KA BUKE MUA O KA ʻOIHANA ALIʻI 29 - Ka Baibala Hemolele

1 Hōʻike mai nō Dāvida i nā mea āna i hoʻomākaukau ai no ka luakini. 6 Ka hāʻawi ʻana o nā luna. 10 Ka hoʻomaikaʻi ʻana o Dāvida i ke Akua, a me kāna pule. 20 Ka mōhai ʻana a kānaka, a me ka hoʻonoho ʻana iā Solomona i aliʻi. 26 Ka make ʻana o Dāvida.

MOKUNA XXIX.

¹ ¶ ʻŌlelo maila hoʻi ʻo Dāvida ke aliʻi i ke anaina kanaka a pau, “ʻO kuʻu keiki, ʻo Solomona, ka mea a ke Akua i wae mai ai, he ʻōpiopio ia, he palupalu, a he nui ka hana; no ka mea, ʻaʻole no ke kanaka ka hale aliʻi, no Iēhova ke Akua nō.

² “Ua hoʻomākaukau iho nō wau me kuʻu ikaika a pau no ka hale o kuʻu Akua: i ke gula no nā mea gula, i ke kālā no nā mea kālā, i ke keleawe no nā mea keleawe, i ka hao no nā mea hao, a i ka lāʻau no nā mea lāʻau, i nā pōhaku ʻonika e kau ʻia ai, nā pōhaku hinuhinu, a he ʻōniʻoniʻo hoʻi, a me nā pōhaku makamae he nui nā ʻano, a me nā pōhaku mamora he nui loa.

³ “A no ka mea, ua kau aku nō wau i ke aloha oʻu ma ka hale o koʻu Akua, ua hāʻawi aku nō wau i ke gula a me ke kālā o kuʻu waiwai ponoʻī, no ka hale o koʻu Akua, he pākela aku ia i nā mea a pau aʻu i hoʻomākaukau ai no ka hale hoʻāno;

⁴ ʻekolu nō tausani tālena gula, no ke gula o ʻOpira, a me nā tausani tālena kālā maʻemaʻe ʻehiku, i mea e hoʻouhi ia i nā paia o nā hale;

⁵ ʻo ke gula no nā mea gula, a ʻo ke kālā no nā mea kālā, a no nā hana a pau ma nā lima o nā paʻahana. ʻO wai hoʻi ka mea makemake e hoʻopiha i kona lima no Iēhova i kēia lā?”

⁶ ¶ A laila, mōhai ʻoluʻolu akula nā mākualiʻi a me nā luna ʻohana o kā ʻIseraʻela, me nā luna tausani a me nā luna haneri, a me nā luna o ka hana a ke aliʻi.

⁷ A hāʻawi akula lākou no ka ʻoihana o ka hale o ke Akua, i ʻelima tausani tālena gula, a me nā derama he ʻumi tausani, a me nā tālena kālā he ʻumi tausani, a me nā tālena keleawe he ʻumikumamāwalu tausani, a me nā tālena hao hoʻokahi haneri tausani.

⁸ A ʻo ka poʻe i loaʻa nā pōhaku makamae iā lākou, hāʻawi ʻoluʻolu aku lākou no ka waihona waiwai o Iēhova, ma ka lima o Iehiʻela kā Geresona.

⁹ A laila, ʻoliʻoli aʻela nā kānaka; no ka mea, hāʻawi ʻoluʻolu akula lākou; a me ka naʻau pono lākou i hāʻawi ʻoluʻolu aku ai no Iēhova; a ʻoliʻoli ihola hoʻi ʻo Dāvida ke aliʻi me ka ʻoliʻoli nui.

¹⁰ ¶ No laila, hoʻomaikaʻi akula ʻo Dāvida iā Iēhova i mua o ke anaina kanaka a pau; ʻōlelo akula ʻo Dāvida, “E hoʻomaikaʻi ʻia ʻoe, e Iēhova ke Akua o kā ʻIseraʻela, ʻo ko mākou makua, a mau loa, a mau loa aku.

¹¹ “Nou nō, e Iēhova, ka nui, me ka mana, a me ka nani, a me ka ʻoiaʻiʻo, a me ka hanohano aliʻi; no ka mea, nou nā mea a pau ma ka lani a ma ka honua; nou nō ke aupuni, e Iēhova, a ua kiʻekiʻe aʻe ʻoe ka poʻokela ma luna o nā mea a pau.

¹² “Nou mai ka waiwai a me ka maikaʻi, a e aliʻi ana ʻoe ma luna o nā mea a pau; a ma loko o kou lima ka mana a me ka ikaika; a i loko hoʻi o kou lima ka mea e nui ai a e ikaika ai nā kānaka a pau.

¹³ “No laila hoʻi, e ko mākou Akua, ke aloha aku nei mākou iā ʻoe, me ka hoʻomaikaʻi i kou inoa nani.

¹⁴ “ʻO wai hoʻi wau, ʻo wai hoʻi koʻu poʻe kānaka, i hiki ai iā mākou ke hāʻawi ʻoluʻolu aku me kēia? No ka mea, nou mai nā mea a pau, a ʻo kāu kā mākou i hāʻawi aku ai iā ʻoe.

¹⁵ “No ka mea, he poʻe mākou no ka ʻāina ʻē i mua ou, e noho malihini ana, e like me ko mākou poʻe kūpuna a pau; me he aka lā ko mākou mau lā ma luna o ka honua, ʻaʻole nō he manaʻolana.

¹⁶ “E Iēhova ko mākou Akua, ʻo kēia ahu waiwai a pau a mākou i hoʻomākaukau ai e hana i hale no kou inoa hoʻāno, na kou lima mai nō ia, a nou wale nō ia a pau.

¹⁷ “Ua ʻike nō hoʻi au, e koʻu Akua, ke hoʻāʻo mai nei ʻoe i ka naʻau, a ua ʻoluʻolu mai i ka pono. A ʻo wau nei lā, ma ka manaʻo pono o kuʻu naʻau ua hāʻawi ʻoluʻolu aku wau i nēia mau mea a pau; a ua ʻike iho nei hoʻi au me ka ʻoliʻoli i kou poʻe kānaka ma ʻaneʻi, e hāʻawi ʻoluʻolu aku ana nou.

¹⁸ “E Iēhova, ke Akua o ʻAberahama, ʻo ʻIsaʻaka, a ʻo ʻIseraʻela, ʻo ko mākou poʻe kūpuna, e hoʻopaʻa mau loa mai ʻoe i kēia i loko o nā manaʻo o ka naʻau o kou poʻe kānaka, a e hoʻokūpaʻa i ko lākou naʻau nou.

¹⁹ “A e hāʻawi mai ʻoe i kuʻu keiki iā Solomona i naʻau pono, e mālama ai i kāu mau kauoha, i kāu mau ʻōlelo, a me kou mau kānāwai, a e hana ia mau mea a pau, a e hana hoʻi ia i ka hale aliʻi aʻu i hoʻomākaukau ai.”

²⁰ ʻŌlelo maila ʻo Dāvida i ke anaina kanaka a pau, “ʻĀnō, e hoʻomaikaʻi ʻoukou iā Iēhova i ko ʻoukou Akua.” A hoʻomaikaʻi akula ke anaina kanaka a pau iā Iēhova i ke Akua o ko lākou poʻe kūpuna, a kūlou ihola i ko lākou mau poʻo, a kūlou loa i mua o Iēhova, a me ke aliʻi.

²¹ A mōhai akula lākou i nā mōhai na Iēhova, a kaumaha akula i nā mōhai kuni na Iēhova, i ka lā ma hope mai o ia lā, i hoʻokahi tausani bipi kāne, hoʻokahi tausani hipa kāne, hoʻokahi tausani hipa keiki, me nā mōhai inu a lākou, a me nā mōhai aloha he nui loa no kā ʻIseraʻela a pau.

²² ʻAi ihola a inu hoʻi lākou i mua o Iēhova ia lā me ka ʻoliʻoli nui. A hoʻāliʻi hou akula lākou iā Solomona i ke keiki a Dāvida, a poni ihola iā ia no Iēhova, i aliʻi nui, a iā Zadoka hoʻi i kahuna nui.

²³ A laila, noho ihola ʻo Solomona ma luna o ka noho aliʻi o Iēhova, i aliʻi ma kahi o Dāvida ʻo kona makua kāne, a he pōmaikaʻi kona; a hoʻolohe maila kā ʻIseraʻela a pau iā ia.

²⁴ A ʻo nā aliʻi a pau a me nā kānaka koʻikoʻi, a ʻo nā keiki kāne hoʻi a pau a Dāvida ke aliʻi, kau ihola lākou i ko lākou lima ma lalo o Solomona ke aliʻi.

²⁵ Hoʻonui ihola ʻo Iēhova iā Solomona a nui loa i mua o nā maka o kā ʻIseraʻela a pau, a hāʻawi maila iā ia i ka hanohano aliʻi, ʻaʻole i hāʻawi ʻia mai ka mea like ma luna o kekahi aliʻi i loko o kā ʻIseraʻela ma mua ona.

²⁶ ¶ Pēlā ʻo Dāvida ke keiki a Iese i aliʻi ai ma luna o kā ʻIseraʻela a pau.

²⁷ A ʻo ka manawa āna i aliʻi ai ma luna o kā ʻIseraʻela, he kanahā nā makahiki; ʻehiku makahiki āna i aliʻi ai ma Heberona, a he kanakolukumamākolu āna i aliʻi ai ma Ierusalema.

²⁸ A make ihola ʻo ia i ka wā ʻelemakule loa, a he nui nā lā, nā waiwai, a me ka maikaʻi ona; a aliʻi ihola ʻo Solomona ma kona wahi.

²⁹ A ʻo nā hana a Dāvida ke aliʻi, nā hana mua a me nā hana hope, ua kākau ʻia lākou i loko o ka moʻoʻōlelo a Samuʻela ke kāula, a i loko o ka moʻoʻōlelo a Natana ke kāula, a i loko o ka moʻoʻōlelo a Gada ke kāula;

³⁰ me kona aliʻi ʻana a pau a me kona ikaika, a me nā manawa i hiki mai iā ia, a i kā ʻIseraʻela, a i nā aupuni a pau o nā ʻāina.