Уэрэд 93 - ХъыбарыфӀыр. ЩӀэдзапӀэр. Уэрэд ЛъапӀэхэр

93-нэ Уэрэд Тхьэм и захуагъэр

¹ Уэ, Зиусхьэну цӀыхур зыгъэпшынэжым, Уэ, Тхьэуэ цӀыхум и гъэпшынакӀуэм, уи губжь къэгъэлъагъуэ!

² Дыкъэлъагъу, щӀым и хеящӀэ, зыкъызыфӀэщӀыжхэм яхуэфащэр ярегъуэт.

³ Сыт хуэдизрэ, Зиусхьэн, цӀыху бзаджэхэр, сыт хуэдизрэ цӀыху бзаджэхэр я бзаджагъэ щыгуфӀыкӀыну?

⁴ Псалъэ пагэхэр къажьэдокӀ; бзаджащӀэ псоми зафӀэлъэщщ.

⁵ Уи цӀыху лъэпкъыр, ягъэщӀэ Зиусхьэн, Уэ уи уней цӀыхухэр егъэзыгъэ ящӀ.

⁶ Фызабэр, хэхэсыр яукӀ, ибэми и псэр хах.

⁷ ИтӀанэ жаӀэ: «Зиусхьэным илъагъуркъым Екъуб и Тхьэм гу лъитэркъым».

⁸ Акъыл къызыхуэвгъуэтыж, гулъытэ зимыӀэ цӀыхухэ! Сыт щыгъуэ Ӏущ фыхъуну, ахьмакъхэ?

⁹ ТхьэкӀумэ къозытам зэхимыхыу хъун? Нэр зыгъэпсам имылъагъуну хъурэ?

¹⁰ ЦӀыху лъэпкъхэр зыгъэдаӀуэм ахэр имыгъэпшынэу хъурэ? ЦӀыхухэр зыгъасэм зэхэщӀыкӀ имыӀэу хъурэ?

¹¹ Зиусхьэным ещӀэ цӀыхум и гупсысэхэр Ӏугъуэ кӀуэдыжым зэрыхуэдэр.

¹² Гъуэгу махуэ теуващ Уэ бгъэдаӀуэ цӀыхур, Зиусхьэн, уи хабзэкӀэ бгъасэр,

¹³ махуэ къинхэм гупсэхугъуэ ептыну – цӀыху бзаджэм мащэр хуатӀыху!

¹⁴ Сыту жыпӀэмэ Зиусхьэным и цӀыхухэр я закъуэу къигъэнэнукъым, Езым ейхэр ӀэщӀыб ищӀынкъым.

¹⁵ Сыту жыпӀэмэ хьэкумым щыпкъагъэм къыхуигъэзэжынщ, зигу щыпкъагъэ илъ псори абы гуэувэнщ.

¹⁶ Хэт цӀыху Ӏейхэм сэр щхьэкӀэ япэувыр? Сэр щхьэкӀэ хэт бзаджащӀэхэм япэрыуэнур?

¹⁷ Сэ дэӀэпыкъуэгъуу сиӀэр Зиусхьэныр армыратэмэ, хьэдрыхэ макъыншэм си псэр кӀуэжынт щӀэх дыдэ.

¹⁸ «Си лъэр щӀощӀэ» щыжысӀэм, уи лъагъуныгъэ мыкӀуэдыжыр, Зиусхьэн, сэ щӀэгъэкъуэн къысхуэхъуащ.

¹⁹ Си гукъеуэхэр си гум щыбагъуэ щыхъукӀэ, гупсэхугъуэу къызэптым си гур хегъахъуэ.

²⁰ ХьэкумыщӀэ хьилэхэр гъусэ пщӀы хъун, хабзэр зыкъутэхэр?

²¹ Тхьэм хуэщыпкъэм ахэр гупышхуэу тобанэ, лажьэ зимыӀэм лӀэныгъэр тралъхьэ.

²² Ауэ Зиусхьэныр – си быдапӀэщ, си Тхьэр – си хъумапӀэщ, си щхьэегъэзыпӀэщ.

²³ Ахэр ӀуигъэщӀэжынщ я бзаджащӀагъэм, лъапсэкӀуэд ищӀынщ я бзаджагъэм папщӀэ, игъэкӀуэдынщ Зиусхьэну ди Тхьэм.