ʻO KA ʻEPISETOLE MUA A PAULO KA LUNAʻŌLELO I KO KORINETO 3 - Ka Baibala Hemolele

1 No ke kūʻēʻē ʻana a me ka hoʻāʻo ʻia mai.

MOKUNA III.

¹ ¶ E nā hoahānau, ʻaʻole e hiki iaʻu ke ʻōlelo aku iā ʻoukou, me he poʻe ma ka ʻuhane lā; akā, me he poʻe ma ke kino, me he poʻe kamaliʻi lā i loko o Kristo.

² Ua hānai aku au iā ʻoukou i ka waiū, ʻaʻole i ka ʻai; no ka mea, ʻaʻole ʻoukou i hiki ma mua, ʻaʻole hoʻi e hiki i kēia wā.

³ Ma ko ke kino nō ʻoukou a hiki i kēia wā; no ka mea, i kā ʻoukou pāonioni ʻana, a me ka paio, a me ka mokuāhana, ʻaʻole anei ʻoukou ma ko ke kino, a hele hoʻi ma ko ke kanaka?

⁴ No ka mea, i ka ʻōlelo ʻana a kekahi, “No Paulo wau;” a ʻo kekahi, “No ʻApolo wau;” ʻaʻole anei ʻoukou ma ko ke kino?

⁵ He aha hoʻi ʻo Paulo, he aha ʻo ʻApolo, ʻaʻole anei ʻo lāua nā kumu i manaʻoʻiʻo aku ai ʻoukou, e like me ka hāʻawi ʻana mai o ka Haku no kēlā kanaka no kēia kanaka?

⁶ Naʻu nō i kanu, a na ʻApolo nō i hoʻokahe ka wai; akā, na ke Akua nō i hoʻoulu.

⁷ No laila, he mea ʻole ka mea nāna i kanu, he mea ʻole ka mea nāna i hoʻokahe ka wai; akā, he mea ʻiʻo ke Akua ka mea nāna i hoʻoulu.

⁸ ʻO ka mea nāna i kanu, a me ka mea nāna i hoʻokahe ka wai, hoʻokahi nō lāua; a e loaʻa nō i kēlā kanaka i kēia kanaka kona uku, e like me kāna hana ʻana.

⁹ No ka mea, he poʻe hoa hana mākou no ke Akua; ʻo ʻoukou nō ko ke Akua mahina ʻai; ʻo ʻoukou ko ke Akua hale.

¹⁰ ¶ Ma ka lokomaikaʻi o ke Akua i hāʻawi ʻia mai noʻu, e like me ka luna akamai i ka hana, ua hoʻonoho wau i ke kumu, a ke kūkulu nei kekahi mea ʻē ma luna iho. E ao hoʻi nā kānaka a pau i ko lākou kūkulu ʻana ma luna.

¹¹ No ka mea, ʻaʻole e hiki i ke kanaka ke hoʻonoho i kumu ʻē aʻe, ʻo ka mea i hoʻonoho ʻia wale nō; ʻo ia ʻo Iesū Kristo.

¹² Inā e kūkulu kekahi kanaka ma luna o kēia kumu, he gula paha, he kālā, he pōhaku maikaʻi, he lāʻau, he mauʻu, he ʻōpala;

¹³ e maopopo auaneʻi ka hana a kēlā mea kēia mea; e hoʻākāka mai ana nō kēlā lā; no ka mea, ma loko o ke ahi e hoʻomaopopo ʻia mai ai ia mea. Na ke ahi nō e hoʻāʻo ke ʻano o ka hana a nā kānaka a pau.

¹⁴ Inā e mau ka hana a kekahi i kūkulu ai ma luna iho, e loaʻa iā ia ka uku.

¹⁵ Inā e pau ka hana a kekahi i ke ahi, e nele nō ia; akā, e hoʻōla ʻia mai nō naʻe ʻo ia, e like me ka mea mai waena mai o ke ahi.

¹⁶ ¶ ʻAʻole anei ʻoukou i ʻike, ʻo ʻoukou nō ka luakini o ke Akua, a ua noho ka ʻUhane o ke Akua i loko o ʻoukou?

¹⁷ Inā e hōʻino mai kekahi i ka luakini o ke Akua, e hōʻino mai nō ke Akua iā ia; no ka mea, ua laʻa ka luakini o ke Akua; ʻo ia hoʻi ʻoukou.

¹⁸ ¶ Mai hoʻopunipuni kekahi iā ia iho. Inā i manaʻo ʻia kekahi o ʻoukou, ua naʻauao ma nā mea o kēia ao, he pono nō e lilo ia i naʻaupō, i naʻauao ʻiʻo ai ʻo ia.

¹⁹ No ka mea, ʻo ko ke ao nei naʻauao, he naʻaupō ia i ke Akua. Penei ka palapala ʻana, “«Ua paʻa iā ia ka poʻe akamai ma loko o ko lākou maʻalea iho»”;

²⁰ a penei hoʻi, “«Ua ʻike nō ka Haku i ka manaʻo» o ka poʻe akamai, «he lapuwale».”

²¹ No laila, mai kaena kekahi i nā kānaka; no ka mea, no ʻoukou nō nā mea a pau;

²² inā ʻo Paulo, inā ʻo ʻApolo, inā ʻo Kepa, inā ʻo ko ke ao nei, inā ʻo ke ola, inā ʻo ka make, inā ʻo nā mea o nēia wā, inā ʻo nā mea e hiki mai ana; no ʻoukou nō nā mea a pau loa;

²³ a na Kristo ʻoukou, a na ke Akua ʻo Kristo.