KA BUKE MUA O KA ʻOIHANA ALIʻI 13 - Ka Baibala Hemolele

1 No kā Dāvida lawe ʻana mai i ka pahu o ke Akua mai Kiriata Iearima. 9 Ka make ʻana o ʻUza; a me ka waiho ʻana i ka pahu ma ka hale o ʻObeda-ʻEdoma.

MOKUNA XIII.

¹ ¶ Kūkā aʻela ʻo Dāvida me nā luna tausani a me nā luna haneri, a me nā luna a pau.

² ʻŌlelo mai ʻo Dāvida i ke anaina kanaka a pau o kā ʻIseraʻela, “Inā he maikaʻi kēia iā ʻoukou, a inā na Iēhova mai ʻo ko kākou Akua ia mea, e hoʻouna aku kākou a i nā hoahānau o kākou ma nā wahi a pau, e waiho ana ma nā ʻāina a pau o kā ʻIseraʻela, a me lākou pū i nā kāhuna a me kā Levi i loko o ko lākou mau kūlanakauhale a me nā kula, e ʻākoakoa mai ai lākou i o kākou nei;

³ a e lawe mai kākou i ka pahu o ko kākou Akua i o kākou nei; no ka mea, ʻaʻole kākou i nīnau aku ma ia mea i nā lā o Saula.”

⁴ ʻŌlelo akula ke anaina kanaka a pau, e hana lākou pēlā; no ka mea, he maikaʻi ia mea i mua o nā kānaka a pau.

⁵ Pēlā i hōʻuluʻulu ai ʻo Dāvida i kā ʻIseraʻela a pau i kahi hoʻokahi, mai Sihora o ʻAigupita a hiki aku i ke komo ʻana aku i Hemata, e lawe i ka pahu o ke Akua mai Kiriata Iearima mai.

⁶ Piʻi akula ʻo Dāvida, a me kā ʻIseraʻela a pau a Baʻala, ʻo ia ʻo Kiriata Iearima, no kā Iuda mai laila mai e lawe i ka pahu o ke Akua ʻo Iēhova, e noho ana ma waena o nā keruba, kahi i hea ʻia ai kona inoa.

⁷ Hoʻoholo aʻela lākou i ka pahu o ke Akua ma luna o ke kaʻa hou, mai ka hale mai o ʻAbinadaba; a kaʻi akula ʻo ʻUza lāua ʻo ʻAhio i ke kaʻa.

⁸ Hoʻokani akula ʻo Dāvida a me kā ʻIseraʻela a pau i mua o ke Akua me ka ikaika a pau, i nā mele, me nā lira, nā pesaleteria, nā timeberela, nā kimebala, a me nā pū kani.

⁹ ¶ A hiki aku lākou i kahi hehi palaoa no Kidona, hoʻō akula ʻo ʻUza i kona lima a hoʻopaʻa i ka pahu; no ka mea, ʻōkupe ihola nā bipi kauō.

¹⁰ Ua hoʻā ʻia ka inaina o Iēhova iā ʻUza, a hahau maila ʻo ia iā ia; no ka mea, ua lālau kona lima i ka pahu; a make ihola ia i laila i mua o ke Akua.

¹¹ Ukiuki ihola ʻo Dāvida i ko Iēhova hahau ʻana iā ʻUza; no laila ua kapa ʻia ka inoa o ia wahi ʻo Pereza ʻUza a hiki i kēia lā.

¹² Makaʻu ihola ʻo Dāvida i ke Akua ia lā, ʻī ihola, “Pehea lā kaʻu e lawe mai ai i ka pahu o ke Akua i oʻu nei?”

¹³ No laila, ʻaʻole i lawe mai ʻo Dāvida i ka pahu berita i ona lā i ke kūlanakauhale o Dāvida; akā, lawe aʻela ʻo ia ia mea ma loko o ka hale o ʻObeda-ʻEdoma kā Gata.

¹⁴ A waiho ihola ka pahu o ke Akua me ka ʻohana a ʻObeda-ʻEdoma i loko o kona hale i nā malama ʻekolu. A hoʻopōmaikaʻi ʻo Iēhova i ko ka hale o ʻObeda-ʻEdoma, a me kona mau mea a pau.