ʻO KA ʻEPISETOLE MUA A PAULO KA LUNAʻŌLELO I KO KORINETO 11 - Ka Baibala Hemolele

1 No ka uhi ʻana i ke poʻo i ka wā pule. 20 Ka ʻahaʻaina a ka Haku.

MOKUNA XI.

¹ ¶ E hahai mai ʻoukou iaʻu, e like me aʻu iā Kristo.

² ¶ E nā hoahānau, ke hoʻomaikaʻi aku nei au iā ʻoukou i ko ʻoukou hoʻomanaʻo ʻana mai iaʻu ma nā mea a pau, a me ko ʻoukou mālama ʻana i nā ʻoihana, e like me koʻu hāʻawi ʻana aku iā ʻoukou.

³ Ke makemake nei au e ʻike ʻoukou, ʻo Kristo nō ke poʻo o nā kānaka a pau; a ʻo ke kāne, ʻo ia ke poʻo o ka wahine; a ʻo ke Akua hoʻi, ʻo ia ko Kristo poʻo.

⁴ ʻO kēlā kāne kēia kāne e pule ana, a e wānana ana me ka uhi ʻia o ke poʻo, ua hoʻohilahila ia i kona poʻo.

⁵ A ʻo kēlā wahine kēia wahine, e pule ana, a e wānana ana me ka uhi ʻole ʻia o ke poʻo, ua hoʻohilahila ia i kona poʻo; no ka mea, ua like nō ia me ke āmū ʻia.

⁶ No ka mea, inā ʻaʻole e uhi ʻia ka wahine, e āmū ʻia ʻo ia; akā, inā he mea hilahila i ka wahine, ke āmū ʻia a ke ʻako ʻia, a laila, e uhi ʻia ʻo ia.

⁷ ʻAʻole hoʻi e pono ke uhi ʻia ko ke kāne poʻo; no ka mea, ʻo ia ka mea like, a me ka nani o ke Akua; akā, ʻo ka wahine, ʻo ia ka nani o ke kāne.

⁸ ʻAʻole na ka wahine mai ke kāne; na ke kāne mai ka wahine.

⁹ ʻAʻole hoʻi i hana ʻia ke kāne na ka wahine; ʻo ka wahine nō na ke kāne.

¹⁰ No laila he pono nō i ka wahine e uhi ʻia kona poʻo, no nā ʻānela.

¹¹ ʻAʻole hoʻi he kāne wale nō me ka wahine ʻole; ʻaʻole he wahine wale nō me ke kāne ʻole i loko o ka Haku.

¹² E like me ka wahine, na ke kāne mai, pēlā nō ke kāne, no ka wahine mai ia; a na ke Akua mai nā mea a pau.

¹³ ʻO ʻoukou iho e noʻonoʻo pono; he mea maikaʻi anei no ka wahine, ke pule i ke Akua, me ka uhi ʻole ʻia?

¹⁴ ʻAʻole anei i aʻo mai nā mea maoli iā ʻoukou, inā e loloa ka lauoho o ke kāne, he mea hilahila ia nona?

¹⁵ Akā, inā i loloa ka lauoho o ka wahine, he mea ia e nani ai; no ka mea, ua hāʻawi ʻia mai kona lauoho i uhi nona.

¹⁶ Akā, inā i manaʻo kekahi e hoʻopaʻapaʻa, ʻaʻole pēlā ko mākou ʻaoʻao, ʻaʻole hoʻi ko nā ʻekalesia o ke Akua.

¹⁷ ¶ I kēia mea aʻu e haʻi aku nei, ʻaʻole au e hoʻomaikaʻi aku iā ʻoukou; no ka mea, i ko ʻoukou ʻākoakoa ʻana, ʻaʻole no ka pono, no ka hewa nō.

¹⁸ No ka mea, eia ka mua, i ko ʻoukou ʻākoakoa ʻana ma ka ʻekalesia, he lohe koʻu, ua kūʻē ʻoukou i kekahi i kekahi; a ke manaʻo nei kahi naʻau oʻu, he ʻoiaʻiʻo.

¹⁹ E ʻoiaʻiʻo nō, e hiki mai nō ka manaʻo kūʻē i waena o ʻoukou, i maopopo mai ka poʻe i ʻāpono ʻia i waena o ʻoukou.

²⁰ I ko ʻoukou ʻākoakoa ʻana i kahi hoʻokahi, ʻaʻole ia e ʻai i ka ʻAhaʻaina a ka Haku;

²¹ no ka mea, i kā ʻoukou ʻahaʻaina ʻana, ʻai wikiwiki nō kēlā mea kēia mea i kāna ʻai iho, a ua pōloli kekahi, a ua ʻona kekahi.

²² ʻAʻole anei o ʻoukou hale, ma laila e ʻai ai, a e inu ai? Ke hoʻowahāwahā nei anei ʻoukou i ka ʻekalesia o ke Akua, me ka hoʻohilahila i ka poʻe nele? Pehea lā wau e ʻōlelo aku ai iā ʻoukou? E hoʻomaikaʻi anei au iā ʻoukou i kēia? ʻAʻole au e hoʻomaikaʻi.

²³ No ka mea, ua loaʻa iaʻu na ka Haku mai, ka mea aʻu i hāʻawi aku ai na ʻoukou. ʻO ka Haku ʻo Iesū, i ka pō āna i kumakaia ʻia ai, lālau akula ia i ka berena;

²⁴ a pau ka hoʻālohaloha ʻana, wāwahi ihola ia, ʻī akula, “E lawe ʻoukou, e ʻai; eia nō koʻu kino i wāwahi ʻia no ʻoukou. E hana ʻoukou i kēia me ka hoʻomanaʻo mai iaʻu.”

²⁵ Pēlā nō hoʻi ke kīʻaha, ma hope o ka ʻai ʻana, ʻī akula, “ʻO kēia kīʻaha, ʻo ke kauoha hou ia i loko o koʻu koko. E hana ʻoukou i kēia, i ko ʻoukou wā e inu ai, me ka hoʻomanaʻo mai iaʻu.”

²⁶ No ka mea, i nā wā a pau loa a ʻoukou e ʻai ai i kēia berena, a e inu hoʻi i kēia kīʻaha, e haʻi aku ana ʻoukou i ka make o ka Haku, a hiki hou mai ia.

²⁷ No laila, ʻo ka mea e ʻai i kēia berena, a e inu i ko ke kīʻaha o ka Haku, me ka pono ʻole, ua hewa ia i ke kino a me ke koko o ka Haku.

²⁸ E noʻonoʻo ke kanaka iā ia iho, a pēlā ia e ʻai ai i ka berena, a e inu ai hoʻi i ko ke kīʻaha.

²⁹ No ka mea, ʻo ke kanaka nāna e ʻai, a e inu hoʻi me ka pono ʻole, ua ʻai nō ia a ua inu i ka hoʻāhewa ʻia nona iho, no kona hoʻomaopopo ʻole ʻana i ke kino o ka Haku.

³⁰ No laila, ua nui loa ka poʻe o ʻoukou i nāwaliwali, a i maʻimaʻi, a ua nui nō ka poʻe i moe.

³¹ Inā i hoʻokolokolo kākou iā kākou iho, a laila, ʻaʻole kākou e hoʻāhewa ʻia mai.

³² Akā, i ko kākou hoʻāhewa ʻia, ua hahau ʻia kākou e ka Haku, i ʻole ai kākou e hoʻāhewa pū ʻia me ko ke ao nei.

³³ No ia mea, e oʻu hoahānau ē, i ko ʻoukou ʻākoakoa ʻana e ʻai ai, e kakali ʻoukou i kekahi i kekahi.

³⁴ A inā e pōloli kekahi, e ʻai ia ma kona wahi iho; i ʻole ʻoukou e hoʻohewa ʻia, i ko ʻoukou ʻākoakoa ʻana. A ʻo nā mea ʻē aʻe, a hiki aku au, naʻu nō ia e hoʻoponopono aku.