Уэрэд 94 - ХъыбарыфӀыр. ЩӀэдзапӀэр. Уэрэд ЛъапӀэхэр

94-нэ Уэрэд ДыкъэзыгъэщӀар дывгъэгъэлъапӀэ

¹ ФынакӀуэ, ди Зиусхьэным щӀыхь уэрэд хужыдвгъэӀэ, ди хъумакӀуэу ди къегъэлакӀуэм гуфӀэгъуэ макъ хуэдвгъэӀэт.

² ЩӀыхь хуэтщӀурэ, дивгъэхьэ Абы и пащхьэм, щӀыхь уэрэд жытӀэурэ, гуфӀэгъуэ макъ хуэдвгъэӀэт.

³ Сыту жыпӀэмэ Тхьэ ин дыдэщ Зиусхьэныр, тхьэ псоми Пащтыхьышхуэу ящхьэщ.

⁴ ЩӀым и кууупӀэхэр Абы и Ӏэм илъщ, бгы щыгухэри и Ӏэрылъхьэщ Абы.

⁵ Абы ейщ хыри, ар Абы къигъэщӀащ, ягъэпсащ и ӀитӀым щӀыгур.

⁶ ФынакӀуэ, щхьэщэ хуэдвгъэщӀ, Тхьэуэу дыкъэзыгъэщӀам и пащхьэм лъэгуажьэмыщхьэу дивгъэтӀысхьэ.

⁷ Сыту жыпӀэмэ аращ дэ ди Тхьэр, Абы и мэл хъушэм дыщыщщ, Абы и Ӏэм зэришэ мэлхэр дэращ. Ей, Абы и макъ нобэ фэ федгъэӀуатэмэ:

⁸ «Гурымыкъыу фыщымыт, фи адэжьхэм Мэрыбэ деж, Массэ губгъуэ нэщӀым деж зэрыщащӀэгъам хуэдэу.

⁹ Си шыӀэныгъэ здынэсри Сэ сызыхуэдэри ягъэунэхуащ фи адэжьхэм, си ӀэщӀагъэ зыхуэдэр ялъэгъуарэ пэт.

¹⁰ Сэ мы лъэпкъым илъэс плӀыщӀкӀэ сагъэгубжьащ, арати жысӀащ: „Мыхэр ягукӀэ гъуэща цӀыху лъэпкъщ; ахэр щыгъуазэкъым си гъуэгум“.

¹¹ Абы папщӀэ губжьым сыхэту, псалъэ быдэ стащ: „ахэр си гупсэхупӀэ измыгъэхьэну“».