ʻO KA ʻEPISETOLE MUA A PAULO KA LUNAʻŌLELO I KO KORINETO 10 - Ka Baibala Hemolele

1 ʻO nā mea kahiko, he mau hōʻailona ia o nā mea hou. 16 No ka ʻahaʻaina.

MOKUNA X.

¹ ¶ E nā hoahānau ē, ʻaʻole oʻu makemake, e naʻaupō ʻoukou i nā kūpuna o kākou. Ma loko o ke ao lākou a pau, a pau nō hoʻi lākou i ka hele ma waena o ke kai;

² ma loko o ke ao, a ma loko o ke kai, ua pau loa lākou i ka bapetizo ʻia i loko o Mose.

³ A ʻai nō hoʻi lākou i kēlā ʻai lani.

⁴ A inu nō hoʻi lākou i kēlā wai lani; no ka mea, inu nō lākou i ko ia Pōhaku lani i hahai ma hope o lākou, a ʻo ua Pōhaku lā, ʻo ia ʻo Kristo.

⁵ Akā, ʻaʻole i leʻaleʻa mai ke Akua i ka nui o lākou; no ka mea, ua luku ʻia lākou ma ka wao nahele.

⁶ He hōʻailona kēia mau mea no kākou, i mea e kuko ʻole ai kākou i nā mea hewa, e like me ko lākou kuko ʻana.

⁷ Mai lilo ʻoukou i poʻe hoʻomana kiʻi, e like me kekahi o lākou; e like hoʻi me ka mea i palapala ʻia, “«Noho ihola nā kānaka e ʻai, a e inu, a kū maila lākou e hula».”

⁸ Mai moekolohe kākou e like me ko lākou moekolohe ʻana, a make ihola i ka lā hoʻokahi, he iwakāluakumamākolu tausani.

⁹ Mai ʻaʻa aku iā Kristo, e like me ka ʻaʻa ʻana aku o kekahi poʻe o lākou, a ua luku ʻia mai lākou e ka poʻe nahesa.

¹⁰ Mai ʻōhumu ʻoukou, e like me ka ʻōhumu ʻana o kekahi o lākou, a ua luku ʻia lākou e ka mea make.

¹¹ Ua loʻohia mai lākou i kēia mau mea, i hōʻailona; a ua palapala ʻia mai i mea e naʻauao ai kākou, ka poʻe e ola nei, i kēia hope o ke ao.

¹² No ia mea, ʻo ke kanaka i manaʻo ua kūpaʻa ia, e ao hoʻi ia o hina.

¹³ ʻAʻole a ʻoukou hoʻowalewale ʻē aʻe, ʻo nā mea maoli wale nō; a he mālama nō ko ke Akua; ʻaʻole ia e kuʻu mai iā ʻoukou i ka hoʻowalewale ʻia ma kahi hiki ʻole iā ʻoukou ke kūpaʻa; akā, ke hoʻowalewale ʻia ʻoukou, e hoʻomākaukau nō kēlā i kahi e pakele ai, i hiki iā ʻoukou ke kūpaʻa.

¹⁴ ¶ No ia mea, e oʻu pōkiʻi ē, e haʻalele loa i ka hoʻomana kiʻi.

¹⁵ Ke ʻōlelo aku nei au iā ʻoukou me he poʻe naʻauao lā. E manaʻo pono ʻoukou i nā mea aʻu e ʻōlelo aku nei.

¹⁶ ʻO ke kīʻaha laʻa a kākou e hoʻolaʻa nei, ʻaʻole anei ʻo ia ka lawe pū ʻana i ke koko o Kristo? A ʻo ka berena nō hoʻi a kākou e wāwahi nei, ʻaʻole anei ia ka lawe pū ʻana i ke kino o Kristo?

¹⁷ No ka mea, ʻo kākou he nui loa, hoʻokahi nō kā kākou berena, hoʻokahi hoʻi kino; no ka mea, ua ʻai pū kākou a pau, i kēlā berena hoʻokahi.

¹⁸ E nānā hoʻi i kā ʻIseraʻela ma ke kino; ʻo ka poʻe ʻai i ka mōhai, ʻaʻole anei lākou nā hoa lawehana i ko ke kuahu?

¹⁹ Pehea hoʻi au e ʻōlelo aku nei? He mea ʻiʻo anei ke kiʻi? He mea ʻiʻo anei ka mea i kaumaha ʻia na ke kiʻi?

²⁰ ʻO nā mea a nā lāhui kanaka ʻē i kaumaha aku ai, ke kaumaha nei lākou na ka poʻe daimonio, ʻaʻole na ke Akua. ʻAʻole oʻu makemake e lilo ʻoukou i poʻe lawe pū i ko nā daimonio.

²¹ ʻAʻole e hiki iā ʻoukou ke inu pū i ke kīʻaha o ka Haku a me ke kīʻaha o nā daimonio. ʻAʻole e hiki iā ʻoukou ke pili pū aku i ka papa pāʻina a ka Haku me ka papa pāʻina a nā daimonio.

²² E hoʻolili anei kākou i ka Haku? Ua ʻoi aku anei ko kākou ikaika i kona?

²³ ¶ Ua kū i ke kānāwai nā mea a pau naʻu, ʻaʻole naʻe e pono nā mea a pau. Ua kū i ke kānāwai nā mea a pau naʻu, ʻaʻole hoʻi he mea e naʻauao ai nā mea a pau.

²⁴ Mai ʻimi aku kekahi kanaka i kona iho; e ʻimi nō nā kānaka a pau i ko haʻi pono.

²⁵ ʻO nā mea a pau i kūʻai ʻia ma kahi kūʻai, e ʻai ia mea, me ka ninaninau ʻole aku, no ka lunamanaʻo.

²⁶ «No ka mea, na ka Haku nō ka honua, a me ko laila mea i piha ai».

²⁷ Inā e kono mai kekahi o ka poʻe hoʻomaloka iā ʻoe, a manaʻo ʻoe e hele, ʻo ka mea i waiho ʻia i mua ou, e ʻai, ʻaʻole hoʻi me ka ninaninau aku, no ka lunamanaʻo.

²⁸ Akā, inā e ʻōlelo mai kekahi iā ʻoe, “Eia kā ke kiʻi,” mai ʻai ʻoe, no ke kanaka nāna i haʻi mai, a no ka lunamanaʻo. No ka mea, na ka Haku nō ka honua, a me ko laila mea i piha ai.

²⁹ Ke ʻī aku nei au, no ka lunamanaʻo, ʻaʻole hoʻi no kou iho; akā, no ko haʻi nō. No ke aha lā e hoʻohewa ʻia mai koʻu pono e ka lunamanaʻo o haʻi.

³⁰ No ka mea, inā e ʻai au me ke aloha aku, no ke aha lā e ʻōlelo ʻino ʻia mai au ma ka mea aʻu e hāʻawi aku ai i ke aloha?

³¹ No laila, inā e ʻai ʻoukou, a inā e inu ʻoukou, a ʻo nā mea a pau a ʻoukou e hana ai, e hana ʻoukou i nā mea a pau me ka hoʻonani aku i ke Akua.

³² Mai hoʻohihia aku ʻoukou i nā Iudaio, ʻaʻole hoʻi i nā Helene, ʻaʻole hoʻi i ka ʻekalesia o ke Akua.

³³ E like me aʻu nei, e hōʻoluʻolu aku i kānaka a pau, ma nā mea a pau, ʻaʻole hoʻi me ka ʻimi ʻana i koʻu pono iho; akā, i ko nā kānaka he nui loa, i ola lākou.