KA BUKE MUA O KA ʻOIHANA ALIʻI 14 - Ka Baibala Hemolele

1 Ka hāʻawi ʻana mai ʻo Hirama i nā lāʻau a me nā paʻahana e paʻa ai ka hale o Dāvida. 3 Kona pōmaikaʻi ʻana. 4 Nā inoa o nā keiki a Dāvida. 8 Nā kaua a Dāvida.

MOKUNA XIV.

¹ ¶ No Hirama ke aliʻi o Turo, hoʻouna maila ia i nā ʻelele i o Dāvida lā, me nā lāʻau kedera, me nā kālai pōhaku a me nā kamanā, e hana lākou i hale nona.

² A ʻike ihola ʻo Dāvida, na Iēhova ia i hoʻopaʻa i aliʻi ma luna o kā ʻIseraʻela; no ka mea, ua hoʻokiʻekiʻe ʻia kona aupuni i luna, no kona poʻe kānaka, ʻo kā ʻIseraʻela.

³ ¶ Lawe aʻela ʻo Dāvida i nā wāhine hou ma Ierusalema; a na Dāvida mai nā keiki kāne a me nā kaikamāhine hou.

⁴ Eia nā inoa o nā keiki i loaʻa iā ia ma Ierusalema: ʻo Samua, ʻo Sobaba, ʻo Natana, a ʻo Solomona,

⁵ ʻo ʻIbehara, ʻo ʻElisua, ʻo ʻElipeleta,

⁶ ʻo Noga, ʻo Nepega, ʻo Iapia,

⁷ ʻo ʻElisama, ʻo Beʻeliada, a ʻo ʻElipeleta.

⁸ A lohe aʻela nā Pilisetia, ua poni ʻia ʻo Dāvida i aliʻi ma luna o kā ʻIseraʻela a pau, piʻi maila nā Pilisetia a pau e ʻimi iā Dāvida. A lohe akula ʻo Dāvida, a hele akula ia a kūʻē iā lākou.

⁹ Hele maila nā Pilisetia, a hoʻomoana ihola ma ke awāwa ʻo Repaima.

¹⁰ Nīnau akula ʻo Dāvida i ke Akua, ʻī akula, “E piʻi aku anei au e kūʻē i nā Pilisetia? E hoʻolilo anei hoʻi ʻoe iā lākou i kuʻu lima?” ʻĪ maila hoʻi ʻo Iēhova iā ia, “E piʻi aku ʻoe; no ka mea, e hoʻolilo aku nō wau iā lākou i kou lima.”

¹¹ Hele maila lākou i Baʻala Perazima, a luku akula ʻo Dāvida iā lākou ma laila. A laila, ʻī akula ʻo Dāvida, “Ua pohā akula ʻo Iēhova ma luna o koʻu poʻe ʻenemi, e like me ka pohā ʻana o ka wai.” No laila, kapa akula lākou i ka inoa o ia wahi, ʻo Baʻala Perazima.

¹² A haʻalele mai lākou i nā kiʻi akua o lākou i laila, kauoha akula ʻo Dāvida, a ua puhi ʻia lākou i ke ahi.

¹³ ¶ A hoʻomoana hou akula nā Pilisetia ma ke awāwa.

¹⁴ No laila, nīnau hou akula ʻo Dāvida i ke Akua; a ʻōlelo maila ke Akua iā ia, “Mai piʻi aku ʻoe ma hope o lākou; e huli aʻe mai o lākou aku, a e hoʻi mai ma luna o lākou lā ma kahi e kū pono ana i nā lāʻau silika.

¹⁵ “Aia lohe ʻoe i ka halulu o ka hele ʻana ma nā wēlau o nā lāʻau silika, a laila e hele aku ʻoe e hoʻouka i ke kaua; no ka mea, ua hala aku ke Akua i mua ou e pepehi i ka poʻe kaua o nā Pilisetia.”

¹⁶ No laila, hana akula ʻo Dāvida e like me kā ke Akua i kauoha ai iā ia; a pepehi akula lākou i nā Pilisetia mai Gibeona aku a hiki i Gazera.

¹⁷ Kuʻi akula ka lono no Dāvida i nā ʻāina a pau; a hoʻokau akula ʻo Iēhova i ka makaʻu iā ia ma luna o nā lāhui kanaka a pau.