Уэрэд 96 - ХъыбарыфӀыр. ЩӀэдзапӀэр. Уэрэд ЛъапӀэхэр

96-нэ Уэрэд Тепщэныгъэр зиӀэ Тхьэр

¹ Тепщэныгъэр иӀыгъщ Зиусхьэным: ирегуфӀэ щӀыр; иренэщхъыфӀэ щӀылъэм и гъунэхэр.

² Яхэтщ Ар пшагъуэмрэ кӀыфӀ зэфэзэщымрэ; щыпкъагъэмрэ захуагъэмрэ тетщ Абы и тахътэр.

³ И мафӀэр егъакӀуэ Абы, Езым и пэ иту, и бийхэр щегъэс дэнэкӀи.

⁴ Абы и хъуэпскӀым зэщӀегъэнахуэ дунеишхуэр; ар елъагъури, мэтхытх щӀыгур.

⁵ Шэхум хуэдэу, бгыхэр щоткӀу Зиусхьэным и пащхьэм, щӀыгу псом и Зиусхьэным и пащхьэм.

⁶ Абы и щыпкъагъэ яӀуатэ уафэгум, цӀыху лъэпкъ псоми ялъагъу Абы щӀыхьу бгъэдэлъыр.

⁷ Тхьэ нэпцӀ сурэтхэм хуэлажьэу, пщӀэ зимыӀэ тхьэ нэпцӀхэмкӀэ зыщытхъужхэм я напэр текӀащ. Абы и пащхьэм щхьэщэ щащӀ тхьэ псоми.

⁸ Цион къалэм зэхихащи, мэгуфӀэ, Уэ пщӀы хьэкумхэм щхьэкӀэ Иудэ и пхъухэр мэгуфӀэ, Зиусхьэн.

⁹ Сыту жыпӀэмэ, Зиусхьэн, зэрыщӀыгуу Уэ уолъэгэкӀ, Тхьэ псоми ящхьэкӀэ ущыӀэщ.

¹⁰ Зиусхьэным фӀыуэ елъагъу ер зи жагъуэхэр! Езым и цӀыху лъапӀэхэм я псэр Абы къехъумэ, гуэныхь зылэжьхэм къыӀэщӀехыж.

¹¹ Нэхунэр къыхукъуокӀ щыпкъагъэ зиӀэм, зигу щыпкъагъэ илъхэм – гуфӀэгъуэр.

¹² Щыпкъагъэ зиӀэхэ, Зиусхьэным и цӀэкӀэ фыгуфӀэ, Абы и цӀэ лъапӀэм и щытхъур фӀуатэ.