Уэрэд 90 - ХъыбарыфӀыр. ЩӀэдзапӀэр. Уэрэд ЛъапӀэхэр

90-нэ Уэрэд Тхьэр ди хъумакӀуэщ

¹ Псоми Я нэхъ Лъагэм и бгъафэм щыпсэу, лъэкӀыныгъэ псори зиӀэм и жьауэ щӀэтым

² Зиусхьэным жреӀэ: «Уэращ си хъумапӀэу, си щхьэегъэзыпӀэр, Уэращ си Тхьэу сызыщыгугъыр!»

³ Къощэм и лъахъэм, укъызэмылын узыфэ Ӏейм Абы уащихъумэнщ.

⁴ И къабзийхэмкӀэ уихъумэнщ, Абы и дамэ щӀагъхэми щхьэегъэзыпӀэ щыбгъуэтынщ; Тхьэр щыпкъэщ, мэӀум хуэдэу укъихъумэнщ Абы.

⁵ Уащышынэнкъым: жэщым – и шынагъуэшхуэм, махуэм – умыщӀэххэу къыптебэнэнухэм,

⁶ кӀыфӀым къыщызыкӀухь узыфэ Ӏейм, узу шэджагъуэм псори зышхым.

⁷ Уи сэмэгурабгъумкӀэ – миныр, уи ижьырабгъумкӀэ – минипщӀыр щехуэхынщ, ауэ уэ благъэу къокӀуэлӀэнкъым.

⁸ Уи нитӀкӀэ уплъэнщ, Тхьэм цӀыху бзаджэхэр зэригъэпшынэм уеплъынщ.

⁹ Сыту жыпӀэмэ уэ Зиусхьэныр щхьэегъэзыпӀэ зыхуэпщӀащ; Псоми Я Нэхъ Лъагэр хъумакӀуэу уэ къыхэпхащ.

¹⁰ Бзаджагъэ зэи къохъулӀэнкъым, ери уи псэупӀэ благъэу къекӀуэлӀэнкъым.

¹¹ Сыту жыпӀэмэ и мелыӀычхэм Абы къахуищӀынущ унафэ уи гъуэгу псоми укъащахъумэну.

¹² Я ӀэхэмкӀэ уаӀэтынущ, мывэм уи лъакъуэмкӀэ ужьэхэмыуэн щхьэкӀэ.

¹³ Уатеувэнщ аслъэнымрэ благъуэжьымрэ; упӀытӀынщ аслъэнымрэ благъуэмрэ.

¹⁴ «ФӀыуэ силъагъуу, благъэ къызэрысхуэхъуам папщӀэ, Сэ ар къыхэсшыжынщ», – жеӀэ Зиусхьэным, «къэсхъумэнщ ар, си цӀэр зыхуэдэр зэригъэщӀащи.

¹⁵ Къызэджэнщи – къызэхэсхынщ; къиныгъуэм сригъусэнщ абы; тхьэмыщкӀагъуэм къыхэсшыжынщи, лъытэныгъэ хуэсщӀынщ абы.

¹⁶ ГъащӀэ кӀыхькӀэ згъэарызынщ ар, мыкӀуэду къезгъэлынщ».