Уэрэд 83 - ХъыбарыфӀыр. ЩӀэдзапӀэр. Уэрэд ЛъапӀэхэр

83-нэ Уэрэд Тхьэм и унэм ухуэзэшыныр

¹ УэрэдыӀуэхэмрэ пшынауэхэмрэ я пашэм папщӀэ. Гъитиг пшынэдыкъуакъуэкӀэ дежьууэ. Корах и къуэхэм я уэрэд

² Сыту, лъэкӀыныгъэ псори зиӀэ Зиусхьэн, тыншыпӀэ уи псэупӀэхэр!

³ СыщӀохъуэпс, сыхуопабгъэ, Зиусхьэным и пщӀантӀэм, си гуи си пкъи Тхьэуэ гъащӀэ къыдэзытым щӀыхь уэрэд хужаӀэ.

⁴ Бзу цӀыкӀуми зыщыпсэун, пцӀащхъуэми и шырхэр зригъэсын абгъуэ щагъуэт уи къурмэнщӀыпӀэхэм деж, лъэкӀыныгъэ псори зиӀэ Зиусхьэн, сэ си пащтыхьу си Тхьэ!

⁵ Гъуэгу махуэ теуващ Уэ уи унэ щыпсэухэу, Уэ щӀыхь зэпымыууэ къыпхуэзыщӀхэр.

⁶ Гъуэгу махуэ теуващ Уэ гуащӀэ къыпхэзыгъуатэ цӀыхур, Цион Ӏуащхьэм Уэ ущагъэлъэпӀэну, гъуэгу техьэну хуэпӀащӀэхэр.

⁷ Гъыбзэм и къуэладжэ зэпач щыхъукӀэ, псыжапӀэ иӀэ мэхъу абы, бжьыхьэ уэшхри къытошхэ абы, и нэфӀ къыщыхуам хуэдэу.

⁸ Ахэр кӀуэурэ, я гуащӀэ хохъуэ, Цион Ӏуащхьэм щалъагъунщ Тхьэуэ Псоми Я Нэхъ Лъагэр.

⁹ Зиусхьэн, лъэкӀыныгъэ псори зиӀэ ди Тхьэ! си тхьэлъэӀур къызэхэх, къызэдаӀуэ, Екъуб и Тхьэ!

¹⁰ Уэ, ди Тхьэ, удихъумакӀуэщ! Уэ Къыхэпхам нэфӀкӀэ къеплъ.

¹¹ Сыту жыпӀэмэ уи пщӀантӀэм зы махуэ ущыпсэуныр махуэ миным я уасэщ. БзаджащӀэхэм я шэтырым сыщӀэсу си гъащӀэр схьыным нэхърэ, Тхьэм и унэшхуэ щӀыхьэпӀэм деж сыӀутыныр нэхъ къыхызох.

¹² Сыту жыпӀэмэ Зиусхьэну Тхьэр – дыгъэщ, мэӀущ, Зиусхьэным фӀыгъуэмрэ щӀыхьымрэ къует; лажьэ ямыӀэу псэухэр Абы фӀыгъуэм хигъэныркъым.

¹³ ЛъэкӀыныгъэ псори зиӀэ Зиусхьэн! Гъуэгу махуэ теуващ къыпщыгугъ цӀыхур!