ʻO KA ʻEPISETOLE MUA A PAULO KA LUNAʻŌLELO I KO KORINETO 1 - Ka Baibala Hemolele

1 He ʻōlelo hoʻoikaika; ua hoʻākāka ʻia ko ke Akua akamai.

MOKUNA I.

¹ ¶ ʻO Paulo, i koho ʻia i lunaʻōlelo na Iesū Kristo, no ka manaʻo ʻana mai o ke Akua, ʻo māua me Sosetene, kekahi hoahānau;

² na ka ʻekalesia o ke Akua ma Korineto, na ka poʻe i hoʻomaʻemaʻe ʻia i loko o Kristo Iesū, a i hoʻolilo ʻia i poʻe haipule, a na ka poʻe a pau ma nā wahi a pau loa i hea aku i ka inoa ʻo Iesū Kristo, i ko lākou Haku a me ko kākou.

³ E aloha ʻia mai ʻoukou, a e maluhia hoʻi e ke Akua, e ko kākou Makua, a e ka Haku e Iesū Kristo.

⁴ ¶ Ke aloha mau aku nei au i koʻu Akua, no ʻoukou, no ka lokomaikaʻi o ke Akua i hāʻawi ʻia mai iā ʻoukou ma o Iesū Kristo lā.

⁵ No ka mea, ua waiwai ʻoukou iā ia i nā mea a pau, i nā ʻōlelo a pau, a me ka naʻauao i nā mea a pau;

⁶ no ka hōʻoiaʻiʻo ʻana o ka ʻōlelo a Kristo i waena o ʻoukou;

⁷ no ia mea, ʻaʻole ʻoukou i nele i kekahi haʻawina; e kali ana i ka hōʻike ʻana mai o ko kākou Haku, ʻo Iesū Kristo;

⁸ nāna nō ʻoukou e hoʻokūpaʻa, a hiki aku i ka hopena, i hewa ʻole ʻoukou i ka lā o ko kākou Haku ʻo Iesū Kristo.

⁹ He Akua mālama, ka Mea i hea mai iā ʻoukou, i poʻe hoa no kāna Keiki, no Iesū Kristo, ko kākou Haku.

¹⁰ ¶ Ke noi aku nei au iā ʻoukou, e nā hoahānau, ma ka inoa o ko kākou Haku ʻo Iesū Kristo, i ʻōlelo ʻoukou a pau i ka mea hoʻokahi, i ʻole ʻoukou e mokuāhana; a i pili pū ʻoukou me ka naʻau hoʻokahi, a me ka lōkahi o ka manaʻo.

¹¹ E nā hoahānau oʻu, ua haʻi ʻia mai iaʻu no ʻoukou, na ka poʻe ʻōhua o Keloe; ua kūʻēʻē ʻoukou.

¹² Ke haʻi aku nei au i kēia, ua ʻōlelo aʻe kēlā mea kēia mea o ʻoukou, “No Paulo wau; a no ʻApolo wau; a no Kepa wau; a no Kristo wau.”

¹³ Ua mahele ʻia anei ʻo Kristo? I kaulia anei ʻo Paulo ma ke keʻa no ʻoukou? Ua bapetizo ʻia anei ʻoukou i loko o ka inoa ʻo Paulo?

¹⁴ Ke aloha aku nei au i ke Akua; no ka mea, ʻaʻole au i bapetizo aku i kekahi mea o ʻoukou, ʻo Kerisepo lāua ʻo Gaio wale nō;

¹⁵ o ʻōlelo paha auaneʻi kekahi, ua bapetizo aku au i loko o koʻu inoa iho.

¹⁶ Ua bapetizo nō hoʻi au i ko ka hale o Setepana; a ʻo nā mea ʻē, ʻaʻole au i ʻike i koʻu bapetizo ʻana i kekahi mea ʻē.

¹⁷ ʻAʻole i hoʻouna mai ʻo Kristo iaʻu e bapetizo; akā, e haʻi i ka ʻeuanelio; ʻaʻole ma ke akamai i ka ʻōlelo, o hoʻolilo ʻia ke keʻa o Kristo, i mea ʻole.

¹⁸ ¶ No ka mea, ʻo ka ʻōlelo no ke keʻa, he mea lapuwale ia i ka poʻe make; akā, iā kākou, i ka poʻe ola, ʻo ia ka mana o ke Akua.

¹⁹ No ka mea, ua palapala ʻia mai, “«E hoʻopau au i ke akamai o ka poʻe akamai, A e hoʻolilo au i ka naʻauao o ka poʻe naʻauao i mea ʻole».”

²⁰ ʻAuhea ka mea akamai? ʻAuhea ke kākāʻōlelo? ʻAuhea ka mea hoʻopaʻapaʻa o kēia ao? ʻAʻole anei i hoʻolilo ke Akua i ke akamai o kēia ao, i mea lapuwale?

²¹ No ka mea, i ke akamai o ke Akua, ʻaʻole i ʻike aku ko ke ao nei i ke Akua, ma ko lākou naʻauao ʻana; a laila manaʻo ihola ke Akua, ma ka lapuwale o ka haʻiʻōlelo ʻana, e hoʻōla i ka poʻe manaʻoʻiʻo.

²² Ke noi mai nei nā Iudaio i hōʻailona; ke ʻimi mai nei hoʻi nā Helene i ke akamai;

²³ akā, ke haʻi aku nei mākou iā Kristo i kaulia ma ke keʻa, he mea hina no nā Iudaio, a he mea lapuwale no nā Helene;

²⁴ akā, i ka poʻe i hea ʻia mai, i nā Iudaio a me nā Helene, ʻo Kristo nō ka mana o ke Akua a me ke akamai o ke Akua.

²⁵ No ka mea, ʻo ka lapuwale o ke Akua, ua ʻoi aku ia ma mua o ke akamai o kānaka; a ʻo ka nāwaliwali o ke Akua ma mua o ka ikaika o kānaka.

²⁶ ¶ E nā hoahānau, ua ʻike ʻoukou i ko ʻoukou hea ʻia mai; ʻaʻole koho nui ʻia ka poʻe akamai ma ke kino, ʻaʻole i nui ka poʻe maiau, ʻaʻole i nui nā aliʻi;

²⁷ akā, ua koho mai ke Akua i ka poʻe naʻaupō o kēia ao, i hoʻohilahila ia i ka poʻe akamai; ua koho mai hoʻi ke Akua i ka poʻe nāwaliwali o kēia ao, i hoʻohilahila ia i ka poʻe ikaika;

²⁸ a me ke kuaʻāina hoʻi kā ke Akua i koho mai ai a me ka mea hoʻowahāwahā ʻia, a me nā mea i ʻike ʻole ʻia i ʻānai aku ʻo ia i nā mea i ʻike ʻia;

²⁹ i ʻole e hoʻokiʻekiʻe kekahi kanaka i mua i ke alo o ke Akua.

³⁰ Nāna mai nō ko ʻoukou i loko o Kristo Iesū, ʻo ka Mea i lilo no kākou i akamai, i mea hoʻopono, i mea hoʻomaʻemaʻe, a i mea hoʻōla pānaʻi mai ke Akua mai.

³¹ E like me ka palapala ʻana mai, “«ʻO ka mea kaena, e kaena ʻo ia ma ka Haku».”