KA BUKE MUA O KA ʻOIHANA ALIʻI 17 - Ka Baibala Hemolele

1 Ua pāpā ʻia mai ʻo Dāvida i ka hana i luakini no Iēhova. 16 Ka pule a me ka hoʻoleʻa a Dāvida.

MOKUNA XVII.

¹ ¶ Aia i ko Dāvida noho ʻana i loko o kona hale, ʻōlelo maila ʻo Dāvida iā Natana ke kāula, “Eia au ke noho nei i loko o ka hale kedera; akā, ʻo ka pahu berita o Iēhova, aia nō ia ma lalo o nā pākū.”

² A laila, ʻī akula ʻo Natana iā Dāvida, “E hana ʻoe i ka mea a pau ma loko o kou naʻau; no ka mea, me ʻoe pū nō ke Akua.”

³ A ia pō iho nō, hiki maila ka ʻōlelo a ke Akua iā Natana, ʻī maila,

⁴ “E hele aku ʻoe, e haʻi iā Dāvida i kuʻu kauā, ‘Penei kā Iēhova i ʻōlelo mai nei, “Mai hana ʻoe i hale noʻu e noho ai.

⁵ “No ka mea, ʻaʻole au i noho i loko o ka hale maoli, mai ka manawa mai aʻu i kaʻi mai nei i kā ʻIseraʻela a hiki i kēia manawa; akā, ua hele au mai kekahi hale lole, a hiki i kekahi hale lole, a mai kekahi halelewa a kekahi halelewa.

⁶ “I nā wahi aʻu i hele pū ai me kā ʻIseraʻela a pau, i ʻōlelo anei au i kekahi luna kānāwai o kā ʻIseraʻela, aʻu i kauoha aku ai e hānai i koʻu poʻe kānaka, i ka ʻī ʻana aku, ‘No ke aha lā ʻoukou i hana ʻole ai i hale kedera noʻu?’”’

⁷ “No laila lā, e ʻōlelo aku ʻoe i kuʻu kauwā iā Dāvida, ‘Eia kā Iēhova o nā kaua i ʻōlelo mai nei, “I lawe mai nō wau iā ʻoe mai ka pā hipa mai, ma muli mai hoʻi o ka poʻe hipa, i aliʻi ʻoe ma luna o koʻu poʻe kānaka o kā ʻIseraʻela.

⁸ “ʻO wau nō kekahi pū me ʻoe i nā wahi a pau āu i hele ai, a ua hōʻoki iho nō wau i nā ʻenemi ou a pau mai kou maka aku, a ua hoʻokaulana au i kou inoa, e like me ka inoa o nā kānaka nui ma ka honua nei.

⁹ “Naʻu hoʻi e hōʻike aku i wahi no koʻu poʻe kānaka no kā ʻIseraʻela, a e kanu iho nō au iā lākou, a e noho iho lākou ma ko lākou wahi, ʻaʻole e neʻe hou aku lākou; ʻaʻole hoʻi e hoʻopōʻino hou mai ka poʻe keiki na ka hewa iā lākou, e like ma mua,

¹⁰ a mai ka manawa mai aʻu i hoʻonoho ai i nā luna kānāwai ma luna o koʻu poʻe kānaka o kā ʻIseraʻela. Eia hoʻi, naʻu nō e hoʻopau auaneʻi i kou poʻe ʻenemi a pau. A eia hoʻi kekahi, ke haʻi aku nei au iā ʻoe, na Iēhova nō e hana i hale nou.

¹¹ “A i ka manawa i hala aʻe kou mau lā, a hele ʻoe me ou mau mākua, naʻu nō e hoʻokū aʻe i kāu hua ma hope ou, no nā keiki āu; a e hoʻokūpaʻa auaneʻi au i kona aupuni.

¹² “Nāna nō e hana i hale noʻu, a e hoʻokūpaʻa mau loa auaneʻi au i kona noho aliʻi.

¹³ “ʻO wau auaneʻi kona makua, a e lilo ʻo ia i keiki naʻu; ʻaʻole au e lawe aku i kuʻu aloha mai ona aku, me aʻu i lawe aku ai ia mai kou mua aku.

¹⁴ “Akā, e hoʻonoho au iā ia ma loko o kuʻu hale a i loko o kuʻu aupuni a mau loa aku; a e hoʻokūpaʻa mau loa ʻia kona noho aliʻi.”’”

¹⁵ Ma nēia mau hua ʻōlelo a pau, a ma kēia hihiʻo a pau, kā Natana i ʻōlelo aku ai iā Dāvida.

¹⁶ ¶ A hele akula ʻo Dāvida ke aliʻi, a noho akula i mua o Iēhova, ʻōlelo akula, “ʻO wai lā wau, e Iēhova ke Akua, he aha hoʻi kaʻu ʻohana i mālama mai ai ʻoe iaʻu a hiki i nēia wā?

¹⁷ “He mea ʻuʻuku hoʻi kēia i mua o kou maka, e ke Akua; a ua ʻōlelo mai hoʻi ʻoe no ka ʻohana a kāu kauā a liʻuliʻu aku ma hope; a ua hoʻomanaʻo mai ʻoe iaʻu ma kā ke kanaka kiʻekiʻe, e Iēhova ke Akua.

¹⁸ “He aha ka mea hou aku e hiki iā Dāvida ke ʻōlelo aku iā ʻoe no ka pono o kāu kauā? No ka mea, ua ʻike ʻoe i kāu kauā.

¹⁹ “E Iēhova, no ka pono o kāu kauā, a e like me ko loko o kou naʻau, ua hana mai ʻoe i kēia mea nui a pau, ma ka hōʻike ʻana mai i nā mea nui a pau.

²⁰ “E Iēhova ē, ʻaʻohe ou mea like, ʻaʻohe Akua ʻē aʻe, ʻo ʻoe wale nō, ma ka mea a pau a mākou i lohe ai ma ko mākou pepeiao.

²¹ “ʻAuhea lā kekahi lāhui kanaka ma ka honua nei e like me kou poʻe kānaka o kā ʻIseraʻela, ka poʻe a ke Akua i kiʻi aku ai e hoʻōla i poʻe kānaka nona, i mea e kaulana ai kou inoa i nui ia, a i weliweli, ma ka hoʻokuke ʻana aku i nā lāhui kanaka mai ke alo aku o kou poʻe kānaka āu i hoʻōla ai mai ʻAigupita mai?

²² “No ka mea, ua hoʻolilo ʻoe i kou poʻe kānaka kā ʻIseraʻela i poʻe kānaka nou, a mau loa aku; a ua lilo mai ʻoe, e Iēhova, i Akua no lākou.

²³ “No laila hoʻi, e Iēhova, e hoʻokūpaʻa mau loa ʻoe i ka ʻōlelo āu i ʻōlelo mai ai no kāu kauā, a me kāna ʻohana, a e hana mai e like me kāu i ʻōlelo ai.

²⁴ “ʻOiaʻiʻo, e hoʻokūpaʻa ʻoe, i hoʻonui mau loa ʻia kou inoa, i ka ʻī ʻana, ‘ʻO Iēhova o nā kaua, ʻo ia ke Akua o kā ʻIseraʻela, ke Akua ia i kā ʻIseraʻela; a e hoʻokūpaʻa ʻia ka ʻohana a kāu kauā a Dāvida i mua ou.’

²⁵ “No ka mea, ua hōʻike mai ʻoe, e kuʻu Akua, i ka pepeiao o kāu kauā, e hana ʻoe i hale nona; no laila, ua manaʻo iho kāu kauā e pule aku i mua ou.

²⁶ “ʻĀnō hoʻi, e Iēhova, ʻo ʻoe nō ke Akua, a ua haʻi mai ʻoe i kēia lokomaikaʻi i kāu kauā.

²⁷ “No laila hoʻi, ua leʻaleʻa ʻoe e hoʻopōmaikaʻi mai i ka ʻohana a kāu kauā, i mau loa ia i mua ou; no ka mea, ke hoʻopōmaikaʻi mai nei ʻoe, e Iēhova, a e pōmaikaʻi mau loa nō ia.”