KA BUKE MUA O KA ʻOIHANA ALIʻI 15 - Ka Baibala Hemolele

1 No ka lawe ʻana mai i ka pahu berita mai ka hale mai o ʻObeda-ʻEdoma. 29 No ka hoʻowahāwahā ʻana o Mikala iā Dāvida.

MOKUNA XV.

¹ ¶ Hana ihola ia i nā hale nona ma loko o ke kūlanakauhale o Dāvida, a hoʻomākaukau ihola hoʻi ʻo ia i wahi no ka pahu o ke Akua, a kūkulu ihola i halelewa nona.

² A laila, ʻōlelo maila ʻo Dāvida, “ʻAʻohe mea ʻē aʻe nāna e amo i ka pahu o ke Akua, ʻo nā Levi wale nō; no ka mea, ua koho ʻo Iēhova iā lākou e amo i ka pahu o ke Akua, a e lawelawe nāna a mau loa nō.”

³ Hōʻuluʻulu maila ʻo Dāvida i kā ʻIseraʻela a pau i Ierusalema, e lawe mai i ka pahu o Iēhova i kona wahi, kahi āna i hoʻomākaukau ai nona.

⁴ Hōʻuluʻulu aʻela ʻo Dāvida i nā mamo a ʻAʻarona, a me nā Levi:

⁵ ʻo nā mamo a Kohata: ʻo ʻUriʻela ka luna, a ʻo kona poʻe hoahānau hoʻokahi haneri a me ka iwakālua;

⁶ ʻo nā mamo a Merari; ʻo ʻAsaia ka luna, a ʻo kona poʻe hoahānau he ʻelua haneri a me ka iwakālua;

⁷ ʻo nā mamo a Geresoma: ʻo Ioʻela ka luna, a ʻo kona poʻe hoahānau he haneri a me ke kanakolu;

⁸ ʻo nā mamo a ʻElizapana: ʻo Semaia ka luna, a ʻo kona poʻe hoahānau he ʻelua haneri;

⁹ ʻo nā mamo a Heberona: ʻo ʻEliʻela ka luna, a ʻo kona poʻe hoahānau he kanawalu;

¹⁰ ʻo nā keiki kāne a ʻUziʻela: ʻo ʻAminadaba ka luna, a ʻo kona poʻe hoahānau he haneri a me ka ʻumikumamālua.

¹¹ Kāhea akula ʻo Dāvida iā Zadoka lāua ʻo ʻAbiatara nā kāhuna, a i nā Levi hoʻi, iā ʻUriʻela, ʻAsaia, Ioʻela, Semaia, ʻEliʻela, a me ʻAminadaba,

¹² ʻī akula ʻo ia iā lākou, “ʻO ʻoukou nā luna ʻohana o nā Levi; e huikala iā ʻoukou iho, ʻoukou a me nā hoahānau o ʻoukou, i lawe mai ai ʻoukou i ka pahu o Iēhova ke Akua o kā ʻIseraʻela i kahi aʻu i hoʻomākaukau ai nona.

¹³ “No ka mea, no kā ʻoukou hana ʻole ʻana ia mea, ma mua, i hoʻokae mai ai ʻo Iēhova ko kākou Akua ma luna o kākou, no ko kākou ʻimi ʻole ʻana iā ia ma ka pololei maoli.”

¹⁴ No laila, i huikala ai nā kāhuna a me nā Levi iā lākou iho, i mea e lawe mai ai i ka pahu o Iēhova ke Akua o kā ʻIseraʻela.

¹⁵ A amo maila nā mamo a Levi i ka pahu o ke Akua ma luna o ko lākou poʻohiwi, ma nā ʻauamo o luna, me kā Mose i kauoha mai ai, e like me ka ʻōlelo a Iēhova.

¹⁶ ¶ ʻŌlelo maila ʻo Dāvida i nā luna o nā Levi, e hoʻonoho i ko lākou poʻe hoahānau, i poʻe hoʻoleʻa, me nā mea kani, nā pesaleteria, nā lira, nā kimebala, e hoʻokani ana me ka hoʻokiʻekiʻe ʻana i ka leo me ka ʻoliʻoli.

¹⁷ A hoʻonoho akula nā Levi iā Hemana ke keiki a Ioʻela; a no kona poʻe hoahānau, iā ʻAsapa ke keiki a Berekia; a no nā mamo a Merari ʻo ko lākou poʻe hoahānau, ʻo ʻEtana ke keiki a Kusaia;

¹⁸ a me lākou pū ko lākou mau hoahānau ma muli iho: ʻo Zekaria, ʻo Bena, ʻo Iaʻaziʻela, ʻo Semiramota, ʻo Iehiʻela, ʻo ʻUni, ʻo ʻEliaba, ʻo Benaia, ʻo Maʻaseia, ʻo Matitia, ʻo ʻElipele, ʻo Mikeneia, ʻo ʻObeda-ʻEdoma, a ʻo Ieiʻala nā kiaʻi puka.

¹⁹ Pēlā nā mea hoʻoleʻa, ʻo Hemana, ʻo ʻAsapa, a ʻo ʻEtana, e hoʻokani lākou me nā kimebala keleawe;

²⁰ a ʻo Zekaria, ʻo ʻAziʻela, ʻo Semiramota, ʻo Iehiʻela, ʻo ʻUni, ʻo ʻEliaba, ʻo Maʻaseia, a ʻo Benaia, me nā pesaleteria ma ka leo kiʻekiʻe;

²¹ a ʻo Matitia, ʻo ʻElipele, ʻo Mikeneia, ʻo ʻObeda-ʻEdoma, ʻo Ieiʻela, ʻo ʻAzazia, me nā lira ma ka leo haʻahaʻa e alakaʻi ai;

²² a ʻo Kenania, ka luna o kā Levi, no ka leo mele nō ia; aʻo akula ia i ka leo mele; no ka mea, he akamai kona;

²³ a ʻo Berekia lāua ʻo ʻElekana nā kiaʻi puka no ka pahu;

²⁴ a ʻo Sebenia, ʻo Iehosapata, ʻo Netaneʻela, ʻo ʻAmasai, ʻo Zekeria, ʻo Benaia, a ʻo ʻEliezera, nā kāhuna i puhi i nā pū i mua o ka pahu o ke Akua: a ʻo ʻObeda-ʻEdoma lāua ʻo Iehia nā kiaʻi puka no ka pahu.

²⁵ ¶ Pēlā ʻo Dāvida me nā lunakahiko o kā ʻIseraʻela a me nā luna tausani i hele aku ai, e lawe mai i ka pahu berita o Iēhova, mai ka hale o ʻObeda-ʻEdoma mai me ka ʻoliʻoli.

²⁶ A i ka manawa a ke Akua i kōkua mai ai i nā Levi e amo ana i ka pahu berita o Iēhova, a laila mōhai akula lākou i nā bipi kāne ʻehiku, a me nā hipa kāne ʻehiku.

²⁷ Ua ʻaʻahu ʻia ʻo Dāvida i ka ʻaʻahu mākuʻe, a me nā Levi e amo ana i ka pahu a me ka poʻe memele, a ʻo Kenania ke kumu aʻo i ka mele, a me ka poʻe memele; ma luna hoʻi ʻo Dāvida kekahi ʻēpoda olonā.

²⁸ Pēlā kā ʻIseraʻela a pau i lawe mai ai i ka pahu berita o Iēhova me ka hoʻōho ʻana, a me ke kani ʻana o ke koreneta, a ʻo nā pū, a me nā kimebala, e hoʻokani ana hoʻi i nā pesaleteria a me nā lira.

²⁹ ¶ A hiki maila ka pahu berita o Iēhova i ke kūlanakauhale o Dāvida, nānā maila ʻo Mikala ke kaikamahine a Saula ma ka puka makani, a ʻike maila i ke aliʻi iā Dāvida e haʻa ana a e hoʻokani ana; hoʻowahāwahā ihola ʻo ia iā ia ma loko o kona naʻau.