Уэрэд 85 - ХъыбарыфӀыр. ЩӀэдзапӀэр. Уэрэд ЛъапӀэхэр

85-нэ Уэрэд ДэӀэпыкъуэгъум папщӀэ тхьэлъэӀу

Даут и тхьэлъэӀу

¹ Зиусхьэн, уи тхьэкӀумэ къысхуэгъази, сызэхэх, сыту жыпӀэмэ сытхьэмыщкӀэщ сэ.

² Си псэр къегъэл, сыту жыпӀэмэ фӀэлӀыкӀ ныпхузиӀэщ; къегъэл мыкӀуэду уи ӀурыщӀэуэ къыпщыгугъыр, си Тхьэ.

³ ГущӀэгъу къысхуэщӀ, Зиусхьэн, махуэ псом макъышхуэкӀэ сыноджэ.

⁴ Уи ӀурыщӀэм гукъыдэж къет, Зиусхьэн, сигукӀэ сыпхудоплъей.

⁵ Сыту жыпӀэмэ, Зиусхьэн, Уэ къытхубогъэгъу, уфӀщ. Уэ къолъэӀу псоми мыкӀуэдыж лъагъуныгъэ яхууиӀэщ.

⁶ Уи тхьэкӀумэ къыхуэгъазэ, Зиусхьэн, си тхьэлъэӀу, си лъэӀу макъ къыщӀэдэӀу.

⁷ Къин щыслъагъу махуэм сэ Уэ зыпхузогъазэ, сыту жыпӀэмэ сызэхыбох.

⁸ Уэ пхуэдэ тхьэ щыӀэкъым, Зиусхьэн, Уэ блэжьа Ӏуэхум хуэди щыӀэкъым.

⁹ ЦӀыху лъэпкъыу Уэ къэбгъащӀахэр псори уэ деж къекӀуэлӀэнщи, уи пащхьэм щхьэщэ щащӀынщ, Зиусхьэн, уи цӀэми щӀыхь хуащӀынщ.

¹⁰ Сыту жыпӀэмэ Уэ уин дыдэщ, Ӏуэху гъэщӀэгъуэнхэр Уэ пхузэфӀокӀ. Уэ зызакъуэрщ Тхьэр.

¹¹ Уи лъагъуфӀхэм сащыгъэгъуазэ, Зиусхьэн, уи щыпкъэр гъуэгуанэ схуэхъуну; Уэ уи цӀэ згъэлъэпӀэн папщӀэ, Абы фӀэлӀыкӀ хузиӀэ ирехъу.

¹² ЩӀыхь пхуэсщӀынщ, Зиусхьэну си Тхьэ, си гум хузэфӀэкӀ псомкӀи уи цӀэм щӀыхьыр игъащӀэкӀэ хужысӀэнщ.

¹³ Сыту жыпӀэмэ мыкӀуэдыжын лъагъуныгъэу Уэ къысхууиӀэр ин дыдэщ: си псэр хьэдрыхэ и кууупӀэм къыхэпшри, щхьэхуит сыпщӀащ Уэ.

¹⁴ Ди Тхьэ! Напэншэхэр къыспэтэджащ сэ, цӀыху залым куэдыр си псэм къощэ. Уэ узэрапэсыркъым.

¹⁵ Ауэ Уэ, Зиусхьэну гущӀэгъукӀэ хьэлэл Тхьэр, фӀыгъэшхуэ зиӀэу, мыкӀуэдыж лъагъуныгъэ инрэ щыпкъагъэшхуэрэ зыхэлъыр,

¹⁶ зыкъысхуэгъази, гущӀэгъу къысхуэщӀ; уи уи ӀурыщӀэм гуащӀэ къет, сэ, уи ӀурыщӀэ бзылъхугъэм и къуэр, сымыкӀуэду сыкъегъэл.

¹⁷ Уи фӀыгъэр къысхуэгъэщыпкъэ, Зиусхьэн, си жагъуэгъухэм ар ирелъагъуи, я напэр трырекӀ, сыту жыпӀэмэ Уэ, Зиусхьэн, укъыздэӀэпыкъури, гупсэхугъуэ къызэптыжащ.