KA BUKE MUA O KA ʻOIHANA ALIʻI 27 - Ka Baibala Hemolele

1 Nā luna koa o Dāvida, hoʻokahi luna hoʻokahi malama. 16 Nā luna o nā ʻohana he ʻumikumamālua. 23 ʻAʻole i pau nā ʻohana i ka helu ʻia. Nā aliʻi ma muli o Dāvida.

MOKUNA XXVII.

¹ ¶ A ʻo nā mamo a ʻIseraʻela ma ko lākou helu ʻia ʻana, ʻo nā mākua aliʻi, nā luna tausani, nā luna haneri, a ʻo ko lākou poʻe ilāmuku i hoʻokauā na ke aliʻi i kekahi mea o nā papa, nā poʻe i hele mai i loko a puka aku i waho ma ka malama, i nā malama a pau o ka makahiki; no kēlā papa kēia papa a pau he iwakāluakumamāhā tausani lākou.

² Ma luna o ka papa mua no ka malama mua, ʻo Iasobeama ke keiki a Zabediʻela; a ma kona papa he iwakāluakumamāhā tausani.

³ No nā mamo a Pereza ka luna o nā luna koa a pau o ke kaua, no ka malama mua.

⁴ Ma luna o ka papa no ka lua o ka malama ʻo Dodai kā ʻAhohi, a ma luna hoʻi o kona papa ʻo Mikelota kekahi luna; a ma kona papa hoʻi he iwakāluakumamāhā tausani.

⁵ ʻO ke kolu o ka luna kaua no ke kolu o ka malama ʻo Benaia ke keiki a Iehoida, he kahuna nui; a ma kona papa he iwakāluakumamāhā tausani.

⁶ ʻO ua Benaia lā ka mea ikaika i waena o ka poʻe kanakolu, a ua ʻoi ma luna o ke kanakolu; a ma kona papa ʻo ʻAmizabada kāna keiki.

⁷ ʻO ka hā, no ka hā o ka malama, ʻo ia ʻo ʻAsahela ke kaikaina o Ioaba, a ʻo Zebadia kāna keiki ma hope ona; a ma kona papa he iwakāluakumamāhā tausani.

⁸ ʻO ka luna ʻalima no ka lima o ka malama, ʻo ia ʻo Samuta ka ʻIzera; a ma kona papa he iwakāluakumamāhā tausani.

⁹ ʻO ke ono, no ke ono o ka malama, ʻo ia ʻo ʻIra ke keiki a ʻIkesa no Tekoa; a ma kona papa he iwakāluakumamāhā tausani.

¹⁰ ʻO ka hiku, no ka hiku o ka malama, ʻo ia ʻo Heleza kā Pelo, no nā mamo a ʻEperaima; a ma kona papa he iwakāluakumamāhā tausani.

¹¹ ʻO ka walu, no ka walu o ka malama, ʻo ia ʻo Sibekai kā Husata, no kā Zara; a ma kona papa he iwakāluakumamāhā tausani.

¹² ʻO ka iwa, no ka iwa o ka malama, ʻo ia ʻo ʻAbiezera no ʻAnetota o kā Beniamina; a ma kona papa he iwakāluakumamāhā tausani.

¹³ ʻO ka ʻumi, no ka ʻumi o ka malama, ʻo ia ʻo Maharai no Netopata, no ka Zara; a ma kona papa he iwakāluakumamāhā tausani.

¹⁴ ʻO ka ʻumikumamākahi, no ka ʻumikumamākahi o ka malama, ʻo ia ʻo Benaia no Piratona, no nā mamo a ʻEperaima; a ma kona papa he iwakāluakumamāhā tausani.

¹⁵ ʻO ka ʻumikumamālua, no ka ʻumikumamālua o ka malama, ʻo ia ʻo Heledai no Netopata, na ʻOteniʻela; a ma kona papa he iwakāluakumamāhā tausani.

¹⁶ ¶ Eia hoʻi kekahi, no nā luna o nā ʻohana a ʻIseraʻela: ʻo ka luna o kā Reubena, ʻo ia ʻo ʻEliezera ke keiki a Zikeri; ʻo kā Simeona, ʻo Sepatia ke keiki a Maʻaka;

¹⁷ ʻo kā Levi, ʻo Hasabia ke keiki a Kemuʻela; ʻo kā ʻAʻarona, ʻo Zadoka;

¹⁸ ʻo kā Iuda, ʻo ʻElihu no nā kaikuaʻana o Dāvida; ʻo kā ʻIsakara, ʻo ʻOmeri ke keiki a Mikaʻela;

¹⁹ ʻo kā Zebuluna, ʻo ʻIsemaia ke keiki a ʻObadia; ʻo kā Napetali, ʻo Ierimota ke keiki a ʻAzeriʻela;

²⁰ ʻo nā mamo a ʻEperaima, ʻo Hosea ke keiki a ʻAzazia; ʻo ka ʻohana hapa a Manase, ʻo Ioʻela ke keiki a Pedaia;

²¹ ʻo ka ʻohana hapa a Manase i Gileada, ʻo ʻIdo ke keiki a Zekaria; ʻo kā Beniamina, ʻo Iasiʻela ke keiki a ʻAbenera;

²² ʻo kā Dana, ʻo ʻAzareʻela ke keiki a Ierohama. ʻO lākou nō nā luna ʻohana o kā ʻIseraʻela.

²³ ʻAʻole nō i helu ʻo Dāvida iā lākou i ka poʻe o ka makahiki iwakālua a ma lalo iho; no ka mea, ua ʻōlelo mai ʻo Iēhova, e hoʻonui ana ʻo ia i kā ʻIseraʻela e like me nā hōkū o ka lani.

²⁴ Hoʻomaka ihola ʻo Ioaba ke keiki a Zeruia e helu; akā, ʻaʻole ia i hoʻopau; no ka mea; no laila i hāʻule mai ai ka inaina i kā ʻIseraʻela; ʻaʻole hoʻi i kākau ʻia ka huina ma ka buke o ka moʻoʻōlelo no Dāvida ke aliʻi.

²⁵ ¶ A ma luna o ke ahu waiwai o ke aliʻi, ʻo ʻAzemaveta ke keiki a ʻAdiʻela; a ma luna o nā hale papaʻa ma nā mahina ʻai, ma nā kūlanakauhale, a ma nā kauhale, a ma nā pā kaua, ʻo Iehonatana ke keiki a ʻUzia.

²⁶ A ma luna o ka poʻe i hana i ka hana ma ka mahina ʻai, e mahi ʻai i ka ʻāina, ʻo ʻEzeri ke keiki a Keluba.

²⁷ A ma luna o nā pā waina ʻo Simei no Ramata; ma luna o ka hua o nā pā waina no nā hale ahu waina ʻo Zabedi no Sipa.

²⁸ Ma luna hoʻi o nā lāʻau ʻoliva, a ʻo nā lāʻau sukamora ma nā awāwa pāpū, ʻo Baʻala-Hanana no Gedera; a ʻo Ioasa ma luna o nā hale ahu ʻaila.

²⁹ A ma luna o nā pūʻā bipi i hānai ʻia ma Sārona, ʻo Siterai no Sārona; a ma luna o nā pūʻā bipi ma nā awāwa, ʻo Sapata ke keiki a ʻAdelai.

³⁰ Ma luna hoʻi o nā kāmelo, ʻo ʻObila ka ʻIsemaʻela; a ma luna o nā hoki, ʻo Iedeia no Meronota.

³¹ Ma luna hoʻi o nā ʻohana hipa, ʻo Iaziza ka Hagara. ʻO lākou a pau nā luna o ka waiwai o Dāvida ke aliʻi.

³² ¶ A ʻo Ionatana hoʻi kekahi makua kāne o Dāvida, he kuhina ʻo ia, he kanaka naʻauao, a he kākau ʻōlelo; a ʻo Iehiʻela ke keiki a Hakemoni, aia nō ia me nā keiki kāne a ke aliʻi.

³³ A ʻo ʻAhitopela ke kākāʻōlelo o ke aliʻi; a ʻo Husai no ʻAreka ka hoa pili o ke aliʻi.

³⁴ A ma hope o ʻAhitopela ʻo Iehoiada ke keiki a Benaia, a me ʻAbiatara; a ʻo Ioaba ka luna koa o ko ke aliʻi poʻe kaua.