Biblia Todo Logo
Bìoball air-loidhne

- Sanasan -

KA BUKE MUA O KA ʻOIHANA ALIʻI 18 - Ka Baibala Hemolele


1 Ka lanakila o Dāvida ma luna o nā Pilisetia a me kā Moaba. 3 Ke kaua ʻana me ko Suria. 9 Ka hele ʻana mai o ke keiki a Tou ke aliʻi o Hamata me nā makana. 12 Ko Dāvida aliʻi pōmaikaʻi ʻana. 15 Nā luna o Dāvida.


MOKUNA XVIII.

1 ¶ Ma hope mai o kēia mea, pepehi akula ʻo Dāvida i nā Pilisetia, a hoʻopau ʻia lākou; a lawe aʻela ʻo ia iā Gata, a me nā kūlanahale ona mai loko aʻe o ka lima o nā Pilisetia.

2 Pepehi aku hoʻi ʻo ia i kā Moaba; a lilo maila nā Moaba i poʻe kauā na Dāvida, a lawe maila hoʻi lākou i ka waiwai hoʻokupu.

3 Pepehi akula hoʻi ʻo Dāvida iā Hadarezera ke aliʻi o Zoba, a hiki i Hamata, iā ia i hele aku ai e hoʻopaʻa i kona aupuni ma ka muliwai ʻo ʻEuperate.

4 Lawe aʻela ʻo Dāvida mai ona aku i nā hale kaʻa he tausani, me nā hoʻoholo lio ʻehiku tausani, a me nā tausani kānaka kani wāwae he iwakālua; ʻoki ihola hoʻi ʻo Dāvida i ke olonā wāwae o nā lio a pau o nā hale kaʻa; akā, hoʻokoe ihola ia i hoʻokahi haneri o nā lio hale kaʻa.

5 ¶ A i ka hele ʻana mai o ko Suria no Damaseko e kōkua ma muli o Hadarezera, ke aliʻi o Zoba, pepehi akula ʻo Dāvida i ko Suria he iwakāluakumamālua nā tausani kānaka.

6 A hana ihola ʻo Dāvida i nā pā kaua ma Suria no Damaseko, a lilo aʻela ko Suria i poʻe kauā na Dāvida, a lawe maila i ka waiwai hoʻokupu. Pēlā ʻo Iēhova i mālama mai ai iā Dāvida i nā wahi a pau āna i hele ai.

7 Lawe aʻela hoʻi ʻo Dāvida i nā pale kaua gula ma luna o nā kauā a Hadarezera ke aliʻi o Zoba, a lawe maila ia mau mea i Ierusalema.

8 Lawe maila hoʻi ʻo Dāvida i ke keleawe he nui loa, mai Tibehata mai, a mai Kuna hoʻi, ʻo nā kūlanakauhale ia o Hadarezera; ka mea kēia i hana ʻia ai e Solomona ke kai keleawe, me nā pou a me nā ipu keleawe.

9 ¶ A lohe aʻela ʻo Tou ke aliʻi o Hamata, ua pepehi ʻo Dāvida i ka poʻe kaua a pau o Hadarezera, ʻo ke aliʻi no Zoba;

10 hoʻouna maila ʻo ia i kāna keiki iā Hadorama i o Dāvida lā, e hoʻoaloha iā ia, a e hoʻomaikaʻi iā ia, no kona kaua ʻana iā Hadarezera, a ua pepehi iā ia; (no ka mea, he kanaka ʻo Hadarezera i kaua aku me Tou); a me ia nō nā ipu gula, nā ipu kālā a me nā ipu keleawe he nui loa.

11 Hoʻolaʻa akula ʻo Dāvida ke aliʻi ia mau mea no Iēhova, me ke kālā a me ke gula āna i lawe mai ai no nā lāhui kanaka a pau; mai kā ʻEdoma mai, mai kā Moaba mai, a mai ka poʻe mamo mai a ʻAmona, a mai ko Pilisetia, a mai kā ʻAmeleka mai.

12 ¶ A pepehi akula ʻo ʻAbisai ke keiki a Zeruia i nā kānaka o ʻEdoma he ʻumikumamāwalu tausani, ma ke Awāwa Paʻakai.

13 Hana ihola hoʻi ʻo ia i nā pā kaua ma ʻEdoma; a lilo aʻela kā ʻEdoma a pau i poʻe kauā na Dāvida. Pēlā ʻo Iēhova i mālama mai ai iā Dāvida i nā wahi a pau āna i hele aku ai.

14 ¶ A noho aliʻi ihola ʻo Dāvida ma luna o kā ʻIseraʻela a pau, a hoʻokō akula i ke kānāwai me ka hoʻopono aku i waena o kona poʻe kānaka a pau.

15 A ʻo Ioaba ke keiki a Zeruia, ʻo ia ka luna kaua; a ʻo Iehosapata ke keiki a ʻAhiluda ke kākāʻōlelo.

16 A ʻo Zadoka ke keiki a ʻAhituba, a me ʻAbimeleka ke keiki a ʻAbiatara nā kāhuna; a ʻo Savasa ke kākau ʻōlelo;

17 a ʻo Benaia ke keiki a Iehoiada, ma luna ia o ka poʻe Kereti a me ka poʻe Peleti; a ʻo nā keiki kāne a Dāvida, he mau luna lākou me ke aliʻi.

Ka Baibala Hemolele © Partners Development Foundation, 2018.

Partners in Development Foundation
Lean sinn:



Sanasan