Уэрэд 91 - ХъыбарыфӀыр. ЩӀэдзапӀэр. Уэрэд ЛъапӀэхэр

91-нэ Уэрэд ЩӀыхь уэрэд. Щыпкъагъэм и ӀыхьэфӀ

¹ Щэбэт махуэм жаӀэ уэрэд

² Зиусхьэным щӀыхь хуэтщӀыныр, Уэ, Псоми Я Нэхъ Лъагэм, уи цӀэм щӀыхь уэрэд хужытӀэныр фӀыщ;

³ мыкӀуэдыж уи лъагъуныгъэр пщэдджыжькӀэрэ тӀуэтэныр, жэщкӀэрэ – уи щыпкъагъэ,

⁴ бзэпсипщӀ зэрылъ пшынэмкӀэ, пшынэдыкъуакъуэмкӀэ, бзэпсыбэ зэрылъ пшынэмкӀэ уэрэд дэжытӀэурэ.

⁵ Сыту жыпӀэмэ Уэ, Зиусхьэн, уи ӀэщӀагъэкӀэ къызэптащ гукъыдэж; уи Ӏэхэм ягъахъэм гуфӀэгъуэ уэрэд жызагъэӀэ.

⁶ Уи ӀэщӀагъэхэр сыту ин дыдэ, Зиусхьэн! гъэщӀэгъуэну зэрыкуу Уэ уи гупсысэхэр!

⁷ ЦӀыху гукъэкӀыншэм ищӀэнкъым, зи гулъытэ мащӀэми ар къыгурыӀуэнкъым.

⁸ ЦӀыху ябгэр, удзым хуэдэу багъуэми, бзаджащӀэ псоми я Ӏуэху къадэхъуми, игъащӀэкӀэ кӀуэдыжынущ ахэр.

⁹ Уэ игъащӀэкӀэ, Зиусхьэн, Псоми Уранэхъ Лъагэщ!

¹⁰ Сыту жыпӀэмэ уи бийхэр, Зиусхьэн, уи бийхэр кӀуэдыжынщ, хьэкъщ, бзаджагъэкӀэ зекӀуэ псори зэбграхужынщ;

¹¹ домбейм иӀэ гуащӀэм хуэдэ къызэптащ, уи дагъэ лъапӀэр къысщыпхуэри, си лъэкӀыныгъэм хэбгъэхъуащ.

¹² Си бийхэм уатекӀуэу си нэхэм ялъэгъуащ, бзаджащӀэу зыкъыспэзыӀэтхэми я гукӀуэд макъхэр си тхьэкӀумэхэмкӀэ зэхэсхащ.

¹³ Щыпкъагъэ зиӀэм пальмэ жыгым хуэдэу зыкъызэӀуех, Ливаным къыщыкӀ ашэ хуэдэуи зыкъеӀэт.

¹⁴ Зиусхьэн унэшхуэм щыхаса жыгхэм хуэдэу, ди Тхьэм и унэшхуэ пщӀантӀэм къыщощхьэлъэ.

¹⁵ Жьы хъуми, абыхэм фӀыр къапокӀэ, псыр ящӀэзщ, къэкӀагъащӀэм хуэдэщ,

¹⁶ Зиусхьэну сэ си хъумакӀуэр зэрызахуэр, щыпкъагъэншагъи Абы зэрыхэмылъыр къагъэлъэгъуэну.