Уэрэд 84 - ХъыбарыфӀыр. ЩӀэдзапӀэр. Уэрэд ЛъапӀэхэр

84-нэ Уэрэд Лъэпкъым и фӀыгъэм ехьэлӀа тхьэлъэӀу

¹ УэрэдыӀуэхэмрэ пшынауэхэмрэ я пашэм папщӀэ Корах и къуэхэм я уэрэд

² Зиусхьэн! Уэ уи щӀыгум нэфӀкӀэ укъеплъыгъащ, Екъуб и мылъкур ебгъэгъуэтыжыгъащ.

³ Уи цӀыху лъэпкъым бзаджагъэу ищӀахэр хуэбгъэгъуащ, и гуэныхь псори хуэбгъэкӀуэдащ.

⁴ Уи губжьыр зэхэпхьэжащ, уи губжь лъэщым уи щӀыб хуэбгъэзащ.

⁵ Зыпкъ дигъэувэж, дымыкӀуэдэу дыкъезыгъэл ди Тхьэ, губжьу къытхуэпщӀыр зэпыгъэу.

⁶ Губжь къытхууиӀэну атӀэ игъащӀэкӀэ, щӀэблэ зэкӀэлъыкӀуэ псори уи губжьым пхрыпшыну?

⁷ ГуащӀэ къытхэплъхьэжынкъэ, дэ, уи цӀыху лъэпкъым, гуфӀэгъуэ къыдэптыжынукъэ?

⁸ Уи лъагъуныгъэ мыкӀуэдыжыр дыкъэлъагъу, Зиусхьэн, дымыкӀуэду дыкъегъэл.

⁹ Зиусхьэну ди Тхьэм жиӀэм содаӀуэ. И цӀыху лъэпкъыу, и цӀыху лъапӀэхэр, мамырыгъэм щегъэгугъ, акъылыншагъэм къремыгъэзэж афӀэкӀа.

¹⁰ Аращи, Абы фӀэлӀыкӀ хузиӀэхэр, къригъэлыным пэжыжьэкъым, и щӀыхьыр ди щӀыгум тез ирехъу!

¹¹ ЗэӀущӀэнщ лъагъуныгъэ мыкӀуэдыжымрэ щыпкъагъэмрэ, щыпкъагъэмрэ мамырыгъэмрэ зэбэунщ.

¹² Щыпкъагъэр щӀым къыхэкӀынщ, Тхьэм и щыпкъагъэр уафэм къеплъыхынщ.

¹³ Зиусхьэным фӀыгъуэр къытлъигъэсынщ, щӀыгум гъавэ къыдитынщ;

¹⁴ щыпкъагъэр Абы и пэ итынщ, и лъэм гъуэгу хуигъэхьэзырыну.