Уэрэд 87 - ХъыбарыфӀыр. ЩӀэдзапӀэр. Уэрэд ЛъапӀэхэр

87-нэ Уэрэд Къиным хэт цӀыхум и тхьэусыхафэмрэ и тхьэлъэӀумрэ

¹ Уэрэд. Корах и къуэхэм я уэрэд. Махалат Леанот ехьэлӀащ. Эзрах и къуэ Хьэмэн иуса уэрэд

² Зиусхьэн, сыкъезыгъэл си Тхьэ! Махуэм нэщхъейуэ сыноджэ, уи пащхьэ сыноувэ жэщым.

³ Уи пащхьэ ирехьэ си тхьэлъэӀур; Уи тхьэкӀумэ къыхуэгъазэ си джэ макъым.

⁴ Сыту жыпӀэмэ гугъуехьхэм си псэр зэлъаубыдащ, си гъащӀэри хьэдрыхэ пэблагъэ хъуащ.

⁵ Хьэдрыхэ кӀуэжхэм сахэлъытэ, гуащӀэ зимыӀэж цӀыху сыхъуащ.

⁶ Мыпсэужхэм сыхадзэжащ – яукӀауэ, Уэ уи нэплъэгъуэ ӀэщӀэзауэ, уи Ӏэхэр зылъэмыӀэсыжхэу, пхъэмбейм дэлъхэм сахуэдэщ.

⁷ Хьэдрыхэ и кууупӀэм сыхэбдзащ – кӀыфӀым, щӀэ зимыӀэм.

⁸ КъызэхьэлъэкӀ хъуащ уи губжьыр абы и толъкунхэм сызэщӀаӀулӀакӀэщ.

⁹ Си нэӀуасэхэм зыкъысщадзей пщӀащ, абыхэм ягу збгъэдэкӀащ; ахэмкӀэ гоӀуджэ сыпыгъ, сыщӀэбубыдащ, сыкъыщӀэкӀыжын слъэмыкӀыу.

¹⁰ Си нэхэр игъэпщащ гукъеяуэм; махуэ псом сыноджэ, Зиусхьэн; си Ӏэхэр ныпхузоший.

¹¹ Зыхуэдэ щымыӀэ Ӏуэху телъыджэхэр лӀахэм яхуэпщӀэрэ Уэ? ЛӀахэр къэтэджыжмэ, Уэ щӀыхь къыпхуащӀыну?

¹² Хьэмэ уи лъагъуныгъэ мыкӀуэдыжым и гугъу бэным щащӀрэ? Уи щыпкъагъэр щаӀуатэрэ кӀуэдыпӀэм?

¹³ КӀыфӀым хэтмэ, уи Ӏуэху телъыджэхэр ящӀэн? Ящыгъупщэжамэ я щӀыгу, Уэ уи щыпкъагъэр ящӀэн?

¹⁴ Ауэ сэ сынолъэӀу Уэ, Зиусхьэным; си тхьэлъэӀур пщэдджыжьым жьыуэ уи пащхьэ нохьэ.

¹⁵ Сыт щхьэкӀэ зыкъысщыбдзейрэ, Зиусхьэн, уи нэкур сыт щхьэкӀэ сщыбгъэпщкӀурэ?

¹⁶ СекӀэкӀуащ, си щӀалэгъуэм щегъэжьауэ лэныгъэм пэблагъэ сыхъуащ. Уэ сыбгъэшэч шынагъуэхэм си гуащӀэр яухащ.

¹⁷ Уэ уи губжь лъэщыр къысщхьэщыхьащ; хьэлэч сыбощӀ, шынагъуэу укъыстебанэурэ.

¹⁸ Псы хуэдэ, сыкъаухъуреихь махуэ псом; зэгъусэу псоми сыкъаувыхь.

¹⁹ Ныбжьэгъухэмрэ фӀыуэ слъагъухэмрэ зыкъысщадзеину пщӀащ Уэ. Сэ сыздэщыӀэм щыкӀыфӀщ.