KA BUKE MUA O KA ʻOIHANA ALIʻI 26 - Ka Baibala Hemolele

1 No nā kiaʻi puka, a me nā puka i hoʻonoho ʻia ai lākou. 20 Nā luna o ka waihona waiwai. 29 Nā ilāmuku a me nā luna kānāwai.

MOKUNA XXVI.

¹ ¶ No nā puʻu ʻana o nā kiaʻi puka: ʻo nā Kora, ʻo Meselemia he keiki kāne a Kore, no nā keiki a ʻAsapa.

² A ʻo nā keiki kāne a Meselemia: ʻo Zekaria ka makahiapo, ʻo Iediaʻela ka lua, ʻo Zebadia ke kolu, ʻo Iateniʻela ka hā,

³ ʻO ʻElama ka lima, ʻo Iehohanana ke ono, ʻo ʻElihoenai ka hiku.

⁴ Eia hoʻi, ʻo nā keiki kāne a ʻObeda-ʻEdoma: ʻo Semaia ka makahiapo, ʻo Iehozabada ka lua, ʻo Ioa ke kolu, ʻo Sakara ka hā, ʻo Netaneʻela ka lima,

⁵ ʻO ʻAmiʻela ke ono, ʻo ʻIsakara ka hiku, a ʻo Peuletai ka walu; no ka mea, hoʻopōmaikaʻi maila ke Akua iā ia.

⁶ Na Semaia hoʻi, na kāna keiki kāne, ua hānau nā keiki; he mau luna lākou ma waena o ka ʻohana o ko lākou makua kāne; no ka mea, he mau kānaka koa ikaika lākou.

⁷ ʻO nā keiki kāne a Semaia: ʻo ʻOteni, ʻo Repaʻela, ʻo ʻObeda, ʻo ʻElezabada; ʻo nā hoahānau o lākou, he mau kānaka ikaika, ʻo ʻElihu, a ʻo Semakia.

⁸ ʻO kēia poʻe a pau no nā keiki a ʻObeda-ʻEdoma; ʻo lākou, ʻo nā keiki kāne a lākou, a me nā hoahānau o lākou, nā kānaka ikaika e hiki ai ka ʻoihana, he kanaonokumamālua na ʻObeda-ʻEdoma mai.

⁹ Na Meselemia hoʻi nā keiki kāne a me nā hoahānau, nā kānaka ikaika, he ʻumikumamāwalu.

¹⁰ A ʻo Hosa hoʻi, no nā keiki kāne a Merari, nāna mai nā keiki kāne: ʻo Simeri ke poʻokela; (no ka mea, ʻaʻole hoʻi ia ʻo ka hiapo; akā, hoʻonoho ihola kona makua kāne iā ia i poʻokela);

¹¹ ʻo Hilekia ka lua, ʻo Tebalia ke kolu, ʻo Zekaria ka hā; ʻo nā keiki kāne a pau a me nā hoahānau o Hosa, he ʻumikumamākolu.

¹² ¶ Iā lākou i nā kānaka poʻokela, nā papa kiaʻi puka, a he mau puʻu o lākou e kū pono ana kekahi i kekahi, e lawelawe i loko o ka hale o Iēhova.

¹³ A puʻu iho lākou no ka poʻe ʻuʻuku a me ka poʻe nui, e like me ka ʻohana o ko lākou mau kūpuna, no kēlā puka, a no kēia puka.

¹⁴ A puka maila ka puʻu hikina iā Selemia. A laila puʻu ihola lākou no kāna keiki no Zekaria, he kākāʻōlelo naʻauao; a puka maila ka puʻu kūkulu ʻākau nona.

¹⁵ Iā ʻObeda-ʻEdoma ka puʻu kūkulu hema; a i kāna mau keiki kāne, ka hale ahu waiwai.

¹⁶ Iā Supima lāua ʻo Hosa ka puʻu komohana, a me ka Puka Saleketa, ma ke alanui papa o ka piʻi ʻana, he puʻu kiaʻi ma ʻaneʻi a he puʻu kiaʻi ma ʻō.

¹⁷ Ma ka hikina he mau Levi ʻaono; ma ke kūkulu ʻākau, ʻehā i ka lā hoʻokahi; ma ke kūkulu hema, ʻehā i ka lā hoʻokahi; a ma ka hale ahu waiwai, ʻelua a ʻelua.

¹⁸ Ma Parebara ma ke komohana, ʻehā ma ke alanui papa, a ʻelua ma Parebara.

¹⁹ ʻO ia nā puʻu kiaʻi puka i waena o nā mamo a Kore, a i waena o nā mamo a Merari.

²⁰ ¶ A no kā Levi, ʻo ʻAhiia, ma luna ia o nā waihona waiwai o ka hale o ke Akua, a ma luna o ke ahu o nā mea laʻa.

²¹ No nā keiki kāne a Laʻadana; ʻo nā keiki kāne a Laʻadana na Geresona, ʻo nā mākualiʻi a Laʻadana no Geresona: ʻo Iehiʻeli.

²² ʻO nā keiki kāne a Iehiʻeli: ʻo Zetama a ʻo Ioʻela kona kaikaina, ma luna lāua ʻo nā waihona waiwai o ka hale o Iēhova.

²³ No kā ʻAmerama, a no kā ʻIzehara, a no kā Heberona, a no kā ʻUziʻela,

²⁴ a ʻo Sebuʻela ke keiki a Geresoma ke keiki a Mose, ʻo ia ka luna o nā waihona waiwai.

²⁵ A ʻo kona poʻe hoahānau ma ʻEliezera: ʻo Rehabia kāna keiki, ʻo Iesaia kāna keiki, ʻo Iorama kāna keiki, ʻo Zikeri kāna keiki, a ʻo Selomita kāna keiki.

²⁶ ʻO ua Selomita lā a me kona poʻe hoahānau, ʻo lākou ma luna o nā ahu a pau o nā mea laʻa, a ke aliʻi a Dāvida me kā nā mākualiʻi, nā luna tausani, nā luna haneri, a me nā luna kaua i hoʻolaʻa ai.

²⁷ No nā waiwai pio i pio i nā kaua, kā lākou i hoʻolaʻa ai, e kōkua i ka hale o Iēhova.

²⁸ A ʻo nā mea a pau a Samuʻela ke kāula, lāua ʻo Saula ke keiki a Kisa, a me kā ʻAbenera ke keiki a Nera, a me kā Ioaba ke keiki a Zeruia, i hoʻolaʻa ai; me kā kēlā mea kēia mea i hoʻolaʻa ai, ma lalo ia o ka lima o Selomita, a ʻo nā hoahānau ona.

²⁹ No nā ʻIzehara; ʻo Kenania me kāna mau keiki kāne, no nā ʻoihana ma waho lākou ma luna o kā ʻIseraʻela, no nā ilāmuku a me nā luna kānāwai.

³⁰ No ka Heberona; ʻo Hasabia me kona poʻe hoahānau, nā kānaka koa, hoʻokahi tausani a me nā haneri ʻehiku, he poʻe luna lākou i waena o kā ʻIseraʻela, ma kēia ʻaoʻao o ka Ioredane ma ke komohana, i nā mea a pau a Iēhova, a i ka hana a ke aliʻi.

³¹ I waena o ka Heberona, ʻo Ieriia ke poʻokela i waena o ka Heberona, ma muli o nā hanauna o kona poʻe kūpuna. I ke kanahā o ka makahiki o ko Dāvida aliʻi ʻana ua ʻimi ʻia aku ai lākou, a ua loaʻa nā kānaka koa ikaika i waena o lākou ma Iazera o Gileada.

³² A ʻo kona poʻe hoahānau nā kānaka koa, ʻelua tausani me nā haneri ʻehiku o nā mākualiʻi, ka poʻe a Dāvida i hoʻonoho ai i poʻe luna o kā Reubena, kā Gada, a me ka ʻohana hapa a Manase, no nā mea a pau a ke Akua, a me nā mea a ke aliʻi.