KA BUKE MUA O KA ʻOIHANA ALIʻI 24 - Ka Baibala Hemolele

1 Ka puʻunaue ʻana o nā kāhuna i nā papa he iwakāluakumamāhā. 29 Nā keiki kāne a Levi i koe.

MOKUNA XXIV.

¹ ¶ Eia ka puʻunaue ʻana i nā keiki kāne a ʻAʻarona. ʻO nā keiki kāne a ʻAʻarona: ʻo Nadaba, ʻo ʻAbihu, ʻo ʻEleazara, a ʻo ʻItamara.

² A make iho ʻo Nadaba lāua ʻo ʻAbihu ma mua o ko lāua makua kāne, ʻaʻole nō a lāua keiki; no laila, na ʻEleazara lāua ʻo ʻItamara i hana ka ʻoihana kahuna.

³ A hoʻonoho ihola ʻo Dāvida iā lāua, ʻo Zadoka no nā mamo a ʻEleazara, a ʻo ʻAhimeleka no nā mamo a ʻItamara e like me ko lāua kuleana i loko o ka ʻoihana a lāua.

⁴ A ua ʻoi aku ka nui o nā luna i loaʻa o nā mamo a ʻEleazara i mua o nā mamo a ʻItamara; a ua puʻunaue ʻia hoʻi lākou. I waena o nā mamo a ʻEleazara, he ʻumikumamāono ka poʻe luna no ka ʻohana o ko lākou mau kūpuna, a he ʻawalu hoʻi i waena o nā mamo a ʻItamara, e like me ka ʻohana a ko lākou mau kūpuna kāne.

⁵ Pēlā lākou i puʻunaue ʻia ai ma ka puʻu ʻana, ʻo kekahi poʻe me kekahi poʻe; no ka mea, ʻo nā luna no kahi hoʻāno, a me nā luna o ka hale o ke Akua, no nā keiki lākou a ʻEleazara, a no nā keiki a ʻItamara.

⁶ A ʻo Semaia ke keiki a Netaneʻela, ke kākau ʻōlelo no nā Levi, kākau ihola ʻo ia iā lākou i mua o ke aliʻi nui a me nā aliʻi, a me Zadoka ke kahuna, a me ʻAhimeleka ke keiki a ʻAbiatara, a me nā luna o nā ʻohana kahuna a ʻo nā Levi; hoʻokahi ʻohana kupuna i kākau ʻia no ʻEleazara, a hoʻokahi hoʻi no ʻItamara.

⁷ ¶ A puka maila ka puʻu mua iā Iehoiariba, ʻo ka lua iā Iedaia,

⁸ ʻo ke kolu iā Harima, ʻo ka hā iā Seorima,

⁹ ʻo ka lima iā Malekiia, ʻo ke ono iā Miiamina,

¹⁰ ʻo ka hiku iā Hakoza, ʻo ka walu iā ʻAbiia,

¹¹ ʻo ka iwa iā Iesua, ʻo ka ʻumi iā Sekania,

¹² ʻo ka ʻumikumamākahi iā ʻElisiba, ʻo ka ʻumikumamālua iā Iakima;

¹³ ʻo ka ʻumikumamākolu iā Hupa, ʻo ka ʻumikumamāhā iā Iesebeaba;

¹⁴ ʻo ka ʻumikumamālima iā Bilega, ʻo ka ʻumikumamāono iā ʻImera,

¹⁵ ʻo ka umikumamāhiku iā Hezira, ʻo ka ʻumikumamāwalu iā ʻApese,

¹⁶ ʻo ka ʻumikumamāiwa iā Petahia, ʻo ka iwakālua iā Iehezekela,

¹⁷ ʻo ka iwakāluakumamākahi iā Iakina, ʻo ka iwakāluakumamālua iā Gamula,

¹⁸ ʻo ka iwakāluakumamākolu iā Delaia, ʻo ka iwakāluakumamāhā iā Maʻazia.

¹⁹ ʻO ia ka hoʻonoho papa ʻana iā lākou no kā lākou hana e hele mai ai i loko o ka hale o Iēhova, e like me kā lākou i hana ai ma muli o ʻAʻarona ʻo ko lākou makua kāne, me kā Iēhova ke Akua o ʻIseraʻela i kauoha mai ai iā ia.

²⁰ ¶ No nā keiki kāne a Levi i koe, no nā keiki kāne a ʻAmerama: ʻo Subaʻela, no nā keiki kāne a Subaʻela: ʻo Iehedeia.

²¹ No Rehebia: no nā keiki kāne a Rehebia, ʻo ʻIsehia ka mua.

²² No ka ʻIzehara: ʻo Selomota; no nā keiki a Selomota: ʻo Iahata.

²³ ʻO nā keiki kāne a Heberona: ʻo Ieria ka mua, ʻo ʻAmaria ka lua, ʻo Iahaziʻela ke kolu, a ʻo Iekameama ka hā.

²⁴ No nā keiki kāne a ʻUziʻela: ʻo Mika; no nā keiki kāne a Mika: ʻo Samira.

²⁵ ʻO ʻIsehia ke kaikaina o Mika; no nā keiki kāne a ʻIsehia: ʻo Zekaria.

²⁶ ʻO nā keiki kāne a Merari: ʻo Maheli a ʻo Musi; no nā keiki kāne a Iaʻazia: ʻo Beno.

²⁷ ʻO nā keiki kāne a Merari ma o Iaʻazia lā: ʻo Beno, ʻo Sohama, ʻo Zakura, a ʻo ʻIberi.

²⁸ Na Maheli ʻo ʻEleazara, ʻaʻohe āna keiki kāne.

²⁹ No Kisa: ʻo Ierahemeʻela ke keiki kāne a Kisa.

³⁰ ʻO nā keiki kāne hoʻi a Musi: ʻo Maheli, ʻo ʻEdera, a ʻo Ierimota. ʻO lākou nā keiki kāne a nā Levi ma muli o ka ʻohana o ko lākou mau mākua kāne.

³¹ Puʻu ihola nō hoʻi lākou e kū pono aku ana i ko lākou poʻe hoahānau nā mamo a ʻAʻarona, i mua hoʻi o ke aliʻi ʻo Dāvida, a ʻo Zadoka, a ʻo ʻAhimeleka, a me nā mākualiʻi o nā kāhuna a me kā Levi, ʻo ia hoʻi, nā luna mākua kāne e kū pono ana i ko lākou poʻe kaikaina.