Уэрэд 89 - ХъыбарыфӀыр. ЩӀэдзапӀэр. Уэрэд ЛъапӀэхэр

89-нэ Уэрэд

¹ Тхьэм и цӀыху Мусэ и тхьэлъэӀу

² Зиусхьэн! ЩӀэблэ псоми хъумапӀэу диӀэр Уэращ.

³ Бгыхэр къэхъун я пэкӀи щӀыр, дунейр къыщыбгъэщӀми, лӀэщӀыгъуэхэм къащегъэжьауэ лӀэщӀыгъухэм нэсыжу Уэ у-Тхьэщ.

⁴ Сабэ хъужыну, ибогъэгъэзэж Уэ цӀыхум, яжыбоӀэ: «Вгъэзэж, цӀыхухэм я къуэхэм!»

⁵ Сыту жыпӀэмэ илъэс минхэр УэркӀэ дыгъуасэ блэкӀа махуэми, жэщым хэт къэрэгъулми хуэдэщ.

⁶ Псыдзэм ихьхэм хуэдэу, цӀыхухэр Уэ блыбох; пщӀыхьым хуэдэщ ахэр, пщэдджыжьым къыхэжу, пщэдджыжьым къэгъагъэу, щхъуантӀэ хъурэ, пщыхьэщхьэм гъуэнлэж, лъэлъэж удзым хуэдэщ.

⁷ Сыту жыпӀэмэ дэ уи губжьым дегъэкӀуэд, уи губжь лъэщым дегъэшынэ.

⁸ Ди бзаджагъэхэр уи пащхьэ иплъхьащ Уэ, щэхуу длэжьа гуэныхьхэри щыболъагъу уи нэгум и нэхунэм.

⁹ Дэ ди махуэхэр псори уи губжь хэту кӀуащ; хэщэтыкӀ макъым хуэдэу ди илъэсхэр псынщӀэу блэкӀащ.

¹⁰ Дэ къэдгъащӀэ илъэсхэм я махуэхэр илъэс хыщӀрэ пщӀырэщ, нэхъ лъэрызехьэхэм – илъэс пщӀей; я нэхъ бжьыгъуэфӀыр зэшымрэ гугъехьымрэ яӀэрохьэ, сыту жыпӀэмэ псынщӀэу макӀуэри, дэри дадобзэхыж.

¹¹ Хэт уи губжьым и лъэщыгъуэр зыщӀэр, Уэри уи губжьым къыщышынэр хэт?

¹² Дигухэр Ӏущ хъуну, ди махуэхэм бжыгъэ зэраӀэм дегъасэ.

¹³ Зыкъытхуэгъазэ, Зиусхьэн! Сыт хуэдизрэ дызэбгъэжьэну? ГущӀэгъу хуэщӀ уи ӀурыщӀэхэм.

¹⁴ МыкӀуэдыж уи лъагъуныгъэр ди гущӀэм нэсу пщэдджыжьым къытлъэгъэӀэс, къэдгъащӀэ махуэ псоми я кӀуэцӀкӀэ дыгуфӀэну, гукъыдэж диӀэну.

¹⁵ Гугъуехь дыщыхэбгъэхуа махуэхэм пэкӀуэу гукъыдэж къыдэтыж – тхьэмыщкӀагъэ щытлъэгъуа илъэсхэм папщӀэ.

¹⁶ Уи Ӏуэху пщӀар дэ, уи ӀурыщӀэхэм, къытхурещыпкъэ, дэ къыттехъукӀынухэми уи щӀыхьыр ирелъагъу.

¹⁷ Зиусхьэну ди Тхьэм и нэфӀ щыхуэныгъэр ди щхьэщыгу ирырет, ди Ӏэхэм ялэжь Ӏуэхухэр къыддрехъу.