ʻO KA ʻEPISETOLE MUA A PAULO KA LUNAʻŌLELO I KO KORINETO 12 - Ka Baibala Hemolele

1 No ka nui o nā ʻoihana o ke Akua. ʻO ko Kristo poʻe, hoʻokahi nō kino lākou.

MOKUNA XII.

¹ ¶ E nā hoahānau ē, ʻaʻole oʻu makemake e naʻaupō ʻoukou ma nā mea o ka ʻuhane.

² Ua ʻike nō hoʻi ʻoukou, he lāhui kanaka ʻē ʻoukou, i hoʻolilo ʻia ma muli o nā kiʻi leo ʻole, ma kahi a ʻoukou i kaʻi ʻia aku ai.

³ No ia mea, ke hōʻike aku nei au iā ʻoukou, ʻaʻole he kanaka hoʻohiki ʻino iā Iesū, ke ʻōlelo ʻo ia ma ka ʻUhane o ke Akua. ʻAʻole he kanaka e hiki iā ia ke ʻōlelo aku iā Iesū, he Haku, ke ʻōlelo ʻole ʻia ma ka ʻUhane Hemolele.

⁴ ¶ Ua nui nō ke ʻano o nā haʻawina; akā, hoʻokahi nō ʻUhane.

⁵ Ua nui nō ke ʻano o nā ʻoihana; akā, hoʻokahi nō Haku.

⁶ Ua nui nō ke ʻano o nā hana mana; akā, hoʻokahi nō Akua nāna i hana nā mea a pau.

⁷ Ua hāʻawi ʻia mai i kēlā kanaka i kēia kanaka nā ʻoihana a ka ʻUhane i mea e pono ai.

⁸ No ka mea, ua hāʻawi ʻia mai i kekahi e ka ʻUhane, ka ʻōlelo akamai; a i kekahi ka ʻōlelo hoʻonaʻauao, na ka ʻUhane hoʻokahi nō;

⁹ a i kekahi, ka manaʻoʻiʻo, na ka ʻUhane hoʻokahi nō; a i kekahi, ka ʻoihana hoʻōla, na ka ʻUhane hoʻokahi nō;

¹⁰ a i kekahi, ka hana i nā hana mana; a i kekahi, ka wānana; a i kekahi, ka ʻike maopopo i nā ʻuhane; a i kekahi, ka ʻōlelo i nā ʻōlelo ʻē; a i kekahi ka hoʻomaopopo i nā ʻōlelo ʻē.

¹¹ Na kēlā ʻUhane hoʻokahi i hana ia mau mea a pau, e hāʻawi aku ana i kēlā kanaka i kēia kanaka, e like me kona makemake.

¹² ¶ E like me ke kino, hoʻokahi nō ia, a he nui kona mau lālā, a ʻo nā lālā a pau he nui, no ke kino hoʻokahi, hoʻokahi nō kino lākou: pēlā nō ʻo Kristo.

¹³ Na ka ʻUhane hoʻokahi kākou a pau, i bapetizo ʻia mai i loko o ke kino hoʻokahi, ʻo nā Iudaio, a me nā Helene, ʻo ka poʻe i hoʻopaʻa ʻia, a me ka poʻe paʻa ʻole; ua hoʻoinu ʻia mai kākou a pau i loko o ka ʻUhane hoʻokahi.

¹⁴ ʻO ke kino, ʻaʻole ia he lālā hoʻokahi, he nui nō.

¹⁵ Inā paha e ʻōlelo ka wāwae, “ʻAʻole au he lima, no laila, ʻaʻole no ke kino wau;” no ia mea, ʻaʻole anei ia no ke kino?

¹⁶ A inā paha e ʻōlelo ka pepeiao, “ʻAʻole au he maka, no laila, ʻaʻole no ke kino wau;” no ia mea, ʻaʻole anei ia no ke kino?

¹⁷ Inā he maka wale nō ke kino a pau, a laila, ma hea lā ka lohe? A inā he lohe wale nō, a laila, ma hea lā ka honi ʻana?

¹⁸ Ua hoʻonoho mai ke Akua i nā lālā a pau i loko o ke kino e like me kona makemake iho.

¹⁹ A inā paha hoʻokahi wale nō lālā o lākou a pau, a laila, ma hea lā ke kino?

²⁰ ʻĀnō lā, he nui nō nā lālā; akā, hoʻokahi nō kino.

²¹ ʻAʻole hoʻi e hiki i ka maka, ke ʻōlelo i ka lima, “ʻAʻole oʻu hemahema ke lilo ʻoe”; ʻaʻole hoʻi pēlā ke poʻo i ka wāwae, “ʻAʻole oʻu hemahema ke lilo ʻoe.”

²² Akā, he ʻoiaʻiʻo nō, ʻo nā lālā o ke kino i manaʻo ʻia, he hemahema, he mau mea ia e pono ai.

²³ A ʻo nā mea hoʻi o ke kino i mahalo ʻole ʻia e kākou, ke kāhiko nui nei kākou ia mau mea, a ua nui aku ka maikaʻi o ko kākou lālā ʻino.

²⁴ No ka mea, ʻaʻole i hemahema ko kākou lālā maikaʻi; akā, ua hui pū mai ke Akua i nā mea o ke kino, a ua hāʻawi mai hoʻi i ka mahalo nui ʻia i nā lālā i hemahema;

²⁵ i ʻole ai e kūʻē nā mea o ke kino, i mālama like hoʻi nā lālā kekahi i kekahi.

²⁶ A inā pōʻino kekahi lālā, ua pōʻino pū nō nā lālā a pau; a inā i hoʻomaikaʻi ʻia kekahi lālā, ua ʻoliʻoli pū nā lālā a pau.

²⁷ ʻO ʻoukou nō ke kino o Kristo a pākahi nā lālā.

²⁸ A ua hoʻonoho mai ke Akua i nā mea ma loko o ka ʻekalesia, ʻo ka mua, ʻo nā lunaʻōlelo; ʻo ka lua, ʻo nā kāula; ʻo ke kolu, ʻo nā kumu; a ma hope, nā mea hana mana; a laila, ka ʻoihana hoʻōla, a me nā mea kōkua, a me nā luna, a me ka ʻōlelo i nā ʻōlelo ʻē.

²⁹ He poʻe lunaʻōlelo anei nā mea a pau? He poʻe kāula anei nā mea a pau? He poʻe kumu anei nā mea a pau? He poʻe hana mana anei nā mea a pau?

³⁰ Ua loaʻa anei i nā mea a pau ka ʻoihana hoʻōla? He poʻe ʻōlelo i nā ʻōlelo ʻē nā mea a pau? He poʻe hōʻike ʻano anei nā mea a pau?

³¹ E ʻimi ʻoukou i nā ʻoihana i ʻoi; akā, naʻu nō e kuhikuhi aku iā ʻoukou i ka ʻaoʻao maikaʻi loa.