KA BUKE MUA O KA ʻOIHANA ALIʻI 28 - Ka Baibala Hemolele

1 Hōʻike aku ʻo Dāvida i kona manaʻo e hana ʻia ai ka luakini. 9 Kāna kauoha iā Solomona. 11 Hāʻawi akula ia i ke kumu no ka luakini iā Solomona, a me ke gula me ke kālā e paʻa ai.

MOKUNA XXVIII.

¹ ¶ Hōʻuluʻulu aʻela ʻo Dāvida i nā luna a pau o kā ʻIseraʻela, i nā luna ʻohana, a me nā luna o nā poʻe i hoʻokauā na ke aliʻi ma nā papa, me nā luna tausani, me nā luna haneri, me nā luna o nā holoholona a me nā waiwai a pau o ke aliʻi, me kāna mau keiki kāne, me nā ilāmuku, me nā kānaka koʻikoʻi, a me nā kānaka koa a pau, i Ierusalema.

² A laila kū aʻela ʻo Dāvida ke aliʻi ma kona wāwae, ʻōlelo maila, “E hoʻolohe mai, e nā hoahānau oʻu, a me oʻu kānaka; i loko nō o kuʻu naʻau ka hana i hale hoʻomaha no ka pahu berita o Iēhova, a no ka paepae wāwae o ko kākou Akua, a ua hoʻomākaukau nō wau no ka hana ʻana.

³ “Akā, ʻōlelo maila ke Akua iaʻu, ‘Mai hana ʻoe i hale no koʻu inoa; no ka mea, he kanaka kaua ʻoe, a ua hoʻokahe ʻoe i nā koko.’

⁴ “Akā hoʻi, i koho mai ʻo Iēhova ke Akua o kā ʻIseraʻela iaʻu i mua o ka ʻohana a pau a koʻu makua kāne i aliʻi mau ma luna o kā ʻIseraʻela; no ka mea, i koho mai ʻo ia i kā Iuda i aliʻi; a i ka ʻohana a koʻu makua kāne no ka ʻohana a Iuda; a i waena o nā keiki a kuʻu makua kāne, i makemake ʻo ia iaʻu e hoʻolilo i aliʻi ma luna o kā ʻIseraʻela a pau.

⁵ “A ʻo nā keiki kāne aʻu a pau, (no ka mea, ua hāʻawi mai ke Akua iaʻu i nā keiki kāne he nui), ua wae mai ʻo ia i kuʻu keiki iā Solomona e noho ia ma luna o ka noho aliʻi o ke aupuni o Iēhova, ma luna o kā ʻIseraʻela.

⁶ “ʻĪ maila ʻo ia iaʻu, ‘ʻO Solomona kāu keiki, ʻo ia nō ka mea nāna e hana koʻu hale a me koʻu mau pā hale; no ka mea, ua wae au iā ia i keiki naʻu, a ʻo wau auaneʻi kona makua.

⁷ ‘Eia hoʻi, e hoʻokūpaʻa auaneʻi au i kona aupuni a mau loa aku; inā e ikaika ʻo ia ke hana i kaʻu mau kauoha, a me koʻu mau kānāwai, e like me ia i kēia lā.’

⁸ “ʻĀnō hoʻi, i mua o nā maka o kā ʻIseraʻela a pau, ʻo ke anaina kanaka o Iēhova, i mua hoʻi o nā pepeiao o ko kākou Akua, e mālama ʻoukou me ka ʻimi aku i nā kauoha a pau a Iēhova a ko ʻoukou Akua; i noho ai ʻoukou ma kēia ʻāina maikaʻi, a e waiho hoʻi ia i hoʻoilina no nā keiki ma hope o ʻoukou a mau loa aku.

⁹ ¶ “ʻO ʻoe hoʻi, e Solomona kuʻu keiki, e ʻike ʻoe i ke Akua o nā kūpuna ou, a e mālama iā ia me ka naʻau pono, a me ka manaʻo makemake; no ka mea, ke nānā mai nei ʻo Iēhova i nā naʻau a pau, a ke ʻike nei i nā ʻano a pau o nā manaʻo; inā ʻoe e ʻimi aku iā ia, e loaʻa auaneʻi ʻo ia iā ʻoe; akā, i haʻalele ʻoe iā ia, e kiola aku ʻo ia iā ʻoe a mau loa aku.

¹⁰ “E mālama ʻoe ʻānō; no ka mea, ua wae mai ʻo Iēhova iā ʻoe e hana i hale no ke keʻena kapu; e hoʻoikaika ʻoe, a e hana.”

¹¹ ¶ A laila hāʻawi maila ʻo Dāvida iā Solomona kāna keiki, i ke kumu no ka lānai, a no nā hale o laila, a no nā waihona waiwai o laila, a no nā keʻena luna o laila, a no nā keʻena waena, a no kahi o ka noho aloha,

¹² a me ke kumu no nā mea a pau iā ia na ka ʻUhane mai, no nā pā hale o ka hale o Iēhova, a no nā keʻena a pau e puni ana, no nā waihona waiwai o ka hale o ke Akua, a no nā hale ahu i ka waiwai i hoʻolaʻa ʻia;

¹³ a no nā papa hoʻi o nā kāhuna, a ʻo nā Levi, a no ka hana ʻana a pau i ka ʻoihana o ka hale o Iēhova, a no nā ipu o ka ʻoihana i loko o ka hale o Iēhova.

¹⁴ A hāʻawi maila ia i gula i kaupaona ʻia i mea gula, no nā mea hana i nā ʻoihana a pau; a ʻo nā mea kālā a pau ma ke kaupaona ʻana, no nā mea hana i nā ʻoihana a pau;

¹⁵ i ka mea i kaupaona ʻia no nā waihona kukui gula, a me nā ipu kukui gula o lākou; ma ke kaupaona no nā waihona kukui a pau, a no nā ipukukui o lākou; a no nā waihona kukui kālā ma ke kaupaona; no ka waihona kukui, a no nā ipu kukui ona, e like me ke ʻano o kēlā a me kēia waihona kukui.

¹⁶ A i ke gula ma ke kaupaona ʻana no ka papa berena hōʻike, no kēlā papa a no kēia papa; a he kālā no nā papa kālā;

¹⁷ a i ke gula maoli no nā lou manamana, no nā bola a no nā kīʻaha; a no nā pā gula hāʻawi maila ia i ke gula i kaupaona ʻia no kēlā pā a kēia pā; a me ke kālā i kaupaona ʻia no kēlā pā kālā a kēia pā kālā;

¹⁸ a no ke kuahu kuni mea ʻala i ke gula maʻemaʻe ma ke kaupaona; a he gula no ke kumu o ke kaʻa o nā keruba, i hohola aʻe a uhi iho i ka pahu berita o Iēhova.

¹⁹ “ʻO kēia a pau kā Iēhova i hoʻomaopopo mai ai iaʻu i ke kākau ʻana, ma kona lima ma luna iho oʻu, ʻo nā hana a pau o kēia kumu.”

²⁰ ¶ ʻŌlelo maila ʻo Dāvida iā Solomona kāna keiki, “E ikaika ʻoe, a e koa hoʻi, a e hana; mai makaʻu ʻoe, ʻaʻole hoʻi e pauaho; no ka mea, me ʻoe pū nō ʻo Iēhova ke Akua, ʻo koʻu Akua; ʻaʻole ʻo ia e hoʻohoka mai, ʻaʻole hoʻi e haʻalele mai iā ʻoe, a paʻa iā ʻoe ka hana a pau no ka ʻoihana o ka hale o Iēhova.

²¹ “Eia hoʻi ʻo nā papa o ka poʻe kāhuna a me nā Levi, ʻo lākou me ʻoe- no nā ʻoihana a pau o ka hale o ke Akua; a me ʻoe nō nā kānaka makemake mākaukau a pau no nā hana a pau, no kēlā hana kēia hana a pau; a ma kāu kauoha wale nō hoʻi nā luna a me nā kānaka a pau.”