KA BUKE MUA O KA ʻOIHANA ALIʻI 12 - Ka Baibala Hemolele

1 No nā kānaka i hele mai i o Dāvida lā i Zikelaga. 23 No nā koa i hele mai i ona lā i Heberona.

MOKUNA XII.

¹ ¶ Aia hoʻi ka poʻe i hele mai i o Dāvida lā ma Zikelaga, i kona manawa i noho paʻa ai no Saula ke keiki a Kisa; i waena lākou o nā kānaka ikaika, ka poʻe i kōkua i ke kaua.

² Ua mākaukau lākou i nā kakaka, a ua hiki nō iā lākou ke nou aku i nā pōhaku, a me ka pana pua mai loko aku o ke kakaka, me ka lima ʻākau a me ka lima hema, no ka hanauna lākou o Saula, no kā Beniamina.

³ ʻO ʻAhiezera ka luna, a laila ʻo Ioasa, nā keiki lāua a Hasemaʻa no Gibea; ʻo Ieziʻela hoʻi, a ʻo Peleta, nā keiki a ʻAzemaveta; ʻo Beraka hoʻi, a ʻo Iehu no ʻAnetota.

⁴ A ʻo ʻIsemaia no Gibeona, he kanaka ikaika i waena o ke kanakolu; a ʻo Ieremia, ʻo Iahaziʻela, ʻo Iohanana, a ʻo Iosabada, no Gederata;

⁵ ʻo ʻEluzai, ʻo Ierimota, ʻo Bealia, ʻo Semaria, a ʻo Sepatia no Harupa;

⁶ ʻo ʻElekana, ʻo Iesia, ʻo ʻAzareʻela, ʻo Ioezera, ʻo Iasobeama, no kā Kora;

⁷ ʻo Ioʻela, ʻo Zebadia, nā keiki a Ierohama no Gedora.

⁸ ¶ A hoʻokaʻawale maila kekahi poʻe Gada iā lākou iho no Dāvida ma kahi paʻa ma ka wao nahele, he poʻe kānaka ikaika, kānaka kaua e kaua ai; e hiki iā lākou ke lawe i pale kaua a me ka ihe, a ʻo nā helehelena o lākou, me he helehelena liona lā, a ua like lākou me ka dia o nā mauna ka māmā.

⁹ ʻO ʻEzera ka mua, ʻo ʻObadia ka lua, ʻo ʻEliaba ke kolu,

¹⁰ ʻo Misemana ka hā, ʻo Ieremia ka lima,

¹¹ ʻo ʻAtai ke ono, ʻo ʻEliʻela ka hiku,

¹² ʻo Iohanana ka walu, ʻo ʻElezabada ka iwa,

¹³ ʻo Ieremia ka ʻumi, a ʻo Makebanai ka ʻumikumamākahi.

¹⁴ ʻO lākou he poʻe mamo a Gada, nā luna o ka poʻe kaua; ʻo kekahi mea ʻuʻuku iho, ma luna ia o ka haneri; a ʻo ka mea nui loa, ma luna ia o ka tausani.

¹⁵ ʻO lākou ka poʻe i hele ma kēlā kapa o Ioredane i ka malama mua, i ka manawa i hoʻopiha ai ia ma luna o kona mau kapa a pau; a hoʻopuehu akula lākou i nā mea a pau o nā awāwa ma ka hikina a ma ke komohana.

¹⁶ ¶ A hele maila kekahi poʻe mamo a Beniamina a me Iuda i kahi paʻa i o Dāvida lā.

¹⁷ Hele akula ʻo Dāvida i waho e hālāwai me lākou; ʻōlelo akula ia, ʻī akula iā lākou, “Inā e hele aloha mai nō ʻoukou i oʻu nei e kōkua mai iaʻu, e hoʻokahi ana koʻu naʻau me ko ʻoukou; akā, inā no ka hāʻawi aku iaʻu i koʻu poʻe ʻenemi, na ke Akua o ko kākou poʻe kūpuna e nānā mai, a e pāpā mai; no ka mea, ʻaʻole i loaʻa ka hewa ma koʻu mau lima.”

¹⁸ A laila kau maila ka ʻUhane ma luna iho o ʻAmasai, ke poʻokela o nā luna koa, “Nou nō mākou, e Dāvida, A ma kou ʻaoʻao hoʻi, e ke keiki a Iese! Aloha, aloha iā ʻoe, Aloha hoʻi i nā kōkua ma hope ou; No ka mea, ʻo kou Akua ke kōkua mai iā ʻoe!” A laila, hoʻokipa aʻela ʻo Dāvida iā lākou, a hoʻonoho iā lākou i mau luna o nā koa.

¹⁹ ¶ A kaʻana maila kekahi poʻe o Manase iā Dāvida, iā ia i hele pū ai me ko Pilisetia i ke kaua iā Saula; akā, ʻaʻole i kōkua aku lākou nei ma muli o lākou; no ka mea, na nā aliʻi o ko Pilisetia i kūkākūkā pū, a hoʻihoʻi aku iā ia, me ka ʻī ʻana, “E kaʻa aku auaneʻi ia i kona haku iā Saula, ma luna o ko kākou mau poʻo.”

²⁰ I kona hele ʻana i Zikelaga, kaʻana maila kekahi poʻe o kā Manase iā ia, ʻo ʻAdena, ʻo Iozabada, ʻo Iediaʻela, ʻo Mikaʻela, ʻo Iozabada, ʻo ʻElihu, a ʻo Ziletai, nā luna tausani o kā Manase.

²¹ A kōkua maila lākou ma muli o Dāvida me kekahi poʻe koa; no ka mea, he poʻe kānaka koa ikaika lākou a pau, a he mau luna i waena o ka poʻe koa.

²² Ia manawa nō, ia lā aʻe, ia lā aʻe, haele maila nā kānaka i o Dāvida lā, a lilo aʻela lākou i poʻe koa nui, e like me ka pūʻali o ke Akua.

²³ ¶ Eia ka helu ʻana i nā poʻe i mākaukau no ke kaua, i hele mai i o Dāvida lā ma Heberona, e hoʻohuli aʻe i ke aupuni o Saula i ona lā, e like me ka ʻōlelo ʻana a Iēhova.

²⁴ ʻO nā mamo a Iuda i lawe i ka pale kaua a me ka ihe, he ʻeono tausani lākou a me nā haneri keu ʻewalu, i mākaukau no ke kaua.

²⁵ ʻO nā mamo a Simeona, nā kānaka koa ikaika no ke kaua, ʻehiku tausani lākou, a me ka haneri keu.

²⁶ ʻO nā mamo a Levi, ʻehā tausani a me nā haneri keu ʻeono.

²⁷ ʻO Iehoiada ke alakaʻi o ka poʻe mamo a ʻAʻarona, a me ia pū nā tausani ʻekolu a me nā haneri keu ʻehiku.

²⁸ A ʻo Zadoka, he kanaka hou, he koa ikaika, a he iwakāluakumamālua nā luna koa o ka ʻohana a kona makua kāne.

²⁹ A ʻo nā mamo a Beniamina, nā hoahānau o Saula, ʻekolu tausani; no ka mea, ma mua he poʻe kiaʻi ka nui o lākou i ka hale o Saula.

³⁰ A ʻo nā mamo a ʻEperaima, he iwakālua tausani a me nā haneri keu ʻewalu, nā kānaka koa ikaika, ua kaulana ma waena o ka ʻohana o ko lākou mau kūpuna.

³¹ A ʻo ka ʻohana hapa a Manase, he ʻumikumamāwalu tausani, i kāhea ʻia ma ka inoa e hele mai e hoʻoaliʻi iā Dāvida.

³² A ʻo nā mamo a ʻIsakara, ka poʻe hoʻomaopopo i nā ʻōuli o nā manawa, e ʻike ai i nā mea pono a kā ʻIseraʻela e hana ai; ʻelua haneri nā poʻokela o lākou; a nānā aʻela ko lākou poʻe hoahānau a pau i kā lākou ʻōlelo.

³³ ʻO kā Zebuluna, ka poʻe hele aku i ke kaua, i mākaukau i ke kaua me nā mea kaua a pau, he kanalima tausani o lākou i ʻike i ka hoʻouka kaua, ʻaʻole he naʻau lua.

³⁴ A ʻo kā Napetali, hoʻokahi tausani luna koa, a me lākou he kanakolukumamāhiku tausani, me nā pale kaua a me nā ihe.

³⁵ A ʻo kā Dana i mākaukau i ke kaua, he iwakāluakumamāwalu tausani, a me nā haneri keu ʻeono.

³⁶ A ʻo kā ʻAsera, ka poʻe hele aku i ke kaua, i mākaukau i ke kaua, he kanahā tausani.

³⁷ A ma kēlā ʻaoʻao o Ioredane, ʻo kā Reubena, a ʻo kā Gada, a ʻo ka ʻohana hapa a Manase, me nā mea kaua a pau e kaua ai, he haneri a me ka iwakālua tausani.

³⁸ ¶ ʻO kēia poʻe kānaka kaua a pau, i ʻike i ka hoʻouka i ke kaua, i hele mai me ka naʻau lōkahi ma Heberona, e hoʻāliʻi iā Dāvida ma luna o kā ʻIseraʻela a pau; a ua lōkahi hoʻi ka naʻau o kā ʻIseraʻela a pau i koe e hoʻāliʻi iā Dāvida.

³⁹ I laila lākou me Dāvida, ʻekolu lā, e ʻai ana a e inu ana; no ka mea, ua hoʻomākaukau ko lākou poʻe hoahānau na lākou.

⁴⁰ ʻO ia hoʻi, ʻo ka poʻe e kokoke ana me lākou, a hiki aku i kā ʻIsakara, a i kā Zebuluna, a i kā Napetali, lawe maila lākou i ka berena ma luna o nā miula, a ʻo nā kāmelo, a ʻo nā hoki, a ʻo nā bipi; me ka ʻai a me ka palaoa, me nā paʻi hua fiku, a me nā paʻi hua waina, me ka waina, ka ʻaila, nā bipi a me nā hipa he nui loa; no ka mea, he ʻoliʻoli i loko o kā ʻIseraʻela.