Уэрэд 88 - ХъыбарыфӀыр. ЩӀэдзапӀэр. Уэрэд ЛъапӀэхэр

88-нэ Уэрэд Лъэпкъыр гугъуехь щыхэтым деж жаӀэ уэрэд

¹ Эзрак и къуэ Этан иуса уэрэд

² Уи фӀыщӀагъэхэр, Зиусхьэн, игъащӀэкӀэ сӀуэтэнщ уэрэдкӀэ, къэкӀуэну щӀэблэ псоми яхуэсӀуэтэнщ щыпкъагъэу зепхьэр.

³ Сыту жыпӀэмэ сощӀэ: уи лӀагъуныгъэ мыкӀуэдыжыр игъащӀэкӀэ щыӀэну гъэпсащ, щыпкъагъэу пхэлъыр уафэгум Уэ быдэу щыбгъэуващ.

⁴ Уэ жыпӀащ: «Сэ къыхэсхам зэгурыӀуэныгъэ дэсщӀащ, си ӀурыщӀэ Даут псалъэ быдэ естащ.

⁵ КъыпщӀэхъуэнухэр игъащӀэкӀэ пащтыхьынхэу Сэ згъэувынщ, уи тетыгъуэр къэкӀуэну щӀэблэхэм ящымыкӀуэдыну згъэпсынщ».

⁶ Уэ блэжь Ӏуэху телъыджэхэм я щӀыхьыр щреӀуатэ уафэгухэм, Зиусхьэн, мелыӀычхэм я зэӀущӀэми щреӀуатэ Уэ щыпкъагъэу пхэлъыр.

⁷ Сыту жыпӀэмэ уафэгум щыӀэу хэт къыуагъэпщэн Уэ? Уафэм щыӀэхэм ящыщу, хэт Зиусхьэным хуэдэр?

⁸ Куэд дыдэ хъууэ уафэм щыӀэхэм я зэӀущӀэм Тхьэм шынагъуэшхуэ щыхуащӀ, зыхэт псомкӀи Ар шынагъуэшхуэщ.

⁹ Зиусхьэн, лъэкӀыныгъэ псори зиӀэ ди Тхьэ! Хэт Уэ пхуэдэу гуащӀащафӀэр, Зиусхьэн? Щыпкъагъэр Уэ къощӀэкӀащ лъэныкъуэ псомкӀи.

¹⁰ Хым и губжь лъэщыр уи Ӏэ илъщ; абы и толъкунхэм зыкъыщаӀэткӀэ, Уэ уогъэӀэсэж ахэр.

¹¹ ХьэкӀэкхъуэкӀэжьу Рахьаб Уэ букӀащ, бгъэлъахъшэри. Уи бийхэр Ӏэ быдэкӀэ зэтепкъутащ.

¹² Уафэгухэр ууейщ Уэ, щӀыгури ууейщ, дунеишхуэри абы щыӀэ псори Уэращ зыгъэувар.

¹³ Ищхъэрэри ипщэри Уэращ къэзыгъэщӀар; Табори Хьэрмони уи цӀэм и щӀыхьыр я гуапэу щаӀуатэ.

¹⁴ Быдэщ Уэ уи лыпцӀэ, уи Ӏэм гуащӀэшхуэ хэлъщ, лъагэщ уи Ӏэ ижьыр!

¹⁵ Щыпкъагъэмрэ захуагъэмрэ уи тахътэм и лъапсэщ; уи лъагъуныгъэ мыкӀуэдыжымрэ щыпкъагъэмрэ лӀыкӀуэу итщ уи япэ.

¹⁶ Гъуэгу махуэ теуващ щӀыхь уэрэдкӀэ Уэ узыгъэлъапӀэ цӀыху лъэпкъыр, уи нэфӀым и нэхунэм щыпсэухэр, Зиусхьэн!

¹⁷ Уи цӀэм ирогуфӀэ ахэр махуэ псом, Уэ щыпкъагъэу пхэлъыр ягъэлъапӀэ,

¹⁸ сыту жыпӀэмэ абыхэм я щӀыхьи я гуащӀи къыздикӀыр уи дежщ. УкъызэрытхуэфӀым и фӀыгъэкӀэ ди гуащӀэм къыхохъуэ.

¹⁹ Уэ, Зиусхьэн, къытхухэпхащ ди хъумакӀуэр, Уэ, Израилым и Тхьэ лъапӀэ, къыдэптащ ди пащтыхьыр.

²⁰ Уэ къыпхуэщыпкъэу уи ӀурыщӀэм зэгуэр укъыхуэлъагъуэри, жепӀэгъащ: «ЛӀыгъэ зыхэлъым Сэ щхьэрыстӀэгъащ пащтыхь тажыр, лъэпкъым Сэ къыхэсхар лъагэу сӀэтащ.

²¹ Си ӀурыщӀэ Даут пащтыхь сщӀащ, си дагъэ лъапӀэр щысхуащ Сэ абы.

²² Си Ӏэпщэр абы и гъусэнщ, си Ӏэм ар быдэ ищӀынщ.

²³ Бийр абы къыпэлъэщынкъым, бзаджагъэкӀэ зекӀуэ цӀыхуми ар егъэзыгъэ хуэщӀынкъым.

²⁴ Абы и пащхьэм щызэхэзгъэтэкъуэнщ и бийхэр, сеуэнщ абы и жагъуэгъухэм.

²⁵ Сэ щыпкъагъэу хузиӀэри си лъагъуныгъэ мыкӀуэдыжынри абы и гъусэщ, абы и гуащӀэ хэхъуэнщ си цӀэкӀэ.

²⁶ Абы и Ӏэ ислъхьэнщ хыр, псыхэми тетыгъуэ яхуиӀэ сщӀынщ.

²⁷ Сэ къэзэджэнщ ар: „Уэращ си Тхьэу си адэр, сыкъезыгъэл абрэмывэр Уэращ.

²⁸ Щыпэлъху сщӀынщ Сэ ар, щӀыгум тет пащтыхьхэм я нэхъ лъагэу“.

²⁹ МыкӀуэдыж лъагъуныгъэ хузиӀэнщ Сэ абы игъащӀэкӀэ, зэгурыӀуэныгъэу дэсщӀари згъэпэж зэпытынщ.

³⁰ Абы къытехъукӀахэм пащтыхьыпӀэр езгъэӀыгъынущ игъащӀэкӀэ, уафэгур щыӀэху, и тахъти щызгъэӀэнщ.

³¹ Абы къытехъукӀхэр Сэ згъэува хабзэм текӀрэ, си хьэкумхэм ебакъуэурэ зекӀуэмэ,

³² хабзэу згъэувахэр якъутэжу си унафэхэр ямыгъэзащӀэмэ,

³³ хабзэншагъэм пэкӀуэу, къащӀэмкӀэ згъэпшынэнщ, я бзаджагъэм пэкӀуэу щӀопщкӀэ удын езгъэхьынщ.

³⁴ Ауэ ар си лъагъуныгъэ мыкӀуэдыжым хэзгъэнынкъым, щыпкъагъэу схэлъми сытекӀынкъым.

³⁵ Скъутэжынкъым Даут дэсщӀа зэгурыӀуэныгъэр, си жьэм къыжьэдэкӀа псалъэр зэблэсхъункъым.

³⁶ Си цӀэ лъапӀэмкӀэ псалъэ быдэ стыгъащ зэгуэрым: зэблэсхъункъым Даут еста псалъэр.

³⁷ Абы къытехъукӀынухэр псэунщ игъащӀэкӀэ, дыгъэр щыӀэху, абы и тахътэр си пащхьэ итынщ.

³⁸ Даут и пащтыхьыгъуэр игъащӀэкӀэ щыӀэнщ, щыхьэт захуэу уафэгум ит мазэм хуэдэу».

Пащтыхьэм зэрытекӀуам папщӀэ тхьэусыхафэ

³⁹ Ауэ Уэ къыхэпхар къибдзэркъым, къыпфӀэӀуэхукъым, лъэщу ухуогубжь.

⁴⁰ Уи ӀурыщӀэм зэгурыӀуэныгъэу епщӀылӀар гулъытэншэу къэбгъэнащ, и пащтыхь тажыр щӀыгум тебдзэри, бгъэуфӀеящ;

⁴¹ Абы и къалэр къызэрыщӀыхьа блын псори зэхэбгъэщэщащ, и быдапӀэхэр хьэбэсабэ пщӀащ.

⁴² Къыбгъэдыхьэхэм ар зэрапхъуэ; и гъунэгъухэр къыщодыхьэшх;

⁴³ Абы пэувхэм я Ӏэ ижьхэр къэпӀэтри, тебгъэкӀуащ, и бийхэр Уэ бгъэгуфӀащ;

⁴⁴ и джатэдзэм зебгъэгъэзащ, зауэкӀэ япэбгъэувыжыфакъым.

⁴⁵ И щӀыхьи Уэ абы Ӏыпхащ, и тахътэри щӀым тебдзащ;

⁴⁶ и щӀалэгъуэ ныбжьыр бгъэкӀэщӀри, емыкӀу къебгъэхьащ абы.

⁴⁷ Сыт хуэдизрэ зыкъытщыбгъэпщкӀуну, Зиусхьэн, уи губжьыр мафӀэм хуэдэу зэщӀэнауэ сыт хуэдизрэ щытыну?

⁴⁸ Уигу игъэлъ си гъащӀэр зэрыкӀэщӀыр: зэрыхьзэрийм хэтыну ара цӀыхухэр къызыхуэбгъэщӀар?

⁴⁹ Хэт цӀыхухэм ящыщу лӀэныгъэр зымылъагъунур? Хэт хьэдрыхэ мыкӀуэн зылъэкӀынур?

⁵⁰ Нэхъапэм уиӀа лъагъуныгъэ мыкӀуэдыжыр дэнэ щыӀэ, Зиусхьэн? Даут къызэрыбгъэгугъа щыпкъагъэхэр дэнэ щыӀэ?

⁵¹ Уигу игъэлъ, Зиусхьэн, сэ, уи ӀурыщӀэр, сызэраущхьэкӀуар, сызыуб лъэпкъхэр зэрысшэчыр.

⁵² Уэ къыхэпхар уи бийхэм яуб, Зиусхьэн, абы и щӀэблэхэр щӀыхьыншэ ящӀ.

⁵³ Зиусхьэным щӀыхьыр ейщ игъащӀэкӀэ! Ӏэмын, Ӏэмин.