ʻO KA ʻEPISETOLE MUA A PAULO KA LUNAʻŌLELO I KO KORINETO 2 - Ka Baibala Hemolele

1 No ka naʻaupō o ka poʻe ma ke kino.

MOKUNA II.

¹ ¶ E nā hoahānau, i koʻu hele ʻana aku i o ʻoukou lā, e haʻi aku i ka ʻōlelo a ke Akua, ʻaʻole au i hele aku me ka hoʻohanohano ʻōlelo, a me ka hoʻākamai.

² No ka mea, ua paʻa koʻu ʻaʻole e hōʻike i kekahi mea ʻē aʻe i waena o ʻoukou, iā Iesū Kristo wale nō, a me kona make ʻana ma ke keʻa.

³ Ua noho pū nō wau me ʻoukou, me ka nāwaliwali, a me ka makaʻu, a me ka haʻalulu nui.

⁴ A ʻo kaʻu ʻōlelo, a me kaʻu aʻo ʻana aku, ʻaʻole ia ma ka ʻōlelo maʻalea a ko ke kanaka akamai; akā, ma ka ʻōlelo hoʻākāka a ka ʻUhane, a me ka mana;

⁵ i paʻa ko ʻoukou manaʻoʻiʻo, ma ka mana o ke Akua, ʻaʻole ma ke akamai o kānaka.

⁶ ¶ He akamai nō hoʻi kā mākou e ʻōlelo nei i ka poʻe i oʻo; ʻaʻole naʻe ʻo ia ke akamai o ko kēia ao, ʻaʻole hoʻi o nā aliʻi o kēia ao, ʻo nā mea e pau wale ana;

⁷ akā, ke haʻi aku nei mākou i ke akamai o ke Akua, i ka mea huna i ʻike ʻole ʻia, a ke Akua i hoʻopaʻa ai ma mua o ka hoʻokumu ʻana mai o ke ao nei, i mea e nani ai kākou.

⁸ ʻAʻole i ʻike kekahi aliʻi o kēia ao ia mea; no ka mea, inā ua ʻike lākou, inā ʻaʻole lākou i kau ma ke keʻa i ka Haku nona ka nani.

⁹ Ua like hoʻi me ka mea i palapala ʻia, “«ʻAʻole i ʻike ka maka, ʻaʻole i lohe ka pepeiao, ʻAʻole hoʻi i komo i loko o ka naʻau o kānaka, Nā mea a ke Akua i hoʻomākaukau ai no ka poʻe i aloha aku iā ia».”

¹⁰ Ua hōʻike mai nō hoʻi ke Akua ia mau mea iā mākou, ma kona ʻUhane; no ka mea, ke nānā pono nei ka ʻUhane i nā mea a pau, i nā mea hohonu hoʻi a ke Akua.

¹¹ ʻO wai ke kanaka ʻike i nā mea o ke kanaka? ʻO ka ʻuhane o ke kanaka wale nō, ʻo ka mea i loko ona; pēlā nō ʻaʻole i ʻike ke kanaka i nā mea o ke Akua, ʻo ka ʻUhane o ke Akua wale nō.

¹² Ua loaʻa hoʻi iā mākou ka ʻUhane, na ke Akua mai, ʻaʻole ka manaʻo o ko ke ao nei; i mea e ʻike ai mākou i nā mea i hāʻawi wale ʻia mai na mākou e ke Akua.

¹³ ʻO ia hoʻi kā mākou e haʻi aku nei, ʻaʻole ma ka ʻōlelo a ko ke kanaka akamai i aʻo mai ai; akā, ma kā ka ʻUhane Hemolele i aʻo mai ai, me ka hoʻākāka ʻana i ko ka ʻuhane ma nā mea o ka ʻuhane.

¹⁴ Akā, ʻo ke kanaka ma ke kino, ʻaʻole e loaʻa iā ia nā mea o ka ʻUhane o ke Akua; no ka mea, ua lapuwale ia mau mea iā ia, ʻaʻole hoʻi e hiki iā ia ke hoʻomaopopo aku; no ka mea, ma ka ʻuhane wale nō e ʻike ʻia ai lākou.

¹⁵ ʻO ka mea hoʻi ma ka ʻuhane, ua ʻike nō ia i nā mea a pau, ʻaʻole hoʻi ʻo ia i ʻike maopopo ʻia e kekahi.

¹⁶ «ʻO wai ka mea i ʻike i ka manaʻo o ka Haku? ʻO wai hoʻi ka mea e aʻo aku iā ia»? Akā, ua loaʻa iā mākou ka manaʻo o Kristo.