KA BUKE MUA O KA ʻOIHANA ALIʻI 21 - Ka Baibala Hemolele

1 No ka helu ʻana i nā kānaka o kā ʻIseraʻela. 7 Ua huhū ke Akua, a ua hoʻouna maila iā Gada, e haʻi iā Dāvida. 14 Ka maʻi ahulau. 28 Ka mōhai a Dāvida.

MOKUNA XXI.

¹ ¶ Kūʻē maila ʻo Sātana i kā ʻIseraʻela, a hoʻowalewale maila iā Dāvida e helu aku i kā ʻIseraʻela.

² ʻŌlelo akula ʻo Dāvida iā Ioaba a i nā luna o kānaka, “Ō uhaele, e helu i kā ʻIseraʻela, mai Beʻereseba a hiki i Dana: a e lawe mai i ko lākou helu ʻana i oʻu nei, i ʻike au.”

³ ʻEkemu maila ʻo Ioaba, “E hoʻonui ʻo Iēhova i kona poʻe kānaka, a pāhaneri hou aku; akā, e kuʻu haku, e ke aliʻi, ʻaʻole anei lākou a pau nā kauā a kuʻu haku? No ke aha lā hoʻi e makemake nei kuʻu haku ia mea? No ke aha lā ʻo ia e lilo ai i kumu e lawehala ai ʻo kā ʻIseraʻela?”

⁴ Akā, ua ikaika ka ʻōlelo a ke aliʻi ma luna o Ioaba. No laila, hele akula ʻo Ioaba, a kaʻahele ma waena o ʻIseraʻela a pau, a hoʻi maila i Ierusalema.

⁵ Hāʻawi akula ʻo Ioaba i ka huina o ka helu ʻana i nā kānaka iā Dāvida. A ʻo ka helu ʻana i kā ʻIseraʻela a pau, he tausani tausani a me ka haneri tausani keu ka poʻe i unuhi i ka pahi kaua; a no kā Iuda ʻehā haneri a me kanahiku tausani kānaka kai unuhi i ka pahi kaua.

⁶ Akā, ʻaʻole ia i helu i kā Levi a me kā Beniamina; no ka mea, ua hoʻowahāwahā ʻia ka ʻōlelo a ke aliʻi e Ioaba.

⁷ A he hewa nō ia mea i mua o nā maka o Iēhova; no laila ia i hahau ai i kā ʻIseraʻela.

⁸ ʻŌlelo akula ʻo Dāvida i ke Akua, “Ua hana lapuwale iho nei au i kuʻu hana ʻana ia mea; a ke noi aku nei au iā ʻoe, e kala aʻe ʻoe i ka hewa o kāu kauā; no ka mea, ua hana lapuwale loa nō wau.”

⁹ ¶ ʻŌlelo maila ʻo Iēhova iā Gada i ko Dāvida kāula, ʻī maila,

¹⁰ “Ō hele e haʻi iā Dāvida, i ka ʻī ʻana aku, ‘Eia kā Iēhova e ʻōlelo mai nei, “Ke hōʻike aku nei au nou i ʻekolu mau mea; e koho ʻoe i kekahi o lākou, i hana aku ai au ia iā ʻoe.”’”

¹¹ A hele maila ʻo Gada, ʻī maila iā ia, “Eia kā Iēhova e ʻōlelo mai nei, ‘E koho ʻoe nou,

¹² i nā makahiki wī ʻekolu paha; a ʻekolu nā malama paha e heʻe ai i mua o kou poʻe ʻenemi, a loaʻa mai ʻoukou i ka pahi kaua o kou poʻe ʻenemi; a eia paha, ʻekolu lā o ka pahi kaua o Iēhova, ʻo ia ke ahulau ma ka ʻāina, a ʻo ka ʻānela o Iēhova e luku mai ana ma nā palena a pau o kā ʻIseraʻela.’ No laila hoʻi, a kūkā iho ʻoe i ka ʻōlelo naʻu e hoʻihoʻi aku i ka mea nāna au i hoʻouna mai.”

¹³ ʻŌlelo maila ʻo Dāvida iā Gada, “He pilikia nui koʻu; e aho e hāʻule iho au ʻānō i loko o ka lima o Iēhova; no ka mea, he nui loa kona aloha; ʻaʻole au make hāʻule i loko o ka lima o kānaka.”

¹⁴ A hoʻouna maila ʻo Iēhova i ke ahulau i luna o kā ʻIseraʻela; a make ihola nā kānaka o kā ʻIseraʻela he kanahiku tausani.

¹⁵ A hoʻouna maila ke Akua i kekahi ʻānela i Ierusalema e luku iho ia wahi; a i kona luku ʻana, nānā maila ʻo Iēhova, a hoʻololi ihola i kona manaʻo hōʻino mai; a ʻī maila ia i ka ʻānela nāna i luku mai, “Uoki, e alia kou lima ʻānō.” A kū ihola ka ʻānela o Iēhova ma kahi hehi palaoa o ʻOrenana ka Iebusa.

¹⁶ Nānā aʻela nā maka o Dāvida i luna, a ʻike akula i ka ʻānela o Iēhova e kū ana ma waena o ka honua a ʻo ka lani, a he pahi kaua i unuhi ʻia ma kona lima i ʻō ʻia aku ma luna o Ierusalema. A laila, ʻo Dāvida a me nā lunakahiko i ʻaʻahu ʻia i ke kapa ʻinoʻino, hāʻule ihola lākou i lalo ke alo.

¹⁷ ʻŌlelo akula ʻo Dāvida i ke Akua, “ʻAʻole anei ʻo wau ka mea i kauoha aku e helu ʻia ai nā kānaka? ʻO wau ʻiʻo nō ka mea i hewa, a i hana i kēia mea ʻino maoli. Akā, ʻo kēia poʻe hipa, he aha kā lākou i hana ai? Ke noi aku nei au iā ʻoe, e Iēhova kuʻu Akua, e kau mai i kou lima ma luna iho oʻu a ʻo ka ʻohana a koʻu makua kāne; ʻaʻole ma luna o kou poʻe kānaka, e make ai lākou.”

¹⁸ ¶ A laila, kauoha maila ka ʻānela o Iēhova iā Gada, e ʻōlelo aku iā Dāvida, e piʻi aku ʻo Dāvida, a e kūkulu i kuahu no Iēhova ma kahi hehi palaoa o ʻOrenana ka Iebusa.

¹⁹ Piʻi akula ʻo Dāvida no ka ʻōlelo ʻana a Gada, āna i ʻōlelo ai ma ka inoa ʻo Iēhova.

²⁰ Hāliu aʻela ʻo ʻOrenana i hope, a ʻike akula i ka ʻānela, a laila peʻe ihola ʻo ia a me kāna mau keiki kāne ʻehā me ia. E hehi palaoa ana ʻo ʻOrenana.

²¹ A i ka hele ʻana mai o Dāvida i o ʻOrenana lā, nānā aʻela ʻo ʻOrenana, a ʻike akula iā Dāvida, a hele akula ia i waho o kahi hehi palaoa, a kūlou ihola ia i mua o Dāvida, i lalo ke alo ma ka honua.

²² A laila, ʻī maila ʻo Dāvida iā ʻOrenana, “E hāʻawi mai ʻoe i ka wahi hehi palaoa, i kūkulu iho ai au i laila i kuahu no Iēhova; e hāʻawi mai ʻoe iaʻu ia no ke kumu kūʻai maoli; i hoʻōki ʻia ai ke ahulau mai nā kānaka aku.”

²³ ʻĪ akula ʻo ʻOrenana iā Dāvida, “E lawe ʻoe nou, a e hana iho kuʻu haku ke aliʻi i ka mea pono i mua o kona maka. Aia hoʻi, ke hāʻawi aku nei au i nā bipi no nā mōhai kuni, a me nā lāʻau kaʻa palaoa i wahie, a me ka palaoa i mōhai ʻai; ke hāʻawi aku nei au ia a pau loa.”

²⁴ ʻŌlelo maila ʻo Dāvida ke aliʻi iā ʻOrenana, “ʻAʻole; akā, he ʻoiaʻiʻo nō, e kūʻai nō au ia wahi no ke kumu kūʻai maoli; no ka mea, ʻaʻole au e lawe i kāu no Iēhova, ʻaʻole hoʻi e kaumaha aku i nā mōhai kuni i kūʻai ʻole ʻia.”

²⁵ A uku aku ʻo Dāvida iā ʻOrenana i ʻeono haneri sekela gula ma ke kaupaona ʻana, no ia wahi.

²⁶ A hana ihola ʻo Dāvida i kuahu no Iēhova ma laila, a kaumaha akula i nā mōhai kuni, a me nā mōhai hoʻomalu, a kāhea akula ʻo ia iā Iēhova; a maliu maila ʻo ia iā ia mai ka lani mai i ke ahi ma luna o ke kuahu mōhai kuni.

²⁷ Kauoha maila ʻo Iēhova i ka ʻānela; a hoʻihoʻi aʻela ia i ka pahi kaua ma loko o kona wahī.

²⁸ ¶ Ia manawa nō, a ʻike akula ʻo Dāvida ua maliu mai ʻo Iēhova iā ia ma kahi hehi palaoa o ʻOrenana ka Iebusa, a laila mōhai akula ia ma ia wahi.

²⁹ No ka mea, ʻo ka halelewa o Iēhova, a Mose i hana ai i loko o ka wao akua, a me ke kuahu mōhai kuni, aia nō ia i kēlā manawa ma kahi kiʻekiʻe o Gibeona.

³⁰ Akā, ʻaʻole i hiki iā Dāvida ke hele i laila e nīnau i ke Akua i mua ona; no ka mea, ua makaʻu ʻo ia i ka pahi kaua o ka ʻānela o Iēhova.