KA BUKE MUA O KA ʻOIHANA ALIʻI 5 - Ka Baibala Hemolele

1 No ka ʻoi ʻana o Iuda lāua ʻo Iosepa i mua o nā hoahānau ʻē aʻe. 3 Nā mamo a Reubena. 11 Nā luna o kā Gada. 18 Ka lanakila ʻana o kā Reubena mā ma luna o kā Hagara. 25 Ka lawe ʻana o nā ʻohana ʻelua a me ka hapalua i ʻAsuria.

MOKUNA V.

¹ ¶ A ʻo nā keiki kāne a Reubena, a ka makahiapo a ʻIseraʻela; (no ka mea, ʻo ia ka makahiapo; akā, no kona hoʻohaumia ʻana i ka moe o kona makua kāne, ua hāʻawi ʻia kā hānau mua ona no nā keiki a Iosepa ke keiki a ʻIseraʻela; ʻaʻole e helu ʻia ke kūʻauhau ma muli o ko ka hānau mua;

² no ka mea, ua ʻoi aku o Iuda ma luna o kona poʻe hoahānau, a nāna mai ke aliʻi nui; akā, no Iosepa ko ka hānau mua);

³ ʻo nā keiki kāne a Reubena, ʻo ka makahiapo a ʻIseraʻela: ʻo Hanoka, ʻo Palu, ʻo Hezerona, a ʻo Karemi.

⁴ ʻO nā keiki kāne a Ioʻela: ʻo Semaia kāna keiki, ʻo Goga kāna keiki, ʻo Simei kāna keiki,

⁵ ʻo Mika kāna keiki, ʻo Reaia kāna keiki, ʻo Baʻala kāna keiki,

⁶ ʻo Beʻera kāna keiki, ʻo ia kā Tigelata-Pilesera ke aliʻi o ʻAsuria i lawe aku ai; ʻo ia ka luna o ko Reubena.

⁷ Aia helu ʻia ke kūʻauhau o ko lākou hanauna, ʻo kona poʻe hoahānau ma kā lākou mau ʻohana, ʻo ka luna, ʻo Ieiʻela, a ʻo Zekaria;

⁸ a ʻo Bela ke keiki a ʻAzaza, ke keiki a Sema, ke keiki a Ioʻela, ʻo ia kai noho i ʻAroera, a hiki i Nebo, a i Baʻala Meona.

⁹ A noho akula ia ma ka hikina a hiki i ka palena o ka wao akua mai ka Muliwai ʻEuperate aku; no ka mea, ua nui loa ko lākou poʻe holoholona ma ka ʻāina ʻo Gileada.

¹⁰ A i ka wā iā Saula, kaua akula lākou me kā Hagara, a hina iho lākou i ko lākou lima; a noho lākou i ko lākou mau halelewa ma ka ʻāina hikina a pau o Gileada.

¹¹ ¶ A noho kūpono maila iā lākou nā mamo a Gada, ma ka ʻāina ʻo Basana, a hiki i Saleka.

¹² ʻO Ioʻela ka luna, ʻo Sapama ma lalo iho, ʻo Iaʻanai, a ʻo Sapata i Baʻasana.

¹³ ʻO kā lākou poʻe hoahānau, no ka ʻohana o ko lākou mau mākua: ʻo Mikaʻela, ʻo Mesulama, ʻo Seba, ʻo Iorai, ʻo Iakana, ʻo Zia, a ʻo ‘Ebera, ʻehiku.

¹⁴ Eia nā keiki kāne a ʻAbihaila ke keiki a Huri, ke keiki a Iaroa, ke keiki a Gileada, ke keiki a Mikaʻela, ke keiki a Iesisai, ke keiki a Iahedo, ke keiki a Buza;

¹⁵ ʻo ʻAhi ke keiki a ʻAbediʻela, ke keiki a Guni, ka luna o ka ʻohana o ko lākou mau mākua kāne.

¹⁶ A noho lākou i Gileada i Basana, i loko o kona mau kūlanakauhale, a i nā kula a pau o Sārona, a ma nā mokuna o lākou.

¹⁷ Ua helu ʻia lākou a pau ma nā hanauna i nā lā o Iotama ke aliʻi o kā Iuda, a i nā lā o Ieroboama ke aliʻi o kā ʻIseraʻela.

¹⁸ ¶ ʻO nā mamo a Reubena a me kā Gada, a me ka ʻohana hapa a Manase, nā kānaka koa, nā kānaka hiki ke lawe i ka pale kaua a me ka pahi kaua, a ke pana aku me ke kakaka, a he akamai i ke kaua, he kanahākumamāhā tausani, ʻehiku haneri a me ke kanaono, i hele aku i ke kaua.

¹⁹ A kaua akula lākou me kā Hagara, me Ietura, me Nepisa, a me Nodaba.

²⁰ A ua kōkua ʻia mai lākou i ke kūʻē i kēlā poʻe, a ua hāʻawi ʻia mai kā Hagara i loko o ko lākou lima, a me nā mea a pau o lākou; no ka mea, kāhea akula lākou i ke Akua i ke kaua ʻana, a maliu maila ʻo ia iā lākou; no ka mea, paulele nō lākou ma luna ona.

²¹ Kaʻi pio akula lākou i ko lākou holoholona, he kanalima tausani kāmelo, a ʻo nā hipa ʻelua haneri me kanalima tausani, a he poʻe miula ʻelua tausani, a he poʻe kānaka hoʻokahi haneri tausani.

²² No ka mea, hina ihola ka poʻe make he nui loa; no ka mea, no ke Akua ke kaua. A noho ihola lākou ma ko lākou wahi, a hiki i ka lawe ʻana aku.

²³ ¶ A noho ihola nā keiki o ka ʻohana hapa a Manase ma ia ʻāina; hoʻomāhuahua aʻela lākou mai Basana aku a Baʻala Heremona a Senira, a hiki aku i ka Mauna Heremona.

²⁴ Eia nā luna o ka ʻohana o ko lākou mau makua kāne: ʻo ʻEpera, ʻo ʻIsi, ʻo ʻEliʻela, ʻo ʻAzeriʻela, ʻo Ieremia, ʻo Hodavia, a ʻo Iadiʻela, nā kānaka koa ikaika, nā kānaka kaulana, he poʻe luna ʻohana o ko lākou mau mākua kāne.

²⁵ ¶ A ua lawehala lākou i ke Akua o ko lākou poʻe kūpuna, a hele akula e moekolohe ma muli o nā akua o nā kānaka o ka ʻāina, ka poʻe a ke Akua i luku ai i mua o lākou.

²⁶ A hoʻāla aʻela ke Akua o kā ʻIseraʻela i ka naʻau o Pula ke aliʻi o ʻAsuria, a me ka naʻau o Tigelata-Pilesera ke aliʻi o ʻAsuria, a lawe pio akula ʻo ia iā lākou, i kā Reubena, i kā Gada, a me ka ʻohana hapa a Manase, a kaʻi akula iā lākou i Hala, i Habora, a i Hara, a i ka Muliwai Gozana, a hiki i kēia manawa.