ʻO KA ʻEPISETOLE MUA A PAULO KA LUNAʻŌLELO I KO KORINETO 15 - Ka Baibala Hemolele

1 No ke ala hou ʻana o Kristo a me nā kānaka a pau loa.

MOKUNA XV.

¹ ¶ Ke haʻi hou aku nei au iā ʻoukou, e nā hoahānau, i ka ʻeuanelio aʻu i aʻo aku ai iā ʻoukou ma mua, i ka mea a ʻoukou i mālama mai ai, a ma laila nō hoʻi ʻoukou e kū nei.

² ʻO ia hoʻi ko ʻoukou mea e ola ai, ke manaʻo mau ʻoukou i nā mea aʻu i haʻi aku ai iā ʻoukou, ke ʻole hoʻi i makehewa ko ʻoukou manaʻoʻiʻo.

³ No ka mea, hāʻawi mua aku au iā ʻoukou i ka mea aʻu i loaʻa mai, i ka make ʻana o Kristo no ko kākou hewa, e like me kā ka Palapala Hemolele;

⁴ a kanu ʻia ʻo ia, a i ka pō ʻekolu, ala hou mai ʻo ia, e like me kā ka Palapala Hemolele;

⁵ a ʻike ʻia ʻo ia e Kepa, a laila, e ka poʻe ʻumikumamālua.

⁶ A ma hope iho, ʻike ʻia ʻo ia e nā hoahānau ʻelima haneri a keu, i ka wā hoʻokahi. A ke ola lā nō ka nui o lākou i kēia manawa, a ʻo kekahi poʻe, ua moe.

⁷ A ma hope iho, ʻike ʻia ʻo ia e Iakobo, a laila e ka poʻe lunaʻōlelo a pau.

⁸ ʻO wau nō kai ʻike hope loa aku iā ia, me he keiki hānau hapa lā.

⁹ No ka mea, wau nō ka mea liʻiliʻi loa o ka poʻe lunaʻōlelo. ʻAʻole hoʻi e pono ke kapa ʻia mai au, he lunaʻōlelo; no ka mea, ua hoʻomāinoino aku au i ka ʻekalesia o ke Akua.

¹⁰ Akā, ua lilo wau i koʻu mea i lilo ai, ma ka lokomaikaʻi wale o ke Akua; ʻaʻole hoʻi i makehewa kona lokomaikaʻi mai ma luna oʻu; no ka mea, ua pākela aku koʻu hoʻoikaika ʻana ma mua o lākou a pau. ʻAʻole hoʻi wau, ʻo ka lokomaikaʻi nō o ke Akua i loko oʻu.

¹¹ A inā ʻo wau paha, ʻo lākou paha, pēlā nō mākou e aʻo aku nei, a pēlā nō hoʻi ʻoukou i manaʻoʻiʻo mai ai.

¹² ¶ A inā i haʻi ʻia ʻo Kristo, i hoʻāla ʻia ʻo ia, mai ka make mai, pehea lā e ʻōlelo nei kekahi poʻe o ʻoukou, ʻAʻohe ala ʻana, mai ka make mai?

¹³ Inā ʻaʻohe ala ʻana, mai ka make mai, inā ʻaʻole i ala ʻo Kristo;

¹⁴ a inā ʻaʻole i ala ʻo Kristo, inā ua makehewa kā mākou aʻo ʻana aku, a ua makehewa hoʻi kā ʻoukou manaʻoʻiʻo ʻana mai.

¹⁵ A inā ua loaʻa hoʻi mākou, he poʻe hōʻike wahaheʻe i ke Akua; no ka mea, ua hōʻike mākou ma o ke Akua lā, i kona hoʻāla ʻana mai iā Kristo; ʻaʻole hoʻi ia i hoʻāla mai iā ia, ke ala ʻole ka poʻe make.

¹⁶ No ka mea, inā ʻaʻole ala ka poʻe make, inā ʻaʻole i hoʻāla ʻia ʻo Kristo.

¹⁷ A inā ʻaʻole i hoʻāla ʻia ʻo Kristo, ua makehewa ko ʻoukou manaʻoʻiʻo ʻana; a ke noho nei nō hoʻi ʻoukou i loko o ko ʻoukou hewa.

¹⁸ A laila, ua make ka poʻe i moe i loko o Kristo.

¹⁹ Inā ma kēia ola ʻana wale nō ka lana ʻana o ko kākou manaʻo i loko o Kristo, ua ʻoi aku kā kākou pōʻino i ko nā kānaka a pau.

²⁰ ¶ Akā, ua ala ʻiʻo nō ʻo Kristo, mai ka make mai, a ua lilo ʻo ia i hua mua o ka poʻe i moe.

²¹ No ka mea, mai ke kanaka mai ka make, a pēlā nō, mai ke kanaka mai ke ala hou ʻana, mai ka make mai.

²² E like me ka make ʻana o nā kānaka a pau ma o ʻAdamu lā, pēlā nō e hoʻōla ʻia mai ai nā kānaka a pau ma o Kristo lā.

²³ ʻO kēlā mea kēia mea, ma kona wā pono; ʻo Kristo ka hua mua; a laila, ʻo ko Kristo poʻe, i kona wā e hiki mai ai.

²⁴ ʻO ia hoʻi ka hope, i ka wā e hoʻihoʻi ia i ke aupuni i ke Akua, i ka Makua; i kona wā e hoʻopau ai i nā ʻoihana aliʻi, a me ka ikaika, a me ka mana.

²⁵ No ka mea, iā ia nō ke aupuni, a hiki i ka wā e waiho ai ia i nā ʻenemi a pau ma lalo iho o kona mau wāwae.

²⁶ A ʻo ka ʻenemi hope loa, ʻo ka make, e hoʻopau ʻia nō ia.

²⁷ No ka mea, «ua waiho nō ia i nā mea a pau ma lalo iho o kona mau wāwae». A i kāna ʻōlelo ʻana, “Ua pau nā mea i ka waiho ʻia ma lalo iho ona,” ua maopopo nō he ʻokoʻa ka Mea nāna i waiho mai nā mea a pau ma lalo iho ona.

²⁸ A i ka wā e lilo ai nā mea a pau ma lalo iho ona, a laila, ʻo ke Keiki hoʻi kekahi, e mālama aku nō ia i ka Mea, nāna i hoʻolilo mai nā mea a pau ma lalo iho ona, i mau loa ka maopopo ʻana, ʻo ke Akua wale nō.

²⁹ ¶ A i ʻole loa e ala mai ka poʻe make, pehea lā e hana ai ka poʻe i bapetizo ʻia ai no ka poʻe make? No ke aha lā i bapetizo ʻia ai lākou no ka poʻe make?

³⁰ A no ke aha lā mākou e ʻaneʻane pōpilikia, i kēlā hora i kēia hora?

³¹ He ʻoiaʻiʻo, ma kuʻu ʻoliʻoli ʻana no ʻoukou i loko o Kristo Iesū, ko kākou Haku, ua make au i kēlā lā i kēia lā.

³² He aha koʻu pono e loaʻa mai, i koʻu hakakā ʻana ma ko ke kanaka, me nā ʻīlio hae ma ʻEpeso, ke ala ʻole mai ka poʻe make? «E ʻai kākou, a e inu; no ka mea, ʻapōpō e make ana kākou».

³³ E ao o hoʻopunipuni ʻia ʻoukou; “ʻO ka launa aku i ka hewa, ka mea e ʻino ai ka noho pono ʻana.”

³⁴ E ala ʻoukou i ka pono, mai hana hewa; no ka mea, ua naʻaupō kekahi poʻe i kā ke Akua. Ke ʻōlelo aku nei au i kēia, i mea e hilahila ai ʻoukou.

³⁵ ¶ E nīnau mai auaneʻi kekahi, “Pehea lā e hoʻāla ʻia mai ai ka poʻe make? E hele mai lākou me ke kino hea?”

³⁶ Kē, he lapuwale; ʻaʻole e hoʻūlu ʻia ka mua āu e lūlū nei, ke make ʻole ia.

³⁷ ʻO ka mea āu e lūlū nei, ʻaʻole ʻoe i lūlū i ke kino e hiki mai ana, ʻo ka hua wale nō, ʻo ka huita paha, he mea ʻē paha.

³⁸ A na ke Akua nō e hāʻawi mai i ke kino no ia mea, e like me kona makemake iho; no kēlā hua kēia hua i kona kino iho.

³⁹ ʻO nā ʻiʻo a pau, ʻaʻole ia he ʻiʻo hoʻokahi. He ʻiʻo kanaka kahi, a he ʻiʻo holoholona kahi, a ʻo ko ka iʻa kahi, a he ʻiʻo manu kahi.

⁴⁰ He kino ʻano lani kahi, a he kino ʻano honua kahi; ʻokoʻa hoʻi ka nani o ke kino lani ʻokoʻa ka nani o ko ka honua.

⁴¹ ʻOkoʻa ka nani o ka lā, ʻokoʻa ka nani o ka mahina, ʻokoʻa ka nani o nā hōkū; no ka mea, ua ʻoi ka nani o kekahi hōkū i kekahi hōkū.

⁴² Pēlā nō ke ala ʻana mai o ka poʻe make. Ua kanu ʻia ʻo ia ma ka palahō, ua hoʻāla ʻia mai ʻo ia ma ka palahō ʻole.

⁴³ Ua kanu ʻia ʻo ia ma ka hōʻino ʻia, ua hoʻāla ʻia mai ʻo ia ma ka nani; ua kanu ʻia ʻo ia ma ka nāwaliwali, ua hoʻāla ʻia mai ʻo ia ma ka mana.

⁴⁴ Ua kanu ʻia ʻo ia, he kino maoli, ua hoʻāla ʻia mai ʻo ia, he kino ʻuhane. He kino maoli kekahi kino, a he kino ʻuhane kekahi.

⁴⁵ Pēlā hoʻi ka palapala ʻana mai, “ʻO ke «kanaka» mua, ʻo ʻAdamu, «ua hana ʻia ʻo ia, he kanaka ola»;” a ʻo ʻAdamu hope, he ʻuhane hoʻōla ia.

⁴⁶ Akā hoʻi, ʻo ka mea ma ka ʻuhane, ʻaʻole ʻo ia ka mua, ʻo ka mea nō ma ke kino; a ma hope ka mea ma ka ʻuhane.

⁴⁷ ʻO ke kanaka mua, no ka lepo ia, a he lepo. A ʻo ke Kanaka hope, ʻo ia ka Haku, mai ka lani mai.

⁴⁸ E like me ka lepo, pēlā nō ka poʻe mai ka lepo mai; e like hoʻi me ka lani, pēlā nō ka poʻe mai ka lani mai.

⁴⁹ A e like me ko kākou lawe ʻana i ke ʻano o ko ka lepo, pēlā nō kākou e lawe ai i ke ʻano o ko ka lani.

⁵⁰ ¶ Ke ʻōlelo nei au i kēia, e nā hoahānau, ʻaʻole e hiki i ka ʻiʻo a me ke koko ke noho aku ma ke aupuni o ke Akua; ʻaʻole hoʻi ka palahō ma kahi palahō ʻole.

⁵¹ Eia hoʻi, ke haʻi aku nei au iā ʻoukou i ka mea pohihihi. ʻAʻole kākou a pau e moe, e ʻano hou ʻia mai nō kākou,

⁵² ma ke sekona, ma ka ʻamo ʻana nō o ka maka, i ke kani ʻana o ka pū; no ka mea, e kani ʻiʻo nō ka pū, a e hoʻāla palahō ʻole ʻia mai ka poʻe make, a e ʻano hou ʻia mai kākou a pau.

⁵³ No ka mea, e hoʻokomo kēia palahō i ka palahō ʻole, a me kēia make i ka make ʻole i pono ai.

⁵⁴ A i ka wā e hoʻokomo ai kēia palahō i ka palahō ʻole, a me kēia make i ka make ʻole; a laila, e kō ai ka ʻōlelo i kākau ʻia, “«Ua ale ʻia ka make» e ka lanakila.

⁵⁵ “«E ka make, ʻauhea kou huelo ʻawa? e ka luapō, ʻauhea kou lanakila ʻana»?”

⁵⁶ Eia ka huelo ʻawa o ka make, ʻo ka hewa; a eia ka mea e nui ai ka hewa, ʻo ke kānāwai.

⁵⁷ E hoʻomaikaʻi ʻia hoʻi ke Akua, ka Mea nāna i hāʻawi mai iā kākou ka lanakila, ma ko kākou Haku, ma o Iesū Kristo lā.

⁵⁸ No ia mea, e nā hoahānau, e kūpaʻa ʻoukou, me ka nāueue ʻole, me ka hoʻomau i kā ʻoukou hana nui ʻana i ka hana a ka Haku; no ka mea, ua ʻike nō ʻoukou, ʻaʻole i makehewa kā ʻoukou hana ʻana ma ka Haku.