KA BUKE MUA O KA ʻOIHANA ALIʻI 22 - Ka Baibala Hemolele

1 Hoʻomākaukau ʻo Dāvida no ka luakini. 6 Ke kauoha iā Solomona, a me nā lunakahiko e hana i ka luakini no ke Akua.

MOKUNA XXII.

¹ ¶ A laila ʻōlelo maila ʻo Dāvida, “Eia ka hale o Iēhova ke Akua; eia hoʻi ke kuahu o ka mōhai kuni no kā ʻIseraʻela.”

² ¶ Kauoha maila ʻo Dāvida, e hōʻuluʻulu mai i nā kānaka e noho ana i ka ʻāina o kā ʻIseraʻela; a hoʻonoho ihola ia i nā kālai pōhaku e kālai i nā pōhaku i mea e hana ai i ka hale o ke Akua.

³ Hoʻomākaukau ihola ʻo Dāvida i ka hao he nui loa no nā kui o nā pani puka o ka pā, a no nā lou hao; a me ke keleawe he nui loa ʻaʻole i kaupaona ʻia.

⁴ A me nā lāʻau kedera he nui loa; no ka mea, na ko Zidona a me ko Turo i lawe mai i ka lāʻau kedera he nui iā Dāvida.

⁵ ʻĪ maila ʻo Dāvida, “He ʻōpiopio kuʻu keiki ʻo Solomona, a he palupalu hoʻi; a ʻo ka hale e hana ʻia ana no Iēhova, he mea nani nui loa ia, he mea kaulana ma nā ʻāina a pau no kona maikaʻi; e hoʻomākaukau nō wau i nā mea nona.” No laila, i hoʻomākaukau nui loa ʻo Dāvida ma mua o kona make ʻana.

⁶ ¶ A laila, hea akula ia i kāna keiki iā Solomona, a kauoha akula iā ia e hana i hale no Iēhova ke Akua o kā ʻIseraʻela.

⁷ ʻŌlelo akula ʻo Dāvida iā Solomona, “E kuʻu keiki ē, ʻo wau nei lā, aia nō i loko o kuʻu naʻau ka manaʻo e hana i hale no ka inoa ʻo Iēhova kuʻu Akua;

⁸ akā, hiki maila ka ʻōlelo a Iēhova i oʻu nei, ʻī maila, ‘Ua hoʻokahe ʻoe i ke koko a nui loa, a ua kaua hoʻi ʻoe i nā kaua nui; mai hana ʻoe i hale no kuʻu inoa; no ka mea, he nui loa ke koko āu i hoʻokahe ai ma ka honua i mua o koʻu mau maka.

⁹ ‘Aia hoʻi, e hānau ke keiki kāne nāu, he kanaka hoʻomaha nō ia; a e hoʻomaha auaneʻi au iā ia mai kona poʻe ʻenemi a pau e noho ana a puni; no ka mea, ʻo Solomona kona inoa, a e hāʻawi auaneʻi au i ka maluhia a me ka maha no kā ʻIseraʻela i kona mau lā.

¹⁰ ‘Nāna nō e hana ka hale no koʻu inoa, a e lilo auaneʻi ia i keiki naʻu, a ʻo wau auaneʻi kona makua, a e hoʻokūpaʻa nō wau i ka noho aliʻi o kona aupuni ma luna o kā ʻIseraʻela, a mau loa aku.’

¹¹ “ʻĀnō hoʻi, e kuʻu keiki, me ʻoe pū ʻo Iēhova; a e pōmaikaʻi auaneʻi ʻoe; a e hana ʻoe i ka hale o Iēhova ʻo kou Akua, e like me kāna i ʻōlelo mai ai nou.

¹² “E hāʻawi ʻiʻo mai ʻo Iēhova nou i ke akamai a me ka naʻauao, a e kauoha mai iā ʻoe no kā ʻIseraʻela, i mālama aku ai ʻoe i ke kānāwai o Iēhova ʻo kou Akua.

¹³ “A laila ʻoe e pōmaikaʻi, inā ʻoe e hoʻomanaʻo e hoʻokō i nā kānāwai a me nā kauoha a Iēhova i hāʻawi mai ai iā Mose no kā ʻIseraʻela; e hoʻoikaika ʻoe, a e koa hoʻi; mai makaʻu ʻoe, ʻaʻole hoʻi e pauaho.

¹⁴ “ʻĀnō hoʻi, i kuʻu ʻilihune ʻana, ua hoʻomākaukau iho nō wau no ka hale o Iēhova, i hoʻokahi haneri tausani tālena gula, a me ka tausani tausani tālena kālā; a ʻo ke keleawe a me ka hao, ʻaʻole i kaupaona ʻia; no ka mea, he nui loa; ua hoʻomākaukau hoʻi au i ka lāʻau a me nā pōhaku, a nāu nō e hoʻomāhuahua aʻe i laila.

¹⁵ “He nui nō hoʻi nā paʻahana iā ʻoe, nā mea kālai a me nā mea kāpili pōhaku a me ka lāʻau, a me nā kānaka akamai he nui i ka hana i nā hana a pau.

¹⁶ “ʻO ke gula a me ke kālā, ʻo ke keleawe a me ka hao, ʻaʻole i helu ʻia. E kū aʻe ʻoe, a e hana aku, a me ʻoe pū nō ʻo Iēhova.”

¹⁷ ¶ Kauoha maila hoʻi ʻo Dāvida i nā aliʻi a pau o kā ʻIseraʻela, e kōkua iā Solomona kāna keiki,

¹⁸ ʻaʻole anei ʻo Iēhova ʻo ko ʻoukou Akua me ʻoukou? ʻAʻole anei i hoʻomaha mai ʻo ia iā ʻoukou ma kēlā ʻaoʻao a ma kēia ʻaoʻao? No ka mea, ua hāʻawi maila ia i nā kānaka o ka ʻāina i loko o koʻu lima; a ua hoʻopio ʻia ka ʻāina i mua o Iēhova a i mua o kona poʻe kānaka.

¹⁹ “ʻĀnō e hoʻopapau ʻoukou i ko ʻoukou naʻau a me ko ʻoukou ʻuhane e ʻimi aku iā Iēhova i ko ʻoukou Akua; e kū aʻe hoʻi ʻoukou, a e hana i ka luakini o Iēhova ke Akua; i lawe ʻia aku ai ka pahu berita o Iēhova, a me nā ipu laʻa no ke Akua, i loko o ka hale e hana ʻia ana no ka inoa ʻo Iēhova.”