Уэрэд 76 - ХъыбарыфӀыр. ЩӀэдзапӀэр. Уэрэд ЛъапӀэхэр

76-нэ Уэрэд Тхьэм гузэвэгъуэм хэт цӀыхухэм я гукъеуэр ящхьэщех

¹ УэрэдыӀуэхэмрэ пшынауэхэмрэ я пашэм папщӀэ. Пшынауэ пашэ Эдутун папщӀэ. Асаф и уэрэд

² Си тхьэусыхафэр Тхьэм изохьэлӀэ, си макъ соӀэт, Абы сыкъыхихын папщӀэ.

³ Гугъуехьым сыщыхэт махуэм Зиусхьэным сылъохъу; си Ӏэр щӀэмычэу шиящ жэщым; гупсэхугъуэ згъуэтын слъэкӀыркъым.

⁴ Тхьэр сигу къыщыкӀыжкӀэ сыхощэтыкӀ; си гупсысэхэм гупсэхугъуэ къызатыркъым.

⁵ Си напӀэ зэтезбгъалъхьэркъым; гукӀуэдыгъэм сыкъигъэпсалъэркъым.

⁶ Согупсыс махуэ блэкӀахэм, илъэс блэкӀахэм я зэманым;

⁷ жэщ гупсысэхэм сагъэтыншыркъым, согупсыс, сызоупщӀыж:

⁸ «Зиусхьэным дыхыфӀидзэпауэ, зыкӀи къытхуэмыфӀыжу ара?

⁹ Абы и лъагъуныгъэ мыкӀуэдыжыр зэпыуагъэпэ, дыкъызэригъэгугъар ямыгъэщыпкъэжыну ара щӀэблэхэм?

¹⁰ Щыгъупща Тхьэм гущӀэгъу къытхуищӀыну? Къытхуэгубжьауэ, и гущӀэгъу къытлъимыгъэӀэсыжыну ара?»

¹¹ Абы щхьэкӀэ жызоӀэ: «Мыращ сигу къеуэр – Псоми Я Нэхъ Лъагэм и Ӏэ зэблихъуащ».

¹² Зиусхьэн, сигу изгъэлъынщ уи ӀэщӀагъэхэр; Ӏуэху щӀагъуэу ижькӀэ Уэ блэжьахэр сигу къэзгъэкӀыжынщ.

¹³ Ӏуэхуу зепхьа псори сигу изгъэлъынщ, Ӏуэхушхуэу зэфӀэпхахэм сегупсысынщ.

¹⁴ Ди Тхьэ! Уи гъуэгур лъапӀэщ. Ди Тхьэ, Уэр хуэдэу хэт иныр?

¹⁵ ГъэщӀэгъуэн дыдэхэр зылэжьыф Тхьэр Уэращ. ЛъэкӀыныгъэшхуэу Уэ уиӀэр цӀыху лъэпкъхэм къебгъэлъэгъуащ.

¹⁶ Уи гуащӀэ инкӀэ къэпщэхужащ уи цӀыху лъэпкъым и щхьэр – Екъубрэ Исуфрэ къытехъукӀахэр.

¹⁷ Уэ, ди Тхьэ, уалъэгъуащ псыхэм, псыхэм ущалъагъум, къэшынэри, псыщӀэ куухэр тхытхащ.

¹⁸ Пшэхэм псыр къракӀыхыу, уэгум щыблэр щыуэу, уи бжыкӀхэр дэнэкӀи щыджэгуащ.

¹⁹ Уи щыблэр къэуащ хьэрыгъажэ шэркъым и макъым хуэдэу, бжыкӀхэм дунеишхуэр къагъэнэхуащ; щӀыр зджызджащ, зэщӀэхъаери.

²⁰ Уи гъуэгур хым хыхьащ, уи лъагъуэр псышхуэхэм зэпрыкӀащ, ауэ уи лъэужьхэр къыхэщакъым.

²¹ Мусэрэ Хьарунрэ я ӀэкӀэ, Ӏэщ хъушэ хуэдэу, къепшэкӀащ уи цӀыху лъэпкъыр.