Уэрэд 82 - ХъыбарыфӀыр. ЩӀэдзапӀэр. Уэрэд ЛъапӀэхэр

82-нэ Уэрэд Израилыр и бийхэм ятекӀуэн папщӀэ тхьэлъэӀу

¹ Уэрэд. Асаф и уэрэд

² Ди Тхьэ! Зумыущэху, Макъыншэ зумыщӀ, утемыпыӀэ, ди Тхьэ!

³ Сыту жыпӀэмэ, мис, уи бийхэр мэбырсыр, узылъагъу мыхъухэм я щхьэ къаӀэтащ;

⁴ уи цӀыху лъэпкъым пэщӀэуэу гухэлъ бзаджэ ящӀ, Уэ къэпхъумэхэм тебэнэнхэу зэрыгъэӀущыжащ;

⁵ абыхэм жаӀэ: «ДыкӀуэнщи, цӀыху лъэпкъым хэдгъэкӀуэдыкӀынщ, Израил и цӀэр игъащӀэкӀэ ягу къэмыкӀыжыну».

⁶ Зэдэарызыуэ зэрыгъэӀущащ, зэгуроӀуэ Уэ къыппэувыну:

⁷ эдом цӀыхухэр, Исмэхьил къытехъукӀахэр, моаб цӀыхухэр, Хьэджэр къытехъукӀа цӀыхухэр,

⁸ гэбал, аммон, амалек, филишт цӀыхухэр, Тирэ къалэм щыпсэухэри ящӀыгъуу.

⁹ Абыхэм ягухьащ ашур цӀыхухэри; ЛутӀэ къытехъукӀахэр гъусэ лъэщ яхуэхъуащ.

¹⁰ Кишон псыхъуэм деж Мидиан, Сисэрэ, Ябин сымэ щепщӀар абыхэм ящӀэ.

¹¹ Ахэр Эндорэ жылэм щаукӀри, вэнывей хэхъухьыжащ щӀым.

¹² ЯдызекӀуэ я цӀыху лъэрыхьхэм, Ӏуэрэб, Зэеб, сымэ уазэрызэдекӀуам хуэдэу; япщ псоми ещӀэ Зэбахъэи, Цалмуннэ сымэ епщӀар,

¹³ мыр жызыӀахэм: «Тхьэм и хэкур дэ дыдеину дубыдынщ».

¹⁴ Жьыбгъэм ирихьэжьа сабэм хуэдэ щӀы ахэр, си Тхьэ, жьым зэрихьэ хукхъуэм хуэдэ.

¹⁵ Лыгъэм мэзыр зэрисым хуэдэу, мафӀэбзийм къущхьэхэр зэрилыпщӀым ещхьэу,

¹⁶ уи жьыбгъэм ирегъэхьэжьэ ахэр, уи жьыбгъэшхуэм егъэгъэшынэ;

¹⁷ я нэгу зэлъегъащтэ напэншагъэм, Уэ зыкъыпхуагъэзэжыну, Зиусхьэн!

¹⁸ ЕмыкӀу кърехь, ирекӀуэд, напэншэ ирехъу, ирекӀуэд.

¹⁹ ЗэхрещӀыкӀ Уэ, зи закъуэу Зиусхьэн зи цӀэу, щӀыгу Псоми Я Нэхъ Лъагэу узэрыщытыр.