Уэрэд 9 - ХъыбарыфӀыр. ЩӀэдзапӀэр. Уэрэд ЛъапӀэхэр

9-нэ Уэрэд Тхьэм и захуагъэм и щӀыхь

¹ УэрэдыӀуэхэмрэ пшынауэхэмрэ я пашэм папщӀэ. «Мут-лабен» уэрэдым и макъамэр щӀэту. Даут и уэрэд

² Уи щӀыхьыр сӀуэтэнущ, Зиусхьэн, гууэ сиӀэмкӀэ; уи ӀэщӀагъэ гъэщӀэгъуэнхэр псори сӀуэтэнущ;

³ сыгуфӀэнущ, уи хьэтыркӀэ гукъыдэж сиӀэнущ, Уи цӀэм щӀыхь уэрэд хужысӀэнущ, Уэращ псоми я нэхъ Лъагэр.

⁴ УкъыщылъагъуэкӀэ йокӀуэт си бийхэр, я лъэр зэронэ, мэкӀуэдхэ.

⁵ Сыту жыпӀэмэ си Ӏуэхум хьэкум тепщӀыхьри, сызэрыхейр ӀупщӀ пщӀащ. Уэ тахътэм укъытетӀысхьащ – хьэкумыщӀ захуэр.

⁶ Хамэ лъэпкъхэр бгъэкъуэншащ, бгъэкӀуэдащ цӀыху бзаджэхэр, я цӀэхэр лӀэщӀыгъуэхэм игъащӀэкӀэ хэбгъэкъэбзыкӀащ.

⁷ ЛъапсэкӀуэдыр къахуэбгъэкӀуащ бийхэм, я къалэхэр зэхэпкъутащ; зыми ягу къэмыкӀыжу кӀуэдащ.

⁸ Ауэ Зиусхьэныр и тахътэм тесынщ игъащӀэкӀэ; хьэкум ищӀэну и тахътэр къигъэуващ Абы.

⁹ Дунеишхуэм хьэкумыр щыпкъагъэкӀэ трещӀыхь Абы, захуагъэ хэлъу цӀыху лъэпкъхэм я Ӏуэхухэр зэхеху.

¹⁰ Зиусхьэныр быдапӀэ яхуохъу яужьыгуахэм, махуаем Ар я хъумапӀэщ.

¹¹ Уи цӀэ зыщӀэхэр къыпщогугъ, сыту жыпӀэмэ, Зиусхьэн, Уэ зыкъыпхуэзыгъазэхэр утыкум къибнэнкъым.

¹² Цион Ӏуащхьэм тес Зиусхьэным и щӀыхь фӀуатэ, Абы и ӀуэхущӀафэхэм я хъыбар цӀыху лъэпкъхэм ялъэвгъэӀэс!

¹³ Сыту жыпӀэмэ лъы зыгъажэр егъэпшынэ. Гу лъетэ, зэхех хэутэн ящӀахэм я гукъеуэ макъ.

¹⁴ ГущӀэгъу къысхуэщӀ, Зиусхьэн; сызылъагъу мыхъухэм къину сагъэшэчым къеплъ Уэ, лӀэныгъэм и куэбжэм сыкъызыӀушыжыр,

¹⁵ Цион къалэм и куэбжэм уи щӀыхь псори щысӀуэтэну, сымыкӀуэду сыкъызэребгъэламкӀи сыгуфӀэну.

¹⁶ Езыхэм ятӀа мащэм хамэ лъэпкъхэр ихуэжащ; щэхуу ягъэува хъым я лъакъуэхэр илъэхъэжащ.

¹⁷ Хьэкуму ятрищӀыхьамкӀэ Зиусхьэным Езыр зыхуэдэр яригъэщӀащ; цӀыху бзаджэр езым и ӀитӀкӀэ илэжьам текӀуэдэжащ.

¹⁸ ЦӀыху бзаджэ псори хьэдрыхэ кӀуэнущ – Тхьэр зыщыгъупщэ лъэпкъ псори.

¹⁹ Сыту жыпӀэмэ дэхуэхар Тхьэм зэи щыгъупщэнукъым, тхьэмыщкӀэхэм я гугъэр кӀуэдынукъым.

²⁰ ЗыкъэӀэт, Зиусхьэн, тепщэныгъэр цӀыхум иремыубыд, хамэ лъэпкъхэр уи хьэкум тахътэм и пащхьэм иреувэ.

²¹ Шынагъэр ягу игъэлъ, Зиусхьэн; зэрыцӀыху къудейр ирещӀэж лъэпкъхэм.

²² Сыт щхьэкӀэ, Зиусхьэн, утпэжыжьэу ущыт? Махуаем сыт щхьэкӀэ тпэӀэщӀэ зыпщӀрэ?

²³ ЦӀыху бзаджэр пагагъэкӀэ тхьэмыщкӀэм йогуауэ: езыхэм къагупсыс хьилагъэм ахэр ӀэщӀрехуэж.

²⁴ Сыту жыпӀэмэ цӀыху бзаджэм игукӀэ зыщӀэхъуэпсыр щӀыхьу зыхуелъагъуж; мылъкум щӀэхъуэпсым Зиусхьэныр еуб, нэмыплъ ирет.

²⁵ ЦӀыху бзаджэм зыкъыфӀощӀыжри, Тхьэм зыхуигъазэркъым, «Тхьэ щыӀэкъым» игукӀэ жиӀэ зэпытщ.

²⁶ Сыт хуэдэ зэмани зэӀухащ абы и гъуэгур, Уи хьэкум лъагэм абы и нэплъэгъу нэсыркъым, и бий псоми щӀонакӀэ ар.

²⁷ Абы игукӀэ жеӀэ: «Сылъэпэрэпэнкъым игъащӀэкӀэ; щӀэблэхэм я деж мыхъун къыщызэхъулӀэнкъым игъащӀэкӀэ».

²⁸ Абы и жьэр щызэтрихкӀэ, цӀыхухэр еуб, пцӀы яхуеупс, йобг. И бзэгу щӀагъым мыгъуагъи бзаджагъи щӀэлъщ.

²⁹ Жылэхэм защегъэпщкӀури, япотӀыс цӀыхухэм; тӀасхъапӀэ щӀыпӀэхэм лажьэ зимыӀэр щеукӀ; цӀыху насыпыншэм йоплъакӀуэ;

³⁰ аслъэным хуэдэу зиудыгъуауэ, тхьэмыщкӀэм епхъуэну потӀыс; тхьэмыщкӀэр еубыдри и хъым ирегъахуэ.

³¹ Зеухуэ, ятобанэ – тхьэмыщкӀэхэр ӀэщӀохуэ и лъэбжьанэ лъэщым.

³² ИгукӀэ жеӀэ: «Тхьэм щыгъупщащ, и нэхэр иуфӀыцӀащ, игъащӀэкӀэ илъагъунукъым».

³³ Сыкъэлъагъу, Зиусхьэн, си Тхьэ, уи Ӏэхэр ятешие, хэутэн ящӀахэр зыщумыгъэгъупщэ.

³⁴ Сыт цӀыху бзаджэм и щӀыб Тхьэм щӀыхуигъазэр, игукӀэ жиӀэурэ: «Уэ сыбгъэпшынэнкъым»?

³⁵ Уэ уолъагъу, уакӀэлъоплъ къыттехьэлъэми къыдэгуауэми, ахэр уи Ӏэ къибгъэхьэну; цӀыху насыпыншэм уи ӀэмыщӀэ зыкърелъхьэ; ибэм уэ щӀэгъэкъуэну уриӀэ зэпытщ.

³⁶ ЦӀыху бзаджэмрэ щӀэпхъэджащӀэмрэ зэтекъути, гъэпшынэ ахэр – нэмыщӀ мыхъумыщӀэ ямыщӀэжыным нэсыху.

³⁷ Зиусхьэныр щӀэблэхэм игъащӀэкӀэ пащтыхьынущ. Абы и щыгум хамэ лъэпкъхэр текӀуэдыкӀынущ.

³⁸ Зиусхьэн! Хэутэн ящӀахэм яфӀэигъуэр Ӏумпэм пщӀыркъым, абыхэм ягухэр бгъэбыдэнущ; уи тхьэкӀумэ яхуэбгъэзэнущ,

³⁹ ибэмрэ хэутэн ящӀахэмрэ я хьэкъ ебгъэгъуэтыжыну, лӀэн хуей цӀыхум адрей цӀыхухэр залымыгъэкӀэ имыгъэшынэжыну.