ʻO KA ʻEPISETOLE MUA A PAULO KA LUNAʻŌLELO I KO KORINETO 13 - Ka Baibala Hemolele

1 No ka manaʻoʻiʻo, a me ka manaʻolana, a me ke aloha.

MOKUNA XIII.

¹ ¶ Inā i ʻōlelo au i ka ʻōlelo a nā kānaka a me nā ʻānela, a i loaʻa ʻole ke aloha, ua like au me ke keleawe kanikani a me ke kimebala walaʻau.

² A inā iaʻu ka wānana, a inā i ʻike au i nā mea pohihihi a pau, a me nā mea a pau e naʻauao ai; a inā iaʻu ka manaʻoʻiʻo e hiki ai ke hoʻoneʻe i nā kuahiwi, a i loaʻa ʻole hoʻi ke aloha, he mea ʻole wau.

³ A inā e manawaleʻa aku au i koʻu waiwai a pau, a hāʻawi hoʻi i koʻu kino i ke ahi, a i loaʻa ʻole iaʻu ke aloha, ʻaʻole oʻu mea e pono ai i laila.

⁴ ʻO ke aloha, ua hoʻomanawanui, a ua lokomaikaʻi; ʻaʻole pāonioni aku ke aloha; ʻaʻole haʻanui ke aloha, ʻaʻole haʻakei,

⁵ ʻaʻole hoʻi e hoʻohiehie, ʻaʻole ʻimi i kona mea iho, ʻaʻole hikiwawe ka huhū, ʻaʻole noʻonoʻo ʻino;

⁶ ʻaʻole i hauʻoli i ka hewa; akā, ua hauʻoli i ka pono.

⁷ Ua ahonui i nā mea a pau, ua manaʻo ʻoiaʻiʻo i nā mea a pau, ua manaʻolana i nā mea a pau, ua hoʻomanawanui i nā mea a pau.

⁸ He mea pau ʻole ke aloha. Inā he wānana, e pau ia; inā he ʻōlelo ʻē, e pau ia; inā he akamai, e hoʻopau ʻia hoʻi ʻo ia.

⁹ No ka mea, ua ʻike pohihihi kākou, a ua wānana pohihihi aku.

¹⁰ Akā, i ka wā e hiki mai ai ka mea hemolele, a laila, e pau ka mea pohihihi i ka lilo ʻia.

¹¹ I koʻu wā kamaliʻi, ʻōlelo wau e like me ke kamaliʻi, a ʻike au e like me ke kamaliʻi, a manaʻo wau e like me ke kamaliʻi; akā, i koʻu wā i lilo ai i kanaka makua, a laila, haʻalele au i nā mea o kamaliʻi.

¹² I kēia wā, ke ʻike pōwehiwehi nei kākou, me he aniani lā; i kēlā wā aku, he maka nō, he maka. I kēia wā, ua ʻike pōwehiwehi au; akā, i kēlā wā aku, e ʻike maoli aku au, e like me kaʻu i ʻike ʻia mai ai.

¹³ Ke mau nei kēia mau mea ʻekolu, ʻo ka manaʻoʻiʻo, ʻo ka manaʻolana, a me ke aloha. ʻO ke aloha naʻe kai ʻoi o kēia mau mea.