KA BUKE MUA O KA ʻOIHANA ALIʻI 11 - Ka Baibala Hemolele

1 Ka hoʻoaliʻi ʻana iā Dāvida. 4 Kona noho ʻana ma Ierusalema. 10 Nā inoa o kona poʻe luna koa, a me kā lākou hana ʻana.

MOKUNA XI.

¹ ¶ A laila, ʻākoakoa aʻela kā ʻIseraʻela a pau i o Dāvida lā i Heberona, ʻī maila, “Eia hoʻi, hoʻokahi nō ko kākou iwi a me ka ʻiʻo.

² “I ka wā ma mua nō hoʻi, iā Saula i aliʻi ai, ʻo ʻoe nō ka mea nāna i alakaʻi aku a i alakaʻi mai i kā ʻIseraʻela; ʻī maila hoʻi ʻo Iēhova ʻo kou Akua iā ʻoe, ‘E hānai ʻoe i koʻu poʻe kānaka i kā ʻIseraʻela; a e lilo ʻoe i aliʻi no koʻu poʻe kānaka no kā ʻIseraʻela.’”

³ No laila, i hele mai nā lunakahiko a pau o kā ʻIseraʻela i ke aliʻi ma Heberona; a hoʻopaʻa ihola ʻo Dāvida i berita me lākou ma Heberona, i mua o Iēhova; a poni ihola lākou iā Dāvida i aliʻi no kā ʻIseraʻela, e like me ka ʻōlelo a Iēhova ma o Samuʻela lā.

⁴ ¶ Hele akula ʻo Dāvida me kā ʻIseraʻela a pau i Ierusalema, ʻo ia ʻo Iebusa, kahi i noho ai kā Iebusa, nā kānaka o ia ʻāina.

⁵ ʻŌlelo maila nā kānaka o Iebusa iā Dāvida, “ʻAʻole ʻoe e hele mai i ʻaneʻi!” Akā, lawe lilo ʻo Dāvida i ka pā kaua o Ziona, ʻo ia ke kūlanakauhale o Dāvida.

⁶ ʻĪ maila ʻo Dāvida, “ʻO ka mea pepehi mua i ka Iebusa, e lilo ia i poʻokela a i luna koa.” A ʻo Ioaba, ʻo ke keiki a Zeruia i piʻi mua akula, a lilo aʻela ia i poʻokela.

⁷ A noho ihola ʻo Dāvida ma ka pā kaua; no laila, kapa akula lākou ia wahi, ʻo ke kūlanakauhale o Dāvida.

⁸ Kūkulu ihola ia i ke kūlanakauhale a puni, mai Milo aku a puni; a kūkulu hou ihola ʻo Ioaba i nā wahi i koe o ke kūlanakauhale.

⁹ Māhuahua aʻela ʻo Dāvida a nui loa; no ka mea, me ia pū ʻo Iēhova Sābāōta.

¹⁰ ¶ Eia hoʻi nā poʻokela o nā kānaka ikaika iā Dāvida, ka poʻe i hoʻoikaika pū me ia i loko o kona aupuni a me kā ʻIseraʻela a pau, e hoʻoaliʻi iā ia, e like me ka ʻōlelo a Iēhova no kā ʻIseraʻela.

¹¹ Eia ka helu ʻana o nā kānaka ikaika iā Dāvida: ʻo Iasobeama ka Hakemoni, ke poʻokela o nā luna koa; hoaka aʻela ia i kāna ihe e kūʻē i nā haneri kānaka ʻekolu, a make lākou i ka manawa hoʻokahi.

¹² Ma hope iho ona ʻo ʻEleazara ke keiki a Dodo ka ʻAhohi, kekahi o nā kānaka ikaika loa ʻekolu.

¹³ Aia nō ia me Dāvida ma Padamima, i laila i ʻākoakoa ai ko Pilisetia i ke kaua, i kahi i paʻapū ai ka honua i ka bale; a naholo akula nā kānaka i mua o ko Pilisetia.

¹⁴ A kū ihola lākou i waenakonu o ua ʻāina lā, a hoʻomalu ihola ia wahi, a pepehi ihola i ko Pilisetia; a hoʻōla aʻela ʻo Iēhova iā lākou i ke ola nui.

¹⁵ ¶ Iho akula nā mea ʻekolu o ka poʻe luna he kanakolu i kahi paʻa i o Dāvida lā i loko o ke ana o ʻAdulama; a hoʻomoana ihola ka poʻe kauā o Pilisetia ma ke awāwa i Repaima.

¹⁶ I laila ʻo Dāvida i loko o kahi paʻa, a ma Betelehema ka pā kaua o ko Pilisetia ia manawa.

¹⁷ Make wai ihola ʻo Dāvida, ʻī maila, “Nani ʻino kuʻu makemake e hāʻawi mai kekahi i wai e inu no ka luawai mai o Betelehema, aia ma ka ʻīpuka!”

¹⁸ Wāhi aʻela ua mau kānaka ʻekolu lā i ka poʻe kaua o ko Pilisetia, a huki maila i ka wai, mai loko o ka luawai o Betelehema ma ka ʻīpuka, lālau akula, a lawe maila i o Dāvida lā; akā, ʻaʻole ʻo Dāvida i manaʻo e inu ia mea, a ninini aku nō ia mea no Iēhova.

¹⁹ ʻĪ akula ia, “E pāpā mai koʻu Akua iaʻu, i ʻole au e hana ia mea; e inu nō anei au i ke koko o kēia mau kānaka, me ko lākou ola? No ka mea, me ke ola wale nō lākou i lawe mai nei ia mea”; no laila, ʻaʻole ia i make inu. Pēlā i hana ai ia mau kānaka ikaika loa ʻekolu.

²⁰ ¶ A ʻo ʻAbisai ke kaikaina o Ioaba, ʻo ia ke poʻokela o nā mea ʻekolu; no ka mea, hoaka aʻela ia i kona ihe e kūʻē i nā kānaka ʻekolu haneri, a pepehi ihola ia iā lākou, a loaʻa iā ia ka inoa i waena o ua mau kānaka ikaika lā ʻekolu.

²¹ No nā mea ʻekolu, ua ʻoi aku kona koʻikoʻi i mua o nā mea ʻelua; no laila, ʻo ia ko lāua luna; akā, ʻaʻole i hiki aku kona e like me ko kēlā poʻe ʻekolu.

²² ¶ ʻO Benaia ke keiki a Iehoiada, ke keiki a kekahi kanaka ikaika no Kabezeʻela, he nui kāna hana kupanaha; pepehi ihola ia i ʻelua kānaka ikaika loa o Moaba; iho ihola hoʻi ia i loko o ka lua, a pepehi ihola i ka liona i ka lā e hāʻule ana ka hau.

²³ Pepehi ihola hoʻi ʻo ia i kekahi kanaka ʻAigupita, he kanaka nunui, he ʻelima haʻilima ke kiʻekiʻe; a he ihe nō ma ka lima o ka ʻAigupita, e like me ka lāʻau o ka mea ulana lole; a iho akula kēlā i ona lā me ke koʻokoʻo, a kāʻili aʻela i ka ihe mai loko aʻe o ka lima o ka ʻAigupita, a pepehi ihola iā ia me kāna ihe.

²⁴ ʻO nā mea kēia a Benaia a ke keiki a Iehoiada i hana ai, a loaʻa iā ia ka inoa i waena o ka poʻe kānaka ikaika ʻekolu.

²⁵ Aia hoʻi, he koʻikoʻi nō ia i waena o ke kanakolu, ʻaʻole hoʻi i hiki aku kona i ko kēlā poʻe ʻekolu. A hoʻonoho akula ʻo Dāvida iā ia i kuhina nona.

²⁶ ¶ Eia hoʻi nā kānaka koa o nā kaua: ʻo ʻAsahela ke kaikaina o Ioaba, ʻo ʻElehanana ke keiki a Dodo no Betelehema,

²⁷ ʻo Samota no Harora, ʻo Heleza no Pelona,

²⁸ ʻo ʻIra ke keiki a ʻIkesa no Tekoa, ʻo ʻAbiezera no ʻAnetota,

²⁹ ʻo Sibekai no Husata, ʻo ʻIlai no ʻAhota,

³⁰ ʻo Maharai no Netopa, ʻo Heleda ke keiki a Baʻana no Netopa,

³¹ ʻo ʻItai ke keiki a Ribai no Gibea, no nā mamo a Beniamina, ʻo Benaia no Piratona,

³² ʻo Hurai no nā awāwa o Gaʻasa, ʻo ʻAbiʻela, no ʻArabata,

³³ ʻo ʻAzemaveta no Baharuma, ʻo ʻEliaba no Saʻalebo,

³⁴ ʻo nā keiki a Hasema no Gilo, ʻo Ionatana ke keiki a Sage no Harara,

³⁵ ʻo ʻAhiama ke keiki a Sakara no Harara, ʻo ʻElipala ke keiki a ʻUra,

³⁶ ʻo Hepera no Mekerata, ʻo ʻAhiia no Pelona,

³⁷ ʻo Hezero no Karemela, ʻo Naʻarai ke keiki a ʻEzebai,

³⁸ ʻo Ioʻela ka hoahānau o Natana, ʻo Mibehara ke keiki a Hageri,

³⁹ ʻo Zeleka ka ʻAmona, ʻo Naharai no Berota, ka mea lawe i nā mea kaua a Ioaba ke keiki a Zeruia,

⁴⁰ ʻo ʻIra no ʻItera, ʻo Gareba no ʻItera,

⁴¹ ʻo ʻUria ka Heta, ʻo Zabada ke keiki a ʻAhelai,

⁴² ʻo ʻAdina ke keiki a Siza a kā Reubena, he luna ia o kā Reubena, a he kanakolu nō me ia,

⁴³ ʻo Hanana ke keiki a Maʻaka, ʻo Iosapata no Mitana,

⁴⁴ ʻo ʻUzia no ʻAseterata, ʻo Sama, a ʻo Iehiʻela, nā keiki a Hotana no ʻAroera,

⁴⁵ ʻo ʻIdiaʻela ke keiki a Simeri, a ʻo Ioha kona kaikaina, no Tiza,

⁴⁶ ʻo ʻEliʻela no Mahava, ʻo Ieribai, a ʻo Iosavia, nā keiki a ʻElenaʻama, ʻo ʻItema ka Moaba,

⁴⁷ ʻo ʻEliʻela, ʻo ʻObeda, a ʻo Iasiʻela ka Mesoba.