ʻO KA ʻEPISETOLE MUA A PAULO KA LUNAʻŌLELO I KO KORINETO 16 - Ka Baibala Hemolele

1 No ka manawaleʻa ʻana, a no Timoteo. 13 ʻŌlelo hoʻoikaika a aloha nō hoʻi.

MOKUNA XVI.

¹ ¶ Ma ka manawaleʻa ʻana no ka poʻe hoʻāno, e like me kaʻu i kauoha aku ai i nā ʻekalesia ma Galatia, pēlā nō ʻoukou e hana ai.

² I ka lā mua o ka hebedoma, e hoʻāna ʻē kēlā mea kēia mea o ʻoukou i kāna iho, e like me kona hoʻopōmaikaʻi ʻia mai, i hōʻiliʻili ʻole ai ʻoukou i koʻu wā e hiki aku ai.

³ A hiki aku au, a laila, ʻo nā mea a ʻoukou e manaʻo ai ma ka palapala, naʻu nō lākou e hoʻouna aku, e lawe i ko ʻoukou manawaleʻa i Ierusalema.

⁴ A inā he pono ke hele au, e hele pū lākou me aʻu.

⁵ I koʻu wā e hele aku ai ma waena o Makedonia, e hele nō wau i o ʻoukou lā; no ka mea, e hele ana au ma Makedonia.

⁶ A e noho paha, a pau ka hoʻoilo me ʻoukou, a na ʻoukou wau e kaʻi aku i koʻu wahi e hele ai.

⁷ No ka mea, ʻaʻole au e ʻike aku iā ʻoukou i kēia hele ʻana; ke manaʻo nei nō naʻe au e noho iki me ʻoukou, inā e ʻae mai ka Haku pēlā.

⁸ E noho nō au ma ʻEpeso, a hiki i ka Penetekota.

⁹ No ka mea, ua wehe ʻia mai noʻu, he puka nui, a ua hāmama loa, a ua nui nō hoʻi ka poʻe ʻenemi.

¹⁰ ¶ Inā e hiki aku ʻo Timoteo, e mālama ʻoukou, i noho pū ia me ʻoukou, me ka makaʻu ʻole; no ka mea, ke hana nei ia i ka hana a ka Haku e like me aʻu nei.

¹¹ Mai hoʻowahāwahā kekahi iā ia; e alakaʻi mai iā ia me ka maluhia i hiki i oʻu nei; no ka mea, e kakali nō au iā ia, me nā hoahānau.

¹² A ʻo ʻApolo hoʻi ka hoahānau, ua makemake nui au e hele aku ia i o ʻoukou lā, me nā hoahānau; ʻaʻole naʻe ia ʻo kona manaʻo ke hele aku i o ʻoukou lā, i kēia wā; akā, e hele aku nō ke loaʻa iā ia ka wā pono.

¹³ ¶ E makaʻala ʻoukou, e kūpaʻa ma ka manaʻoʻiʻo, e hoʻokanaka, e ikaika hoʻi.

¹⁴ E hana ʻia ko ʻoukou mea a pau me ke aloha.

¹⁵ ¶ Ke nonoi aku nei au iā ʻoukou, e nā hoahānau, (no ko ʻoukou ʻike ʻana i nā ʻōhua o Setepana, ʻo ia ka hua mua ma ʻAkaia, a ua hoʻolilo lākou iā lākou iho i poʻe hoʻokauā aku na ka poʻe hoʻāno);

¹⁶ e mālama ʻoukou i ka poʻe like me ia, a me ka poʻe a pau i kōkua pū, a i hana pū hoʻi me mākou.

¹⁷ Ua ʻoliʻoli au i ka hiki ʻana o Setepana, a me Foretunato, a me ʻAkaiko; no ka mea, ua pani lākou i ko ʻoukou hakahaka.

¹⁸ Ua hoʻomaha mai lākou i koʻu naʻau a me ko ʻoukou; no laila, e ʻike mai ʻoukou i ka poʻe hana pēlā.

¹⁹ ¶ Ke aloha aku nei nā ʻekalesia ma ʻĀsia iā ʻoukou. Ke aloha nui aku nei ʻo ʻAkula a me Perisekila iā ʻoukou ma loko o ka Haku, a me ka ʻekalesia i loko o ko lāua hale.

²⁰ Ke aloha aku nei nā hoahānau a pau iā ʻoukou. E aloha ʻoukou kekahi i kekahi, me ka honi hemolele.

²¹ ¶ Eia ke aloha o Paulo, me koʻu lima iho.

²² Inā ʻaʻole e aloha kekahi i ka Haku iā Iesū Kristo, e hoʻomāinoino ʻia ʻo ia, i ka wā e hiki mai ai ka Haku.

²³ Me ʻoukou nō ke aloha o ka Haku ʻo Iesū Kristo.

²⁴ ʻO ke aloha oʻu me ʻoukou a pau i loko o Iesū Kristo. ʻĀmene.