Уэрэд 97 - ХъыбарыфӀыр. ЩӀэдзапӀэр. Уэрэд ЛъапӀэхэр

97-нэ Уэрэд Тхьэм дунейм тепщэныгъэ хуиӀэщ

¹ ХужыфӀэ Зиусхьэным уэрэдыщӀэ; гъэщӀэгъуэныщэщ Абы и ӀэщӀагъэхэр. И Ӏэ ижьымрэ и лъэкӀыныгъэ лъапӀэмрэ текӀуэныгъэр Абы къыхудахащ.

² ТекӀуэныгъэр къызэрихьар Зиусхьэным къигъэлъэгъуащ, и бйихэр зэригъэпшынэжар цӀыху лъэпкъхэм наӀуэ ящищӀащ.

³ МыкӀуэдыж лъагъуныгъэу, щыпкъагъэу израил лъэпкъым хуиӀар Абы игу илъ зэпытщ. Ди Тхьэм текӀуэныгъэр къызэрихьар щӀыгу псоми я гъунапкъэхэм ялъэгъуащ.

⁴ ГуфӀэ макъыр хуэфӀэт Зиусхьэным, зэрыщӀыгуу; гуфӀэгъуэ уэрэди щӀыхь уэрэди хужыфӀэ.

⁵ ПшынэдыкъуакъуэкӀэ щӀыхь уэрэд хуэвгъэӀу Зиусхьэным, пшынэдыкъуакъуэмрэ уэрэд макъымрэ щӀыгъуу.

⁶ Сыринэм, бжьамийм я макъыр щӀыгъуу, пащтыхьу Зиусхьэным гуфӀэ макъ хуэфӀэт.

⁷ Хыми абы хэс псоми, Дунеишхуэми абы тет псоми макъышхуэ япреӀукӀ;

⁸ псыхэр Ӏэгу хуреуэ; гуфӀэгъуэшхуэм хэту бгыхэм уэрэд жрыраӀэ

⁹ Зиусхьэным и пащхьэм; сыту жыпӀэмэ ар къокӀуэ щӀыгум хьэкум трищӀыхьыну. Дунеишхуэм хьэкум трищӀыхьынщ Абы щыпкъагъэкӀэ, захуагъэкӀэ зэхихунщ цӀыху лъэпкъхэм я Ӏуэхухэр.