KA BUKE MUA O KA ʻOIHANA ALIʻI 16 - Ka Baibala Hemolele

1 No ke kau ʻana i ka pahu o ke Akua ma ka hale lole, a me ka ʻahaʻaina o kānaka. 7 Ka Halelū a Dāvida. 37 Ka poʻe memele i mua o Iēhova. 43 Ka hoʻi ʻana o nā kānaka.

MOKUNA XVI.

¹ ¶ Pēlā lākou i lawe mai ai i ka pahu o ke Akua, a hoʻokau ihola iā ia i waenakonu o ka halelewa a Dāvida i kūkulu ai nona; a mōhai akula lākou i nā mōhai kuni a me nā mōhai hoʻomalu i mua o ke Akua.

² I ka wā i hoʻopau ai ʻo Dāvida i ka mōhai aku i nā mōhai kuni a me nā mōhai hoʻomalu, hoʻomaikaʻi maila ia i nā kānaka ma ka inoa ʻo Iēhova.

³ A hāʻawi pākahi maila ia i kā ʻIseraʻela a pau, i nā kāne a me nā wāhine, i kēlā mea i kēia mea, i ka pōpō berena a me kauwahi iʻa, a me kekahi paʻi hua waina.

⁴ ¶ A hoʻonoho ihola ia i kekahi poʻe o nā Levi e lawelawe i mua o ka pahu o Iēhova, e hoʻohiki, e hoʻomaikaʻi, a e hoʻoleʻa aku iā Iēhova i ke Akua no kā ʻIseraʻela:

⁵ ʻo ʻAsapa ka luna, a ma lalo iho o Zekaria, ʻo Ieiʻela, ʻo Semiramota, ʻo Iehiʻela, ʻo Matitia, ʻo ʻEliaba, ʻo Benaia a ʻo ʻObeda-ʻEdoma: a ʻo ʻIeiʻela me nā pesaleteria a me nā lira; akā, hoʻokani aʻela ʻo ʻAsapa me nā kimebala;

⁶ ʻo Benaia hoʻi a ʻo Iehaziʻela nā kāhuna, me nā pū e mau ana i mua o ka pahu berita o ke Akua.

⁷ ¶ Ia lā iho nō, hāʻawi mua maila ʻo Dāvida i ka mililani iā Iēhova, ma loko o ka lima o ʻAsapa a ʻo kona poʻe hoahānau.

⁸ E mililani aku iā Iēhova, e kāhea aku i kona inoa. E hōʻike aku i kāna mau hana i waena o kānaka!

⁹ E mele aku iā ia, e mele halelū aku iā ia; E kamaʻilio ʻoukou i nā hana kupanaha āna a pau!

¹⁰ E kaena ʻoukou no kona inoa hoʻāno; E ʻoliʻoli ka naʻau o ka poʻe ʻimi aku iā Iēhova!

¹¹ E ʻimi aku ʻoukou iā Iēhova a me kona ikaika; E ʻimi mau aku i kona maka!

¹² E hoʻomanaʻo i nā hana mana āna i hana ai, I nā mea kupanaha āna, a me nā ʻōlelo hoʻopono a kona waha;

¹³ E nā hua a ʻIseraʻela a kāna kauā, Nā mamo hoʻi a Iakoba, ʻo kona poʻe i wae ʻia!

¹⁴ ʻO ia ʻo Iēhova ko kākou Akua; Aia ma ka honua a pau kāna mau ʻōlelo hoʻopono.

¹⁵ E mālama mau ʻoukou i kāna berita, I ka ʻōlelo āna i kauoha mai ai i nā hanauna he tausani;

¹⁶ Āna i hana ai me ʻAberahama, A me kāna hoʻohiki ʻana iā ʻIsaʻaka,

¹⁷ Ua hoʻokūpaʻa ʻo ia ia mea hoʻokahi i kānāwai iā Iakoba, A i berita mau loa iā ʻIseraʻela,

¹⁸ E ʻī mai ana, “No ʻoukou e hāʻawi aku ai au i ka ʻāina ʻo Kanaʻana I kuleana no ko ʻoukou noho hoʻoilina ʻana”;

¹⁹ I ko ʻoukou manawa i ʻuʻuku ai, He ʻuʻuku naʻe, a he poʻe malihini i laila.

²⁰ I ka manawa i hele ai lākou mai kekahi lāhui kanaka a kekahi lāhui kanaka, A mai kahi aupuni a hiki i kēlā aupuni;

²¹ ʻAʻole ia i ʻae mai i kekahi kanaka e hana ʻino mai iā lākou; ʻOiaʻiʻo nō, aʻo maila ʻo ia i nā aliʻi no lākou,

²² “Mai hoʻopā aku i kuʻu poʻe i poni ʻia, Mai hōʻino hoʻi i kuʻu mau kāula.”

²³ E mele aku iā Iēhova, e ko ka honua a pau; E hōʻike aku i kona ola, ia lā aku ia lā aku.

²⁴ E haʻi aku i kona nani i nā lāhui kanaka, I kāna mau hana kupanaha i ko nā ʻāina a pau.

²⁵ No ka mea, he nui nō ʻo Iēhova, a e hoʻomaikaʻi nui ʻia; E weliweli ʻia hoʻi ʻo ia ma luna o nā akua a pau.

²⁶ No ka mea, ʻo nā akua a pau o nā kānaka, he poʻe kiʻi lākou; Akā, na Iēhova i hana nā lani.

²⁷ Ma kona alo ka nani a me ka mahalo; Ma kona wahi hoʻi ka ikaika a me ka ʻoliʻoli.

²⁸ E hāʻawi aku nō Iēhova, e nā hanauna kanaka, E hāʻawi aku nō Iēhova i ka nani a me ka mana.

²⁹ E hāʻawi aku iā Iēhova i ka nani no kona inoa; E hō mai i ka mōhai, a e hele mai i mua ona. E hoʻomana iā Iēhova ma ka nani o ka hemolele!

³⁰ E weliweli i mua ona, e ko ka honua a pau. E kūpaʻa auaneʻi hoʻi ke ao nei, I hoʻonaue ʻole ʻia ai.

³¹ E hauʻoli ko nā lani, e ʻoliʻoli ko ka honua; E ʻōlelo ʻia hoʻi i waena o nā lāhui kanaka, “ʻO Iēhova e aliʻi ana.”

³² E halulu mai ke kai, a me nā mea i piha ai; E ʻoliʻoli nā mahina ʻai me nā mea a pau o loko.

³³ A laila e kani aku ai nā lāʻau o ka nahele, i ka hiki ʻana mai o Iēhova; No ka mea, ke hele maila ia e hoʻoponopono i ko ka honua.

³⁴ E mililani aku iā Iēhova; no ka mea, he maikaʻi kona! A he mau loa kona aloha.

³⁵ E ʻī aku hoʻi ʻoukou, “E hoʻōla mai iā mākou, E ke Akua nona ko kākou ola, E hōʻuluʻulu iā mākou, a e hoʻopakele iā mākou i ko nā ʻāina ʻē, I aloha aku ai mākou i kou inoa hoʻāno, A e kaena aku ai i kou maikaʻi.”

³⁶ E hoʻomaikaʻi ʻia ke Akua o kā ʻIseraʻela, A mau loa a mau loa aku!

³⁷ ¶ A hoʻonoho akula ʻo ia i mua o ka pahu berita o Iēhova iā ʻAsapa a me kona poʻe hoahānau, e lawelawe mau i mua o ka pahu, e like me ka mea pono e hana ʻia ai i kēlā lā i kēia lā;

³⁸ a me ʻObeda-ʻEdoma, me ko lākou poʻe hoahānau, he kanaonokumamāwalu; ʻo ʻObeda-ʻEdoma hoʻi he keiki a Iedutuna a ʻo Hosa nā kiaʻi puka;

³⁹ a ʻo Zadoka ke kahuna, a me kona poʻe hoahānau nā kāhuna, i mua o ka halelewa o Iēhova, ma ka wahi kiʻekiʻe, aia ma Gibeona,

⁴⁰ e mōhai mau aku ai i nā mōhai kuni iā Iēhova ma luna o ke kuahu, i kakahiaka, a i ke ahiahi, e like me ka mea a pau i kākau ʻia ma ke kānāwai o Iēhova, āna i kauoha mai ai i kā ʻIseraʻela;

⁴¹ me lākou pū ʻo Hemana, ʻo Iedutuna, a ʻo nā mea i wae ʻia e koe, ʻo ka poʻe i kāhea ʻia ma ka inoa, no ka mililani aku iā Iēhova; no ka mea, he mau loa kona aloha;

⁴² a me lākou pū ʻo Hemana a ʻo Iedutuna, me nā pū kani a me nā kimebala, no ka poʻe e pono ke hoʻokani, me nā mea kani a ke Akua. A ʻo nā keiki kāne a Iedutuna nā kiaʻi puka.

⁴³ A hele akula nā kānaka a pau o kēlā kanaka kēia kanaka i kona hale iho; a hoʻi hou akula ʻo Dāvida e hoʻomaikaʻi i ko ka hale ona.