma ka ʻeuanelio, ʻo wau nō ka mea nāna ʻoukou i hānau ai i loko o Kristo Iesū.

¹⁶ No laila ʻeā, ke nonoi aku nei au iā ʻoukou, e lilo ʻoukou i poʻe hoʻolike me aʻu.

¹⁷ No kēia mea, ua hoʻouna aku au iā Timoteo i o ʻoukou lā, ʻo ia hoʻi kaʻu keiki aloha, ua paʻa loa hoʻi ʻo ia ma ka Haku, nāna ʻoukou e paipai aku i nā ʻaoʻao oʻu ma o Kristo lā, e like me kaʻu aʻo ʻana aku i nā wahi a pau, i kēlā ʻekalesia i kēia ʻekalesia.

¹⁸ Ke haʻanoʻu mai nei kekahi poʻe me ka manaʻo iho, ʻaʻole au e hiki aku i o ʻoukou lā.

¹⁹ Akā, e hele koke aku nō au i o ʻoukou lā, ke ʻae mai ka Haku, a e ʻike auaneʻi au, ʻaʻole i ka ʻōlelo a ka poʻe i haʻanoʻu; akā, i ka ikaika ʻiʻo.

²⁰ No ka mea, ʻaʻole ma ka ʻōlelo ke aupuni o ke Akua, ma ka mana nō.

²¹ He aha ko ʻoukou makemake? E hele paha wau i o ʻoukou lā me ka lāʻau hahau, me ke aloha paha, a me ka manaʻo akahai?