KA BUKE MUA O KA ʻOIHANA ALIʻI 23 - Ka Baibala Hemolele

1 Na Dāvida i hoʻoaliʻi iā Solomona. 2 Ua helu ʻia ka poʻe Levi, a ua hoʻonoho papa ʻia.

MOKUNA XXIII.

¹ ¶ I ka wā i ʻelemakule ai ʻo Dāvida, a he nui kona mau lā, hoʻolilo ihola ʻo ia iā Solomona i aliʻi no kā ʻIseraʻela.

² Hōʻuluʻulu aʻela ia i nā aliʻi a pau o kā ʻIseraʻela, me nā kāhuna a me kā Levi.

³ A ua helu ʻia nā Levi mai ka makahiki he kanakolu a ma luna aʻe; a ʻo ko lākou helu ʻana ma ko lākou poʻo, i pākahi ʻia kēlā kanaka kēia kanaka, he kanakolukumamāwalu tausani.

⁴ He iwakāluakumamāhā tausani o kēia poʻe, he kōkua kā lākou i ka hana o ko Iēhova hale; a ʻeono tausani, he poʻe ilāmuku a me nā luna kānāwai lākou.

⁵ A he poʻe kiaʻi puka nā tausani ʻehā; a ʻehā tausani hoʻi i hoʻoleʻa iā Iēhova, “me nā mea kani aʻu i hana ai, i mea hoʻoleʻa,” wahi a Dāvida.

⁶ Puʻunaue maila ʻo Dāvida iā lākou i nā papa ma muli o nā keiki kāne a Levi: ʻo Geresona, ʻo Kohata, a ʻo Merari.

⁷ ¶ No ka Geresona: ʻo Laʻadana a ʻo Simei.

⁸ ʻO nā keiki kāne a Laʻadana: ʻo ka luna, ʻo Iehiʻela, ʻo Zetama, a ʻo Ioʻela, ʻekolu.

⁹ ʻO nā keiki kāne a Simei: ʻo Selomita, ʻo Haziʻela, a ʻo Harana, ʻekolu. ʻO lākou nā luna o nā mākua kāne na Laʻadana mai.

¹⁰ A ʻo nā keiki kāne a Simei: ʻo Iahata, ʻo Zina, ʻo Ieusa, a ʻo Beria. ʻO lākou ʻehā nā keiki kāne a Zimei.

¹¹ A ʻo Iahata ka luna, ʻo Ziza ka lua; akā, ʻaʻohe nui o nā keiki kāne a Ieusa lāua ʻo Beria; no laila, hoʻokahi o ko lāua helu pū ʻia ʻana, ma muli o ka ʻohana o ko lāua makua kāne.

¹² ¶ ʻO nā keiki kāne a Kohata: ʻo ʻAmerama, ʻo ʻIzehara, ʻo Heberona, a ʻo ʻUziʻela, ʻehā.

¹³ ʻO nā keiki kāne a ʻAmerama: ʻo ʻAʻarona a ʻo Mose; ua hoʻokaʻawale ʻia aʻe ʻo ʻAʻarona, e hoʻolaʻa ʻo ia i nā mea hoʻāno loa, ʻo ia a me kona poʻe keiki kāne a mau loa aku, e kuni i ka mea ʻala i mua o Iēhova, e lawelawe nāna, a e hoʻomaikaʻi ma kona inoa a mau loa aku.

¹⁴ A ʻo Mose ke kanaka no ke Akua, ua helu ʻia kāna mau keiki kāne ma loko o ka ʻohana a Levi.

¹⁵ ʻO nā keiki kāne a Mose: ʻo Geresoma a ʻo ʻEliezera.

¹⁶ ʻO nā keiki kāne a Geresoma: ʻo Sebuʻela ka luna.

¹⁷ A ʻo nā keiki kāne a ʻEliezera: ʻo Rehabia ka luna. ʻAʻohe keiki ʻē aʻe a ʻEliezera; akā, he nui nā keiki kāne a Rehabia.

¹⁸ ʻO nā keiki kāne a ʻIzehara: ʻo Selomita ka luna.

¹⁹ ʻO nā keiki kāne a Heberona: ʻo Ieria ka mua, ʻo ʻAmaria ka lua, ʻo Iahaziʻela ke kolu, a ʻo Iekameama ka hā.

²⁰ ʻO nā keiki kāne a ʻUziʻela: ʻo Mika ka mua, ʻo Iesia ka lua.

²¹ ¶ ʻO nā keiki kāne a Merari: ʻo Maheli a ʻo Musi. ʻO nā keiki kāne a Maheli: ʻo ʻEleazara, a ʻo Kisa.

²² A make ihola ʻo ʻEleazara, ʻaʻohe āna keiki kāne, ʻo nā kaikamāhine wale nō; a ʻo nā hoahānau kāne o lākou, nā keiki kāne a Kisa kai lawe iā lākou.

²³ ʻO nā keiki kāne a Musi: ʻo Maheli, ʻo ʻEdera, a ʻo Ieremota, ʻekolu.

²⁴ ¶ ʻO lākou nā keiki kāne a Levi ma muli o ka ʻohana o ko lākou mau mākua kāne; ʻo ia o nā mākualiʻi, e like me ka helu ʻana iā lākou ma ko lākou poʻo, ʻo ka poʻe nāna i mālama i ka ʻoihana o ka hale o Iēhova, mai ka makahiki he iwakālua mai, a ma laila aku.

²⁵ No ka mea, ʻōlelo maila ʻo Dāvida, “Ua hoʻomaha mai ʻo Iēhova ke Akua o kā ʻIseraʻela i kona poʻe kānaka, a e noho mau loa aku ma Ierusalema.

²⁶ “Eia hoʻi, ʻo nā Levi; ʻaʻole lākou e amo hou i ka halelewa, ʻaʻole hoʻi nā ipu ona no ko laila ʻoihana.”

²⁷ No ka mea, ma nā ʻōlelo hope a Dāvida, ua helu ʻia nā Levi mai ka iwakālua o ka makahiki, a ma laila aku.

²⁸ No ka mea, ʻo kā lākou hana no ka lawelawe na nā keiki kāne a ʻAʻarona, no ka ʻoihana o ka hale o Iēhova, ma nā pā hale, a ma nā keʻena, a i ka huikala ʻana i nā mea laʻa a pau, a me ka hana ʻana i ka ʻoihana o ka hale o ke Akua;

²⁹ no ka berena hōʻike, a no ka palaoa, ka mea mōhai ʻai, a no nā pōpō palaoa hū ʻole, a no ke pā pūlehu, a no ka mea i kōʻala ʻia, a no nā mea ana wai a pau, a me nā ana loa;

³⁰ a no ke kūpono i nā kakahiaka a pau, e hoʻoaloha a e hoʻoleʻa aku iā Iēhova; a pēlā hoʻi i nā ahiahi;

³¹ a no ke kaumaha aku i nā mōhai kuni a pau no Iēhova i nā Sābati, a me nā Mahina Hou, a i nā ʻahaʻaina i kauoha ʻia, e mau ana i mua o Iēhova, ma ka helu ʻana, e like me ke kānāwai i kauoha ʻia mai iā lākou;

³² i mālama ai lākou i ke kauoha no ka halelewa o ke anaina, a me ke kauoha no kahi hoʻāno, a me ke kauoha no nā keiki a ʻAʻarona ko lākou poʻe hoahānau, ma ka ʻoihana o ka hale o Iēhova.